En virtude do disposto no artigo 5 da Lei 3/1991, do 14 de xaneiro, de creación do Servicio Galego de Promoción da Igualdade do Home e da Muller, cada consellería do Goberno de Galicia nomeará como vocal do consello do devandito servicio un representante dela coa categoría de director xeral.
Realizado o nomeamento por cada unha das consellerías, e de conformidade co establecido na referida lei, cumpriu facelo público tendo en conta a nova estructura orgánica da Xunta de Galicia aprobada polo Decreto 347/1997, do 9 de decembro, pola Orde do 13 de marzo de 1998 (DOG nº 57, do 25 de marzo).
Non obstante, dado o falecemento de Manuel Barreiro Barbeito, secretario xeral, vocal representante da Consellería de Industria e Comercio e o cesamento de Mª José Cimadevila Cea como directora xeral de Relacións Laborais, vocal representante da Consellería de Xustiza, Interior e Relacións Laborais, e o seu nomeamento como secretaria xeral do mesmo departamento polos decretos 13/1999, do 5 de febreiro (DOG nº 25, do 8 de febreiro) e 15/1999, do 5 de febreiro (DOG nº 25, do 8 de febreiro) respectivamente, cómpre facer público os nomeamentos dos novos vocais que actuarán en representación das referidas consellerías e en substitución dos publicados na citada Orde do 13 de marzo:
-Jesús Vázquez San Luis, secretario xeral, en representación da Consellería de Industria e Comercio.
-Mª José Cimadevila Cea, secretaria xeral, en representación da Consellería de Xustiza, Interior e Relacións Laborais.
Santiago de Compostela, 10 de decembro de 1999.
Manuela López Besteiro
Conselleira de Familia e Promoción do Emprego,
Muller e Xuventude