Galego | Castellano

DOG - Xunta de Galicia -

Diario Oficial de Galicia
DOG Núm. 120 Mércores, 21 de xuño de 2000 Páx. 9.662

III. OUTRAS DISPOSICIÓNS

CONSELLERÍA DE AGRICULTURA, GANDERÍA E POLÍTICA AGROALIMENTARIA

ORDE do 9 de xuño de 2000 pola que se establecen axudas para mellora-la formación, xestión e consolidación do cooperativismo agrario en Galicia.

O asociacionismo e cooperativismo agrarios son instrumentos fundamentais que contribúen moi positivamente na continua modernización do sector agropecuario galego e na súa progresiva adaptación a un mercado cada vez máis amplo e esixente.

Numerosos estudios constatan que o apoio das administracións públicas favorece decisivamente o proceso investidor necesario para adapta-las entidades asociativas de carácter agropecuario á realidade actual, facéndoas máis competitivas e dotándoas dunha maior viabilidade e estabilidade económica.

En consecuencia, a Consellería de Agricultura, Gandería e Política Agroalimentaria considera interesante apoiar aquelas accións orientadas a incrementa-la formación cooperativa dos agricultores e gandeiros socios, así como a mellora-la xestión e os servicios prestados, mediante un maior coñecemento da súa realidade e posibilidades de futuro e a contratación do persoal necesario.

Por todo o exposto, en consoancia co establecido no artigo 30.I.1º e 3º do Estatuto de autonomía de Galicia, e no uso das facultades que me confire a Lei 1/1983, do 22 de febreiro, reguladora da Xunta e do seu presidente,

DISPOÑO:

I. Axudas para mellora-la formación cooperativa.

Artigo 1º.-Obxecto.

Mellora-la capacitación profesional e a formación empresarial do persoal e dos socios das cooperativas e sociedades agrarias de transformación (en diante

SAT), así como divulga-lo asociacionismo agrario nesta Comunidade Autónoma, mediante a realización de actividades formativas, fundamentalmente asistencia e organización de cursos, seminarios, xornadas técnicas e viaxes agrarias.

Artigo 2º.-Beneficiarios.

Poderán acceder a esta liña de axudas as cooperativas de carácter agropecuario, as de explotación comunitaria da terra e as SAT domiciliadas en Galicia.

Artigo 3º.-Condicionantes.

1. Poderanse subvenciona-las solicitudes de axuda para actividades de formación realizadas durante este ano, antes de publicarse esta orde, sempre que se cumpran as condicións esixidas nela. Excepcionalmente, admitiranse solicitudes para accións formativas iniciadas durante o último cuadrimestre de 1999 e que terminen durante o ano 2000, sempre que o período de inicio e a realización da actividade estean debidamente xustificados.

2. Nas resolucións de concesión especificarase o prazo para a realización das actividades de formación que se subvencionan, que en xeral, non excederá do 31 de outubro deste ano. O incumprimento do prazo concedido poderá levar consigo perda da subvención aprobada.

3. Os cursos que organicen as entidades asociativas destinados ós seus socios e familiares deberán ter unha duración mínima de 20 horas lectivas, dedicándolle alomenos un 20% do seu contido a temas relacionados directamente co asociacionismo agrario.

Artigo 4º.-Conceptos subvencionables e contía económica.

1. Poderanse subvenciona-los gastos derivados da:

a) Asistencia dos xerentes, técnicos e outros traballadores cualificados ó servicio das cooperativas e SAT a cursos especializados, seminarios, xornadas técnicas e viaxes agrarias formativas.

b) Organización e realización de cursos, seminarios, xornadas técnicas ou viaxes agrarias formativas por parte das cooperativas e SAT, destinados ó seu persoal, e sobre todo ós socios e demais membros da unidade familiar que teñan relación coas actuacións destas entidades.

c) Calquera outra actividade semellante que a Consellería de Agricultura, Gandería e Política Agroalimentaria considere de interese.

2. Para as anteditas actividades formativas establécense as seguintes subvencións:

a) A asistencia dos traballadores das cooperativas e SAT a cursos, seminarios e xornadas poderase apoiar ata o 80% dos gastos que se ocasionen por desprazamento, aloxamento e cotas de inscrición, cun máximo de 400.000 ptas. por persoa e curso.

b) A organización e realización de cursos, seminarios e xornadas poderase subvencionar ata o 80% dos custos efectivos do profesorado e do material didáctico necesario, cun máximo de 800.000 ptas. por curso.

c) Cando as entidades organicen viaxes agrarias formativas, o importe da subvención poderá cubrir ata o 50% dos gastos derivados, fundamentalmente desprazamento e aloxamento, coas seguintes limitacións máximas:

-15.000 ptas. por persoa e día de viaxe.

