Dentro dos programas de actividades que a Academia Galega de Seguridade ten previsto realizar no ano 1998 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de dous cursos sobre actualización en materia de tiro, que deberán desenvolverse conforme ás seguintes bases:
Obxectivos.
Os cursos teñen por obxectivos a formación básica en materia de armamento, o estudio da arma regulamentaria, a súa conservación, limpeza e mantemento e conseguir un adecuado nivel de destreza no manexo das armas e no tiro policial.
Destinatarios.
Os cursos van dirixidos ós membros dos corpos das policías locais de Galicia e membros da unidade do C.N.P. adscrita á Comunidade Autónoma de Galicia e, no caso de quedaren prazas vacantes, os membros do Corpo Nacional de Policía e Garda Civil.
Inscrición.
A inscrición dos participantes será totalmente gratuíta.
Prazas.
O número de prazas que se ofertarán en cada curso será de 20.
Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 2 de xuño, ás 14 horas.
3. As instancias deberán vir asinadas polo xefe do cadro de persoal, ou polo concelleiro de tráfico e seladas; será esto requisito indispensable para ser admitido nos cursos; o incumprimento deste requisito implicará á non admisión ó devandito curso.
4. As instancias deberán enviarse á sede da Academia Galega de Seguridade: Avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido e duración.
Os cursos celebraranse en sesións de tarde, de luns a venres, e neles trataranse, entre outros, os seguintes temas:
Parte teórica.
a) Normas de seguridade con armas de fogo.
b) Estudio das armas regulamentarias. Pistola-revólver.
-Pistola: clases. Mecánica funcional. Canón fixo e canón móbil.
-Revólver: partes, mecanismos e sistemas que o integran. Mecánica funcional.
-Cartuchería:
* O proxectil e as súa clases. A efectividade dos proxectís. Enerxía cinética. Poder de penetración. Poder de parada. Influencia da deformación e da velocidade.
* Cartuchos especiais:
Munición KTW.
Munición QUICK DEFENSE.
Munición SHORT STOP.
Munición HYDRA SHOK.
Munición SAFETY SLUG (Glaser).
Munición T.H.V.
Munición DYNAMIT NOBEL ACTION.
Munición SAFETY GECO.
-Coidado das armas. Pistola e revólver.
-Avarías e interrupcións máis frecuentes. Limpeza, coidado e conservación.
Parte práctica.
Regras e medidas de seguridade.
-Tiro policial. Empuñamento a unha e dúas mans.
-Tiro instintivo e defensivo, a unha e dúas mans.
-Técnicas de desenfunde.
Datas.
Os cursos celebraránse nas seguintes datas:
1º curso: do 15 ó 19 de xuño de 1998.
2º curso: do 22 ó 26 de xuño de 1998.
O horario será de 16 a 20 horas do serán.
Relación de admitidos.
A relación de admitidos publicarase o día 9 de xuño no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (986) 59 00 21.
Lugar.
Os cursos desenvolveránse no campo de tiro da federación sito en Bando, en Santiago de Compostela.
Certificado de asistencia.
Ó remate de cada curso entregaráselle un certificado de asistencia a aquelas persoas que acrediten a súa participación continuada a el, non podendo supera-las faltas de asistencia un 15% do total da duración de horas lectivas do curso; unha inasistencia superior ó 15%, aínda que sexa xustificada, implicará a non expedición do certificado.
Modificacións.
A Academia Galega de Seguridade poderá modifica-lo desenvolvemento dos cursos para adapta-los ás necesidades da Administración e ás continxencias que poidan xurdir.
Santiago de Compostela, 29 de abril de 1998.
Juan José Fariñas-Ferro Rodríguez
Director xeral da Academia Galega de Seguridade
4475