En virtude do convenio asinado entre a Consellería de Educación e Ordenación Universitaria e o Colexio de Europa en Bruxes, co fin de contribuír á formación de profesionais que se familiaricen coas institucións, o dereito e a economía europeos,
DISPOÑO:
Artigo 1º
Convócase concurso público para a adxudicación de dúas bolsas destinadas a titulados superiores en ciencias políticas e da administración, dereito, ciencias económicas ou ciencias empresariais para realizar estudios de especialización en temas relacionados coa Unión Europea e o proceso de integración europeo, no Colexio de Europa con sede en Bruxes.
Artigo 2º
Apróbanse as bases que rexerán esta convocatoria e que se publican como anexo I a esta orde.
Artigo 3º
A Xunta de Galicia financiará estas bolsas con cargo á partida orzamentaria 07.05.322C.483.0 da Dirección Xeral de Universidades para o exercicio de 1998, cunha contía máxima de 3.900.000 ptas.
Artigo 4º
A convocatoria, as súas bases e tódolos actos administrativos que se deriven dela, poderán ser impugnados polos interesados no prazo e forma previstos na Lei 30/1992, de réxime xurídico das administracións públicas e do procedemento administrativo común.
Artigo 5º
Para os efectos establecidos no artigo 42.2º da Lei 30/1992, o prazo máximo para resolve-las solicitudes correspondentes ás accións especificadas nesta orde será de seis meses, contados a partir do día seguinte á data de peche da respectiva convocatoria. Se no dito prazo non se dictase resolución expresa entenderase que quedan desestimadas as solicitudes presentadas.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 23 de marzo de 1998.
Celso Currás Fernández
Conselleiro de Educación e Ordenación Universitaria
ANEXO I
Bases da convocatoria
1. Requisitos dos solicitantes.
-As bolsas poderán ser solicitadas por aqueles titu. lados superiores en ciencias políticas e da Admi
nistración, dereito, ciencias económicas ou ciencias empresariais que cumpran cos seguintes requisitos:
a) Posuí-la nacionalidade española ou ser nacionais dun país membro da Unión Europea.
b) Ter rematados os estudios de licenciatura en xuño de 1992 ou con posterioridade a esta data.
c) Ter coñecementos satisfactorios de galego, inglés e francés.
d) Ter unha nota media do expediente académico de licenciatura igual ou superior a 2 puntos. Esta nota calcularase segundo as indicacións incluídas no punto 4 do presente anexo.
2. Duración e contía das bolsas.
A duración das bolsas é a dun curso académico completo (1998-99).
O importe de cada bolsa ascende a un total de 1.950.000 ptas. brutas que se destinará a:
a) O pagamento das taxas e estadía que será efectuada en nome do bolseiro pola Consellería de Educación e Ordenación Universitaria directamente no Colexio de Europa en Bruxes.
b) A cantidade restante ingresaráselle ó bolseiro nun só pagamento, en concepto de axuda institucional para gastos de desprazamento e seguro combinado de accidentes. O pagamento efectuarase unha vez incorporado ó Colexio de Europa.
3. Formalización das solicitudes.
As solicitudes, conforme o modelo oficial que se publica como anexo II a esta orde, presentaranse no rexistro xeral da Consellería de Educación e Ordenación Universitaria ou en calquera dos centros previstos no artigo 38.4º da Lei 30/1992, de réxime xurídico das administracións públicas e do procedemento administrativo común. As solicitudes deberán ir acompañadas da seguinte documentación:
a) Fotocopia do DNI ou doutro documento acreditativo da nacionalidade do solicitante.
b) Currículum vitae do solicitante cos documentos acreditativos dos méritos alegados.
c) Certificación académica completa que acredite a súa condición de licenciado en ciencias políticas e da Administración, dereito, ciencias económicas ou ciencias empresariais, tendo rematados os estudios correspondentes en xuño de 1992 ou en data posterior. No caso de que o solicitante espere acadar esta condición en xuño de 1998 aceptarase tamén a solicitude, pero a concesión da bolsa, se é o caso, farase con carácter condicional, subordinada á presentación da certificación académica que deberá remitirse á Dirección Xeral de Universidades antes do 31 de xullo de 1998.
En todo caso, deberá presentar un certificado académico que reflicta os estudios cursados ata o momento e as cualificacións obtidas.