-100.000 ptas. por persoa que efectivamente realice a viaxe.

-2.500.000 ptas. por viaxe subvencionada.

3. A Dirección Xeral de Industrias e Alimentación, se o considera oportuno e en función das características e do programa dos cursos e das viaxes subvencionables, poderá establecer uns importes máximos auxiliables para cada capítulo de gastos, sen supera-los límites citados anteriormente.

Artigo 5º.-Documentación específica.

1. Ademais da documentación de carácter xeral requirida no artigo 38º, as solicitudes virán acompañadas como documentación específica, por unha memoria explicativa das actividades formativas que está previsto realizar, na que se faga referencia alomenos ós seguintes aspectos:

a) Motivación e obxectivos.

b) Persoal a quen van dirixidas.

c) Duración, datas, horario e lugares de celebración.

d) Programa, debidamente xustificado.

e) Número e relación de participantes.

f) Coordinador-responsable das actividades.

g) Profesorado, no caso de organización de cursos e xornadas.

h) Orzamento desagregado por partidas ou facturas pro forma.

i) Financiamento previsto.

2. Calquera modificación significativa que afecte ó desenvolvemento da actividade de formación aprobada: programa, horario, datas, lugar de celebración, etc., deberase comunicar obrigatoriamente ó Servicio de Fomento Asociativo, con antelación suficiente, para os efectos de control que se consideren oportunos. O incumprimento desta obriga poderá ser causa da revogación da axuda aprobada.

Artigo 6º.-Criterios de valoración.

Para a aprobación das solicitudes de axuda teranse en conta como criterios preferenciais:

-O interese das accións formativas que se vaian a realizar.

-A relación existente entre o programa e a actividade desenvolvida pola entidade solicitante.

-O número de participantes, que debe ser acorde co tipo de actividade formativa prevista.

-As garantías de cumprimento do programa previsto.

-O menor número de solicitudes de subvención, para os mesmos conceptos, que se lle concederon nos últimos tres anos.

-A proposta de asistencia dun técnico designado pola Administración.

Artigo 7º.-Xustificación da axuda.

Unha vez realizada a actividade de formación e comprobada a súa correcta execución, procederase ó pagamento da subvención. Para tal efecto, previamente as entidades beneficiarias deberán presentar:

a) Memoria-informe das accións formativas desenvolvidas, describindo aquelas incidencias e aspectos técnicos máis relevantes. Debe asinala o coordinador-responsable das actividades e o presidente da entidade.

b) Relación definitiva de tódolos participantes, cos seus correspondentes datos persoais, así como do profesorado.

c) Xustificación dos gastos efectuados, mediante facturas e recibos orixinais ou as súas copias compulsadas, perfectamente detallados e clasificados por capítulos.

d) Copia compulsada da transferencia bancaria, certificación ou calquera outro documento similar que acredite o seu pagamento.

II. Axudas para a realización de auditorías, análises de xestión, estudios de viabilidade e estudios de mercado.

Artigo 8º.-Obxecto.

O obxecto desta liña de axudas é dobre:

-Que as entidades asociativas agrarias regularicen a súa contabilidade e coñezan o mellor posible a súa situación económica real, mellorando a xestión empresarial e facéndoa máis transparente ante os socios, mediante a realización de auditorías e análises de xestión.

-Que as entidades asociativas agrarias analicen as súas posibilidades e perspectivas de futuro, a conveniencia de pór en marcha novos servicios e actividades, o coñecemento do mercado e do seu contorno e a mellora da comercialización das súas produccións, mediante a elaboración de estudios de viabilidade e de estudios de mercado.

Artigo 9º.-Beneficiarios.

Poderán acceder a esta axuda as cooperativas de carácter agropecuario, as de explotación comunitaria da terra e as SAT con domicilio social en Galicia.

Artigo 10º.-Condicionantes.

1. As auditorías e análises de xestión deben ser realizadas por censores xurados de contas ou auditores rexistrados oficialmente. No caso dos estudios de viabilidade e de mercado, serán realizados por técnicos competentes na materia, colexiados e con experiencia suficiente.

