Pola orde do 2 de decembro de 1996 (DOG nº 242, do 12 de decembro) convocouse o proceso selectivo para o acceso ás distintas categorías dos grupos I, II, III, IV e V, sendo elevadas a definitivas as propostas de aspirantes que o superaron mediante a Orde do 1 de decembro de 1998 (DOG nº 239, do 11 de decembro). Por todo o exposto e de acordo co disposto na base V da convocatoria, esta consellería

DISPÓN:

Convoca-los aspirantes que superaron os procesos selectivos para o acceso ás categorías: 30 do grupo I, 37 do grupo II, e 30 do grupo IV do persoal laboral

da Xunta de Galicia para a elección de destino, en único chamamento, no salón de actos pequeno da Consellería da Presidencia e Administración Pública, no edificio administrativo San Caetano en Santiago de Compostela, o día 29 de xullo de 1999 ás 10 horas.

Dentro de cada unha das categorías de cada grupo terán preferencia para a elección de destino os aspirantes da quenda de promoción interna e, dentro destes, a preferencia virá dada pola orde de prelación resultante do proceso selectivo.

Elixido o destino polos aspirantes da quenda de promoción interna, elixirán destino os da quedan libre segundo a súa orde de prelación.

Esta orde de prelación dos aspirantes e os destinos ofertados será a que figura para cada categoría no anexo desta convocatoria.

Os postos de traballo adxudicados terán a natureza de destino definitivo de acordo co disposto no artigo 7.2º do III convenio colectivo único para o persoal laboral da Xunta de Galicia.

Os aspirantes que non comparezan persoalmente poderán ser representados por terceiras persoas con poder notarial suficiente.

Ós aspirantes que non comparezan persoalmente ou por medio de representantes seranlles adxudicados en destino definitivo os postos que lles correspondan atendendo á orde de publicación destes e á orde de prelación obtida nos procesos selectivos, unha vez concluído o proceso de adxudicación dos postos ós aspirantes presentes ou representados, e entre os que quedaron sen adxudicar.

Os aspirantes que superasen o acceso a algunha das categorías que figuran nesta convocatoria para a elección de destino, e que estean prestando os seus servicios noutra categoría corpo ou escala da Xunta de Galicia, elixirán destino ou, de non facelo, pasarán á situación de excedencia voluntaria por incompatibilidade na categoría que superaron de acordo co artigo 26.4º do III convenio colectivo único para o persoal laboral da Xunta de Galicia. Neste último caso deberán presentarse ó chamamento cun certificado do responsable da unidade de persoal na que conste que o interesado presta os seus servicios na actualidade.

Contra esta orde, que esgota a vía administrativa, pódese interpoñer, con carácter potestativo, recurso de reposición perante o conselleiro da Presidencia e Administración Pública no prazo dun mes contado desde o día seguinte ó da publicación desta orde ou, directamente, o recurso contencioso-administrativo, no prazo de dous meses contados desde o día seguinte ó da súa publicación, á elección do demandante, do xulgado do contencioso-administrativo da circunscrición na que teña aquel o seu enderezo ou o da Coruña, conforme os artigos 8, 14 e 46 da Lei 29/1998, do 13 de xullo, reguladora da xurisdicción contencioso-administrativa, agás o persoal que accede pola quenda de promoción interna, que pode interpoñer reclamación previa á vía xurisdiccional laboral.

Santiago de Compostela, 16 de xullo de 1999.

Jaime Pita Varela

Conselleiro da Presidencia e Administración

Pública

Descrición dos códigos de postos

I. Consellerías.

A consellería á que pertence o posto está definida polos dous primeiros caracteres da columna «CÓDIGO» segundo o seguinte criterio:

AG.-Agricultura, Gandería e Política Agroalimentaria.

CU.-Cultura e Comunicación Social.

ED.-Educación e Ordenación Universitaria.

EF.-Economía e Facenda.

FA.-Familia, Promoción do Emprego Muller, e Xuventude.

IC.-Industria e Comercio.

OT.-Política Territorial, Obras Públicas e Vivenda.

PE.-Pesca, Marisqueo e Acuicultura.

PR.-Presidencia e Administración Pública.

SA.-Sanidade e Servicios Sociais.

XU.-Xustiza, Interior e Relacións Laborais.

ANEXO

Grupo I. Categoría 31 (titulado superior de formación ocupacional).

Vacantes ofertadas.

Grupo II. Categoría 37 (titulado medio de formación ocupacional).

Vacantes ofertadas.

Grupo IV. Categoría 30 (auxiliar de formación ocupacional).

Vacantes ofertadas.