A Comunidade Autónoma de Galicia, en virtude dos reais decretos 1634/1980, do 31 de xullo, sobre transferencias da Administración do Estado á Xunta de Galicia en materia de traballo, industria, comercio, sanidade, cultura e pesca (BOE do 9 de agosto); 2368/1984, do 19 de decembro, sobre valoración definitiva, ampliación de medios adscritos ós servicios traspasados e adaptación dos transferidos en fase preautonómica en materia de sanidade (BOE do 16 de xaneiro de 1985), e 1995/1985, do 9 de outubro, sobre traspaso de funcións e servicios da Administración do Estado á Comunidade Autónoma de Galicia en materia de sanidade (AISNA), (BOE do 14 de novembro), posúe a titularidade do inmoble situado na rúa Montevideo, 9, termo municipal de Lugo.

O Concello de Lugo solicitou da Consellería de Sanidade e Servicios Sociais a utilización dunha franxa de terreo que une a rúa Montevideo co Carril dos Fornos, con destino a apertura dunha vía pública de conexión das ditas vías.

A Consellería de Sanidade e Servicios Sociais, que ten na actualidade adscrito o inmoble, informou favorablemente a cesión solicitada, o que implica, á vista do disposto no artigo 24 do Decreto 50/1989, do 9 de marzo, polo que se aproba o Regulamento da Lei 3/1985, do 12 de abril, de patrimonio da Comunidade Autónoma de Galicia, a conformidade coa desafectación do dominio público da devandita parcela de terreo.

Mediante Decreto 149/1999, do 14 de maio (DOG nº 99, do 26 de maio), desafectouse do dominio público o antedito inmoble, logo do informe favorable da Consellería de Sanidade e Servicios Sociais.

Co obxecto de posibilita-la cesión do dito inmoble, requírese a previa declaración da súa alleabilidade, segundo o disposto nos artigos 24 da Lei 3/1985, do 12 de abril, do patrimonio da Comunidade Autó-

noma de Galicia e 60 do Decreto 50/1989, do 9 de marzo, polo que se aproba o Regulamento para a execución da antedita lei.

En virtude do anteriormente exposto, por proposta da Secretaría Xeral e do Patrimonio,

DISPOÑO:

Artigo único.-Declárase a alleabilidade da franxa de terreo de setecentos sesenta metros cadrados que se segregará do inmoble sito na rúa Montevideo, 9, termo municipal de Lugo, que linda ó norte, en liña aproximada de doce metros, coa rúa Montevideo; ó sur, en liña aproximada de once metros co Carril dos Fornos; ó leste, en liña aproximada de sesenta e catro metros, co edificio da antiga Delegación Provincial da Consellería de Sanidade e Servicios Sociais, e ó oeste, en liña aproximada de sesenta e oito metros, con Manuel Millares Cortón e máis de Benigno López Campo.

O dito terreo segregarase do predio matriz inscrito no Rexistro da Propiedade de Lugo nº 1 a nome da Comunidade Autónoma de Galicia, no tomo 698, libro 291, folio 150, predio número 21010, inscrición 3ª.

Santiago de Compostela, 3 de xuño de 1999.

P.D. (Orde 13-12-1993)

Emilio Álvarez Rey

Secretario xeral e do Patrimonio da Consellería de Economía e Facenda