2. Os informes das auditorías e análises de xestión e as conclusións dos estudios, conxuntamente cos dictames efectuados, deberanse explicar con claridade ó conxunto dos socios na primeira asemblea xeral que teña lugar con posterioridade á súa realización. Esta exposición detallada ante o socio recollerase expresamente na acta da devandita sesión plenaria.

3. O prazo para face-las auditorías e os estudios, así como a súa exposición ós socios, remata o 31 de outubro deste ano.

4. A entidade solicitante deberá ter alomenos 50 socios ou facturar como mínimo 50.000.000 de ptas.

Artigo 11º.-Conceptos subvencionables e contía económica.

1. Son subvencionables as auditorías, análises de xestión, estudios de viabilidade e estudios de mercado que se realicen de acordo co establecido nesta orde.

2. A contía da subvención poderá chegar ata o 70% do seu custo, cun máximo de 1.500.000 ptas. por auditoría, análise ou estudio realizado.

Artigo 12º.-Documentación específica.

Presentarase a documentación xeral que se establece no artigo 38º, e a documentación específica que se detalla seguidamente:

a) Memoria xustificativa.

b) Orzamento ou facturas pro forma.

c) Identificación e cualificación do equipo técnico realizador.

Artigo 13º.-Criterios de valoración.

Para a aprobación desta axuda teranse en conta preferencialmente:

-As razóns expostas na memoria xustificativa.

-Que as entidades solicitantes teñan como actividade principal a transformación e comercialización dos productos dos seus socios.

-Que as entidades inicien novas actividades ou servicios.

-A dimensión socioeconómica da entidade solicitante.

Artigo 14º.-Xustificación da axuda.

1. Para proceder ó pagamento das subvencións concedidas será necesario que as entidades beneficiarias xustifiquen os gastos realizados mediante facturas orixinais ou as súas copias compulsadas.

Achegarase copia compulsada da transferencia bancaria, certificación expedida polo equipo técnico realizador ou calquera outro documento similar que acredite o pagamento das devanditas facturas.

2. Ademais, para a xustificación dos gastos será necesario presenta-la seguinte documentación:

-Copia dos informes de auditoría e análises de xestión, e copia dos estudios de viabilidade e de mercado que se subvencionaron, así como das conclusións e dictames resultantes.

-Copia compulsada ou certificación da acta da sesión plenaria, na cal se lles explicase ós socios con claridade os estudios, auditoría e informes realizados.

3. O Servicio de Fomento Asociativo da Dirección Xeral de Industrias e Alimentación, á vista da documentación xustificativa que segundo este artigo é necesario presentar, valorará se as análises de xestión, auditorías, estudios de viabilidade e estudios de mercado realizados se axustan ó inicialmente solicitado, con base no que se describe na memoria e demais documentación que se xunta á solicitude. De non ser así, emitirá informe ó respecto, que poderá considerarse condicionante para a determinación do importe final da axuda concedida.

III. Axudas para a informatización.

Artigo 15º.-Obxecto.

Lograr que a xestión empresarial das entidades asociativas agrarias sexa máis eficaz, moderniza-los procedementos de xestión técnico-administrativa e incrementa-la prestación de servicios ós seus socios, mediante a adquisición de equipos e programas informáticos e de fotocopiadora.

Artigo 16º.-Beneficiarios.

Poderán acollerse as cooperativas de carácter agropecuario, as cooperativas de explotación comunitaria da terra e as SAT con sede social na Comunidade Autónoma de Galicia.

Artigo 17º.-Condicionantes.

1. Só se subvencionarán as entidades que soliciten por primeira vez ou as que poñan en marcha novas iniciativas, actividades ou servicios que permitan xustifica-los investimentos que se van realizar.

2. A entidade solicitante deberá ter alomenos 50 socios ou facturar como mínimo 50.000.000 de ptas. No caso das entidades de nova creación non se esixirán estes límites.

3. A adquisición de equipos deberase realizar antes do 30 de setembro deste ano.

Artigo 18º.-Conceptos subvencionables e contía económica.

1. Poderase subvenciona-la adquisición de equipos e programas informáticos e de fotocopiadora.

2. A contía da subvención poderá chegar ata o 50% do seu custo, sen supera-los seguintes límites máximos:

-Equipos e programas informáticos: 2.000.000 de ptas.

-Fotocopiadoras: 300.000 ptas.

3. Excepcionalmente, estes límites poderanse superar cando se xustifique que se trata de proxectos de investimento que realizan conxuntamente varias entidades asociativas, ou que o investimento que se vai facer en equipos e programas informáticos repercute en beneficio de tres ou máis cooperativas.