Os títulos obtidos no estranxeiro ou en centros non estatais deberán estar validados ou recoñecidos na data de finalización do prazo de presentación de solicitudes e deberanse xuntar, se é o caso, as oportunas táboas de equivalencias oficiais das cualificacións.
d) Documentos que acrediten un dominio suficiente do galego, inglés e francés.
O prazo de presentación de solicitudes será de vinte días hábiles contados a partir do día seguinte ó da publicación da presente convocatoria no DOG.
4. Valoración e resolución do concurso.
A Dirección Xeral de Universidades nomeará unha comisión de selección, que, despois de realizar unha avaliación das solicitudes, elaborará unha relación na que figurarán aqueles candidatos que, ó seu xuízo, reúnen os requisitos mínimos para acceder a estas bolsas.
Presidirá a comisión, como representante da dirección xeral, o subdirector xeral de Universidades e actuarán como vocais un representante de cada unha das universidades galegas e tres membros da Dirección Xeral de Universidades, dos cales, un actuará como secretario, con voz e voto.
A composición da comisión de selección farase pública con anterioridade á resolución da convocatoria e os seus membros terán dereito á percepción de asistencias e axudas de custo por concorreren ás sesións conforme o Decreto 299/90, do 24 de maio, modificado, en parte, polo Decreto 21/1994, do 4 de febreiro, sobre indemnizacións por razóns de servicio ó persoal con destino na Administración autonómica de Galicia.
A nota media do expediente académico calcularase de acordo co seguinte baremo:
-Matrícula de honra: 4 puntos
-Sobresaliente: 3 puntos
-Notable: 2 puntos
-Aprobado: 1 punto
Segundo o plan de estudios que se teña cursado, esta nota media calcularase do xeito seguinte:
a) Estudios organizados por materias:
Media=suma das notas de cada materia / nº total de convocatorias empregadas.
b) Plans de estudios estructurados en créditos:
Media=(N1.P1 + N2.P2 + N3.P3 + ...)/ (C1.N1 + C2.N2+ ...)
Onde:
N1=nº de créditos de cada materia.
P1=puntuación de cada materia.
C1 = nº de convocatorias empregadas en cada materia.
Unha vez que o Colexio de Europa confirme a selección dalgún dos candidatos propostos (máximo de 2), a Consellería de Educación e Ordenación Universitaria procederá a resolver con carácter definitivo a presente convocatoria mediante orde que se publicará no Diario Oficial de Galicia.
A selección realizarase tendo en conta o expediente académico, o currículum presentado e os coñecementos de galego, inglés e francés dos solicitantes. Respecto do coñecemento destes idiomas, a comisión poderá realiza-las probas que coide oportunas sobre a capacidade de expresión oral e escrita dos candidatos.
5. Obrigas dos bolseiros.
a) O bolseiro está obrigado a incorporarse ó centro correspondente ó comezo do curso académico e deberá informar inmediatamente disto á Dirección Xeral de Universidades.
b) A Dirección Xeral de Universidades poderá, en calquera momento do curso, solicitarlle ó bolseiro un informe sobre as súas actividades. Así mesmo, poderáselle solicitar este informe ós responsables do programa de estudios. No caso de producirse unha avaliación desfavorable poderá decidirse o cesamento inmediato da axuda e, incluso, a devolución das cantidades xa pagadas.
c) O bolseiro comprométese a elaborar unha memoria cun resumo dos estudios realizados, así como de tódolos extremos que xulgue convenientes. A dita memoria entregarase ó remate dos estudios.
d) O desfrute da bolsa é incompatible coa realización de calquera traballo remunerado ou con outra bolsa.
6. Aceptación da bolsa.
A aceptación da bolsa farase mediante documento asinado polo bolseiro no que se compromete a cumprir todas e cada unha das condicións recollidas nas presentes bases.
7. Incidencias.
Non se admitirán renuncias ás bolsas concedidas, salvo casos excepcionais debidamente xustificados.
O incumprimento por parte dos bolseiros dos compromisos adquiridos conforme as bases da presente convocatoria poderá dar lugar á revogación da axuda concedida e á reclamación das cantidades anticipadas, de conformidade co disposto no artigo 78.6º da Lei 11/1992, de réxime financeiro e presupostario de Galicia.
A Dirección Xeral de Universidades resolverá tódalas dúbidas e incidencias que poidan xurdir na aplicación da presente convocatoria.
