O padroado da Fundación Pública Escola Galega de Administración Sanitaria, con domicilio en Santiago de Compostela, na súa reunión celebrada o día 12 de marzo de 1998, acordou, en uso das competencias que lle atribúe o artigo 11.f) dos seus estatutos, aprobados polo acordo do Consello da Xunta de Galicia do 19 de decembro de 1997, inicia-lo procedemento para o nomeamento do secretario xeral da fundación, nos termos previstos no artigo 5 da Lei 10/1996, do 5 de novembro, de actuación de entes e empresas nas que ten participación maioritaria a Xunta de Galicia, en materia de persoal e contratación.

En consecuencia, anúnciase publicamente a súa contratación conforme as seguintes bases:

Primeira.- A designación do secretario xeral corresponderá ó padroado da fundación, formalizándose coa persoa designada un contrato laboral de alta dirección regulado no Real decreto 1382/1985, do 1 de agosto, polo que se regula a relación laboral de carácter especial do persoal de alta dirección, cun nivel retributivo axeitado ó seu cometido funcional. A duración do dito contrato non poderá exceder de 4 anos, prorrogables por acordo das partes e conforme as disposicións aplicables na materia.

Segunda.- Os aspirantes deberán presentar xunto coa solicitude un curriculum vitae e xustificar mediante certificación ou copia compulsada os méritos nel alegados.

As ditas solicitudes irán dirixidas ó presidente do padroado da fundación e remitiranse ó rexistro xeral da Consellería de Sanidade e Servicios Sociais, sito en San Caetano, Santiago de Compostela, no prazo de dez días hábiles, contados a partir do seguinte ó da súa publicación no Diario Oficial de Galicia.

Terceira.- Se resultase nomeada unha persoa que teña a condición de empregado público, tramitarase da súa Administración de orixe o pase á situación administrativa que lle corresponda.

Cuarta.- A resolución desta convocatoria farase pública no Diario Oficial de Galicia e poderase declarar deserto, de considerarse oportuno, o órgano convocado.

Santiago de Compostela, 12 de marzo de 1998.

José María Hernández Cochón

Presidente do padroado da Fundación Pública Escola Galega de Administración Sanitaria

2029g