Artigo 19º.-Documentación específica.

Para solicitar esta axuda é necesario presenta-la documentación xeral establecida no artigo 38º desta orde, así como a documentación específica seguinte:

a) Relación e características dos equipos informáticos que posúe a entidade.

b) Memoria xustificativa da necesidade e aplicación dos equipos e programas informáticos ou da fotocopiadora que se pretenden adquirir, en resposta ó esixido no punto 1 do artigo 17º.

c) Especificación das características técnicas dos novos equipos.

d) Orzamento ou facturas pro forma.

Artigo 20º.-Criterios de valoración.

Para a concesión desta axuda teranse en conta como criterios preferenciais:

-As razóns expostas na memoria xustificativa.

-A dimensión socioeconómica da entidade solicitante.

-O menor número de solicitudes de subvención e o seu importe, para os mesmos conceptos, que se lle concederon nos últimos tres anos.

Artigo 21º.-Xustificación da axuda.

Para efectua-lo pagamento da axuda concedida será necesario que as entidades beneficiarias xustifiquen os gastos realizados, mediante facturas orixinais ou as súas copias compulsadas.

Tamén se deberá presentar copia compulsada da transferencia bancaria, certificación expedida pola empresa subministradora ou calquera outro documento similar que acredite o pagamento das referidas facturas.

IV. Axudas para a contratación de persoal.

Artigo 22º.-Obxecto.

Mellorar e profesionaliza-la xestión empresarial das entidades asociativas, fortalece-las súas estructuras productivas e comerciais tanto técnica como funcionalmente, realizar novas actividades e ofrecer máis servicios, mediante a contratación de persoal para cubrir novos postos de traballo que sexa necesario crear.

Artigo 23º.-Beneficiarios.

Poderán acceder a esta axuda:

1. As cooperativas de carácter agropecuario e as SAT con domicilio social en Galicia que contraten persoal para xerencia, traballos técnicos, especia

listas e outros traballadores, incluídos os axentes de substitución.

2. As cooperativas de carácter agropecuario domiciliadas en Galicia que contraten un coordinador de programas de formación ou de intercooperación, sempre que os devanditos programas sexan compartidos alomenos por tres entidades.

A solicitude deberá presentala unha das cooperativas en nome de tódalas demais, cando existan entre si vínculos legais de índole asociativa. De non ser así, deberán designar a unha delas como representante das demais, obrigándose todas solidariamente a cumpri-los compromisos contraídos e o establecido ó respecto nesta orde.

Artigo 24º.-Condicionantes.

1. A contratación de persoal entenderase subvencionable cando se dean alomenos algunha das seguintes circunstancias:

-Que sexa o primeiro posto de traballo.

-Que a entidade poña en marcha novas actividades ou servicios que impliquen a creación de novos postos de traballo.

-Que signifique un incremento neto do seu cadro de persoal, como consecuencia do seu crecemento productivo.

2. A entidade solicitante deberá ter alomenos 50 socios ou facturar como mínimo 50.000.000 de ptas. No caso das entidades de nova creación non se esixirán estes límites.

3. Serán subvencionables todas aquelas contratacións de persoal que se realicen entre o 1 de outubro de 1999 e o 30 de setembro do ano 2000, como datas límite para a formalización do contrato.

4. Pola súa tipoloxía, os contratos subvencionables deberán ser de carácter indefinido ou de duración determinada por obra ou servicio determinado.

5. En xeral, as axudas para os postos de traballo creados concédense para o primeiro ano de contrato, aínda que se poderán prorrogar ata tres anos de duración. A solicitude e concesión de prórroga farase cada ano ó abeiro da orde de axudas correspondente.

6. A duración do contrato deberá ser superior alomenos nun ano ó período de tempo subvencionado, excepto no caso dos axentes de substitución e dos coordinadores de programas de formación ou de intercooperación.

7. Cando se produza a rescisión dun contrato para o que se concedeu subvención, procederase á substitución do traballador no prazo máximo dun mes, en similares condicións ás inicialmente aprobadas, para seguir tendo dereito á axuda concedida.

Os datos do substituto e a copia compulsada do novo contrato remitiranse no prazo máis breve posible á Dirección Xeral de Industrias e Alimentación.

Artigo 25º.-Conceptos subvencionables e contía económica.

1. Poderanse subvenciona-las retribucións económicas dos traballadores contratados ó abeiro desta

liña de axudas durante o primeiro ano de duración da contratación. Terase en conta o establecido no contrato, así como os conceptos e contías incluídos nas súas nóminas.

