Con base no artigo 25.1º da Lei 1/1998, do 7 de abril, de orzamentos xerais da Comunidade Autónoma de Galicia para 1998, o Consello da Xunta de Galicia, por Decreto 124/1998, do 23 de abril, autorizou a realización das operacións financeiras recollidas na indicada lei mediante a emisión de débeda pública ou a concertación de créditos, facultando, así mesmo, o conselleiro de Economía e Facenda para que estableza as condicións das ditas operacións e dicte as disposicións necesarias para tal efecto. Por todo isto,
DISPOÑO:
Artigo 1º
Obtida a autorización, establecida no artigo 14 punto 3º da Lei orgánica 8/1980, do 22 de setembro, de financiación das comunidades autónomas, mediante acordo do Consello de Ministros con data do 19 de xuño de 1998, disponse a emisión de débeda pública interior por un importe de 17.500 millóns de pesetas.
Artigo 2º
Esta emisión constitúe para tódolos efectos un segundo tramo da emitida ó 20 de xullo deste ano 1998, código valor ES0001352147, polo importe de
13.000 millóns de pesetas, cun cupón do 5,40% e vencemento do 20 de xullo do 2018.
Artigo 3º
Este tramo emítese baixo a forma de obrigas da Xunta de Galicia representada mediante anotacións en contra, ó abeiro dos artigos 55 e seguintes da Lei 24/1988, do 28 de xullo, do mercado de valores, coas modificacións establecidas pola Lei 37/1998, do 16 de novembro, de reforma da anterior.
A emisión de débeda pública que autoriza a presente orde terá as características que se detallan a continuación:
-Importe do tramo: 17.500 millóns de pesetas.
-Data da emisión: 20 de xullo de 1998.
-Data de desembolso: 15 de decembro de 1998.
-Prezo ex-cupón: 104,845717.
-Prezo efectivo: prezo ex-cupón incrementado co cupón corrido ata a data do desembolso.
-Subscrición: será realizada directamente as entidades aseguradoras, actuando no nome propio ou por conta de terceiras persoas, o día 14 de decembro de 1998.
-Cupón: os cupóns anuais vencerán o 20 de xullo de cada ano. A Xunta de Galicia pagará no seu vencemento os cupóns polo seu importe líquido. Se o posuidor é un investidor non-residente que non opere en España mediante establecemento permanente, procederase á devolución de oficio das retencións practicadas, segundo procedemento establecido na resolución da Dirección Xeral de Política Financeira e do Tesouro desta consellería, con data do 22-10-1993 (DOG do 8-11-1993).
-Cotizacións: solicitarase a inscrición desta débeda pública á Central de Anotacións de Débeda Pública do Banco de España na forma prevista na Lei do mercado de valores e os demais preceptos legais aplicables na materia.
-Fiscalidade: de conformidade co previsto no artigo 14.5º da Lei orgánica 8/1980, do 22 de setembro, de financiamento das comunidades autónomas, esta emisión goza dos mesmos beneficios e condicións cá débeda pública do Estado.
-Amortización: dunha soa vez á par, ós vinte (20) anos desde a data da emisión.
-Tipo de xuro: 5,40 %.
-Liquidez: a entidade aseguradora garante durante a vida da emisión, a liquidez desta emisión.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 3 de decembro de 1998.
José Antonio Orza Fernández
Consellerio de Economía e Facenda
10831