A subvención aprobada non comprenderá en ningún caso as cotizacións á Seguridade Social que lle correspondan á entidade contratante.

2. Contía económica e limitacións:

a) En xeral, o importe da subvención poderá chegar ata o 70% das retribucións económicas do primeiro ano de contrato. Se se prorroga a contratación, a axuda poderá chegar ata o 60% no segundo ano e ata o 50% no terceiro.

b) No caso dos coordinadores de programas de formación ou de intercooperación, a subvención non superará o 90% das retribucións económicas do primeiro ano. Se se concede prórroga, non superará o 70% no segundo ano nin o 50% no terceiro.

c) As retribucións económicas subvencionables deberán estar en consonancia cos cometidos e co nivel do posto de traballo desenvolvido. As subvencións concedidas non poderán supera-los seguintes límites:

-Xerentes e técnicos: 3.500.000 ptas.

-Coordinadores de formación e intercooperación: 3.500.000 ptas.

-Axentes de substitución e persoal especializado: 2.500.000 ptas.

-Outro persoal: 1.500.000 ptas.

Artigo 26º.-Documentación específica.

Ademais da documentación de carácter xeral que se detalla no artigo 38º desta orde, é necesario presenta-la documentación específica seguinte:

a) Memoria xustificativa sobre a necesidade, cometidos, características e viabilidade das contratacións que se pretenden realizar.

b) Orzamento anual de contratación.

c) Data prevista de contratación e duración.

Se posteriormente non fose posible a contratación na data preestablecida, comunicarase á Dirección Xeral de Industrias e Alimentación a intención de pospoñela, indicando as circunstancias que motivan o atraso e sinalando a nova data de formalización do contrato.

d) Compromiso formal de mante-lo posto de traballo que se crea durante o tempo mínimo que se fixa nesta orde, segundo cada caso.

e) Compromiso formal sobre as condicións de substitución, en caso de rescisión do contrato de traballo antes de finaliza-lo período de duración establecido.

f) Copia compulsada dos TC1 e TC2 do mes de setembro de 1999, especificando o nome completo dos traballadores que se corresponden cos códigos do TC2.

g) No caso dos coordinadores, acreditación dos vínculos ou compromisos entre as cooperativas participantes.

Artigo 27º.-Criterios de valoración.

1. Para a concesión desta axuda terán preferencia as solicitudes presentadas polas cooperativas e SAT que:

-Soliciten por primeira vez.

-Poñan en marcha novas actividades ou servicios.

-Incrementen significativamente o seu cadro de persoal.

2. En canto ós postos de traballo que se crean, consideraranse preferenciais os postos de xerentes, coordinadores, técnicos, axentes de substitución, administración, especialistas e outros traballadores, por esta orde.

3. Tamén se terán en conta os seguintes criterios de preferencia:

-A tipoloxía dos contratos, con prevalencia para os de carácter indefinido.

-As razóns expostas na memoria xustificativa e a viabilidade da contratación.

-A dimensión social e económica da entidade solicitante.

-O coñecemento do cooperativismo que acredite o persoal contratado.

Artigo 28º.-Xustificación da axuda.

1. Para poder realiza-lo pagamento das subvencións concedidas será necesario xustificar debidamente os gastos efectuados, mediante:

-Copia compulsada das nóminas pagadas pola entidade ó novo persoal contratado.

-Copia compulsada dos TC1 e TC2 correspondentes ó período xustificado.

2. Coa primeira liquidación, tamén se achegará a documentación seguinte:

-Copia do DNI ou NIF do novo persoal contratado.

-Copia compulsada do contrato ou contratos, nos que deben figura-los datos persoais e profesionais dos traballadores.

-Copia compulsada do título académico ou certificación da entidade en conforme o traballador ten cualificación suficiente para desempeña-lo posto creado.

3. A partir do primeiro pagamento iranse facendo sucesivas liquidacións da axuda, por trimestres naturais, para as que é necesario previamente presenta-las nóminas, TC1 e TC2 correspondentes.

4. As contratacións de persoal, por razón da súa duración, adoitan culminar máis alá do propio exercicio orzamentario, polo cal o gasto correspondente terá carácter plurianual.

V. Axudas para actuacións relacionadas coa calidade.

Artigo 29º.-Obxecto.

Mellora-la competitividade das cooperativas e SAT galegas, mediante a incentivación e o fomento da implantación de sistemas de xestión da calidade e de xestión ambiental, incluída a súa certificación.

Artigo 30º.-Beneficiarios.

Poderán acollerse a esta liña de axudas as cooperativas de carácter agropecuario e SAT domiciliadas en Galicia.

Artigo 31º.-Condicionantes.

1. Para que as entidades asociativas agrarias poidan beneficiarse desta liña de axudas é imprescindible que rematen o proceso de implantación das normas de calidade elixidas e obteñan a correspondente certificación acreditativa.

2. Poderanse subvenciona-las solicitudes de axuda para actuacións relacionadas coa calidade, sempre que o proceso de implantación e acreditación remate antes do 31 de outubro do ano 2001.

Cando, en función da súa complexidade, non sexa posible finalizar durante este prazo, a Dirección Xeral de Industrias e Alimentación poderá conceder unha única prórroga por un período máximo dun ano (ata o 31 de outubro de 2002), logo de solicitude ó respecto da entidade interesada.

3. A empresa de consultoría externa deberá estar acreditada e ter suficiente experiencia na realización de procesos similares.

4. Non se subvencionará a renovación de certificados.

Artigo 32º.-Conceptos subvencionables e contía económica.

1. Poderanse subvencionar:

a) Estudios previos sobre o interese da implantación. Neste caso non é obrigatorio cumpri-lo establecido no punto 1 do artigo anterior.

b) Gastos da entidade asociativa de carácter agropecuario que se produzan e sexan necesarios como consecuencia da implantación dos sistemas de xestión da calidade e de xestión ambiental.

c) Gastos de consultoría externa para elabora-la documentación básica dos sistemas de calidade, así como para asesoramento e supervisión da súa implantación.

d) Gastos derivados da certificación: auditorías de control, concesión, rexistro e emisión de certificados.

2. A contía da subvención poderá chegar ata o 50% dos gastos subvencionables, cos seguintes importes máximos:

-250.000 ptas., no caso dos gastos recollidos na letra a).

-2.500.000 ptas., para os gastos da letra b), salvo que o interese e a excepcionalidade do proxecto de implantación aconsellen superar este límite.

-750.000 ptas., para os gastos da letra c).

-750.000 ptas., para os gastos da letra d).

Artigo 33º.-Documentación específica.

Presentarase a documentación xeral que se detalla no artigo 38º desta orde e a documentación específica seguinte:

a) Memoria xustificativa presentada pola cooperativa ou SAT, onde conste a súa actividade, historial con indicación dos feitos máis significativos, volume de facturación, número de empregados e as súas tarefas, instalacións, estructura organizativa, productos que comercializa, clientes e mercados que atende, situación actual da producción, previsións futuras e interese da acreditación.

b) Memoria descritiva do proxecto de implantación de normas de calidade e a súa acreditación, que conteña as actividades que se van realizar e os obxectivos previstos, así como tódolos elementos significativos para a avaliación do proxecto.

c) Programa de investimento e orzamento ou facturas pro forma, desagregando por capítulos de gastos os investimentos que se van realizar nos anos 2000 e 2001.

d) Prazo de execución do proxecto e cadro de resultados previstos.

e) Memoria de presentación da empresa de consultoría externa, onde se indique a súa organización, metodoloxía e experiencia en procesos similares.

Artigo 34º.-Criterios de valoración.

Para a aprobación desta axuda consideraranse os seguintes criterios de preferencia:

-Aplicación práctica do proxecto de implantación de normas de calidade e a súa acreditación no relanzamento e previsións futuras da entidade.

-Carácter innovador, en canto á achega de coñecementos ou habilidades inexistentes ou inusuais, que no seu conxunto repercutan favorablemente na entidade e nos seus socios.

-Coherencia do proxecto coa estructura socioeconómica da cooperativa ou SAT solicitante.

-Que a entidade solicitante realice procesos de transformación de materias primas mediante unha industria de carácter agrario, así como a posterior comercialización dos productos resultantes.

Artigo 35º.-Xustificación da axuda.

1. Para proceder ó pagamento das subvencións concedidas será necesario que as entidades beneficiarias xustifiquen os gastos realizados, mediante facturas orixinais ou as súas copias compulsadas.

Tamén se achegará copia compulsada da transferencia bancaria, certificacións expedidas pola empresa consultora ou pola entidade de acreditación, ou calquera outro documento similar que acredite o pagamento das devanditas facturas.

2. Ademais, coa xustificación dos gastos presentarase a seguinte documentación:

-Informe técnico ou memoria xustificativa, na que se describa a realización do proxecto de acreditación e se recollan as incidencias máis significativas que ocorreron na súa execución.

-Copia compulsada dos certificados de acreditación obtidos unha vez rematado o proceso de implantación das normas de calidade elixidas.

3. O Servicio de Fomento Asociativo da Dirección Xeral de Industrias e Alimentación, á vista da documentación xustificativa presentada, valorará se a implantación das normas de calidade e os gastos derivados están acordes co inicialmente previsto nas solicitudes de axuda aprobadas. De non ser así, emitirá informe ó respecto, que se poderá considerar condicionante para determina-lo importe final da subvención concedida.

4. As actuacións necesarias para a implantación das normas de calidade e a súa acreditación, por razóns da súa duración, acostuman a culminar máis alá do propio exercicio orzamentario, polo cal o gasto correspondente terá carácter plurianual.

5. Poderanse facer pagamentos anuais da axuda concedida, inferiores a 5.000.000 de ptas., por fases ou capítulos, de acordo coa clasificación dos conceptos subvencionables recollida no artigo 32º.1, que se considerarán aboados á conta da axuda total concedida.

VI. Disposicións xerais.

Artigo 36º.-Solicitudes.

1. As solicitudes de axuda presentaranse segundo o modelo adxunto, que se compón dos seguintes anexos:

-Anexo I: instancia de solicitude.

-Anexo II: relación das liñas de axuda solicitadas.

-Anexo III: relación da documentación que se xunta.

2. As solicitudes deben vir debidamente cubertas e asinadas polo presidente ou polo representante legal da entidade peticionaria. Os anexos é imprescindible cubrilos correctamente na súa totalidade.

Xuntaráselle-la documentación que se detalla nesta orde, tanto de carácter xeral como específica, para cada liña de axudas. A documentación que sexa coincidente para varias liñas de axuda só se presentará unha vez.

3. As solicitudes dirixiranse ó conselleiro de Agricultura, Gandería e Política Agroalimentaria. Presentaranse preferentemente no rexistro xeral desta consellería nos servicios centrais, ou do xeito previsto no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

Artigo 37º.-Prazo de presentación.

1. As solicitudes de subvención presentaranse no prazo de trinta días naturais, contados a partir do

día seguinte ó da publicación desta orde no Diario Oficial de Galicia.

2. En xeral, pódense solicita-las subvencións que se establecen nesta orde para as accións realizadas desde o 1 de xaneiro do ano 2000, coas excepcións previstas nos artigos 3º.1 e 24º.3, previamente á súa publicación no Diario Oficial de Galicia, sempre que se cumpran as condicións que nela se esixen.

Artigo 38º.-Documentación xeral.

As solicitudes débense presentar xunto coa documentación específica que se detalla nesta orde para cada liña de axudas, e coa documentación de carácter xeral que a continuación se cita:

a) Copia compulsada ou certificación da acta da reunión do consello rector, segundo o modelo anexo IV, na que se:

-Aproba realiza-las accións para as que se vai a pedir subvención.

-Acorda solicita-la subvención.

-Autoriza a persoa encargada dos trámites.

b) Informe xeral sobre a entidade solicitante, segundo o modelo anexo V, debidamente cuberto.

c) Copia compulsada do CIF.

d) Copia completa da declaración do imposto de sociedades correspondente ó último exercicio económico. No caso das cooperativas de nova constitución, presentarán copia do impreso de alta no imposto de actividades económicas.

e) Certificacións, segundo o modelo anexo VI, sobre os seguintes aspectos:

-Cumprimento dos requisitos necesarios para acollerse a esta orde de axudas, así como das obrigas e compromisos que nela se establecen.

-Autenticidade dos datos facilitados e da documentación presentada.

-Compromiso de facilita-la documentación complementaria que se poida requirir, así como de permiti-las comprobacións e inspeccións que para o efecto esta administración considere oportunas.

-Compromiso de non beneficiarse de ningunha outra subvención procedente de entidades públicas para os mesmos fins para os que se solicita axuda ó abeiro desta orde.

f) Certificación bancaria do número de conta.

Artigo 39º.-Tramitación.

As unidades administrativas receptoras remitirán no prazo máis breve posible as solicitudes de axuda recibidas á Dirección Xeral de Industrias e Alimentación, para que o servicio competente comprobe se a solicitude e a documentación presentada reúnen os requisitos esixidos nesta orde.

Se os impresos de solicitude non están debidamente cubertos, se non se achega a documentación establecida ou se o expediente presenta defectos corrixibles, requirirase o interesado para que nun prazo máximo de dez días emende os erros ou pre

sente os documentos preceptivos, coa advertencia de que de non facelo terase por desistido da súa petición e arquivarase a solicitude, logo de resolución dictada nos termos previstos no artigo 42º, de conformidade co disposto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

Artigo 40º.-Resolución.

1. Unha vez examinadas as solicitudes e considerados os criterios de preferencia establecidos para cada liña de axudas, elaborarasen as propostas de resolución, que o director xeral de Industrias e Alimentación remitirá para a súa fiscalización á Intervención Delegada desta consellería.

Unha vez fiscalizadas, elevaranse as propostas de resolución ante o conselleiro de Agricultura, Gandería e Política Agroalimentaria, como órgano competente para resolver.

2. Seguidamente notificaráselles ás entidades asociativas beneficiarias a resolución de concesión da subvención e o seu importe previsto, segundo as normas e criterios establecidos nesta orde, e en función das solicitudes presentadas e da dotación orzamentaria existente. De todas formas o pagamento queda supeditado á súa correcta xustificación.

3. O prazo para resolver será de seis meses, contados desde a data de publicación desta orde no Diario Oficial de Galicia. As solicitudes entenderanse desestimadas unha vez transcorrido o devandito prazo sen recaer resolución expresa.

Artigo 41º.-Incompatibilidade.

As subvencións reguladas pola presente orde son incompatibles con calquera outra axuda procedente das administracións públicas que se conceda para os mesmos obxectivos e investimentos.

A vulneración deste precepto dará lugar á perda da subvención concedida.

Artigo 42º.-Financiamento.

A concesión das axudas previstas nesta orde realizarase con cargo ás aplicacións orzamentarias 09.04.714-A.770.1 «Apoio a entidades asociativas», e 09.04.615-A.770.0 «Ordenación de produccións e mercados agrarios», dos orzamentos xerais da Comunidade Autónoma de Galicia para o ano 2000, dotadas respectivamente cuns importes de cento cincuenta millóns de pesetas, (150.000.000 de ptas.), e dez millóns de pesetas, (10.000.000 de ptas.), así como con outros remanentes que puidesen existir nas mesmas aplicacións.

Artigo 43º.-Xustificación e pagamento.

1. A xustificación do gasto correspondente ás accións subvencionables para cada unha das liñas de axuda reguladas nesta orde, deberase realizar dentro do prazo que se estableza para o efecto na resolución de concesión da subvención.

O incumprimento deste prazo poderá implica-la perda da subvención concedida, sen necesidade de aviso ou notificación ningunha ás entidades asociativas beneficiarias.

2. Con carácter excepcional, a Dirección Xeral de Industrias e Alimentación poderá modifica-los prazos establecidos para a tramitación e xustificación das liñas de axuda contempladas nesta orde, cando así o soliciten as entidades interesadas e sempre que o motiven debidamente.

3. A xustificación do gasto efectuarase directamente ante o Servicio de Fomento Asociativo (Consellería de Agricultura, Gandería e Política Agroalimentaria, edificios administrativos de San Caetano, Santiago de Compostela).

4. As subvencións concedidas faranse efectivas mediante pagamentos nominativos a favor das cooperativas e SAT beneficiarias, unha vez que acrediten debidamente as actividades e gastos realizados, de acordo co que se especifica para cada liña de axudas no texto desta orde e na correspondente resolución de concesión.

En todo caso, as facturas que se presenten para xustifica-los gastos realizados deberán trae-lo IVE desagregado correctamente e virán acompañadas da transferencia bancaria, certificación ou calquera outro documento que acredite que xa están pagadas.

5. Para proceder ó pagamento da subvención concedida é imprescindible que previamente a entidade beneficiaria presente a seguinte documentación de carácter xeral:

a) Certificación da entidade, na que se detalle a súa aceptación expresa da subvención nos termos en que se lle concedeu.

b) Certificación de non ter débedas por ningún concepto, pendentes de pagamento, coa Administración pública desta comunidade autónoma.

c) Certificación de estar ó día no pagamento das obrigas fiscais.

d) Certificación de estar ó día no pagamento da Seguridade Social.

e) Certificación de tódalas axudas solicitadas ante as distintas administracións públicas para os mesmos fins establecidos nesta orde, tanto as concedidas como as pendentes de resolución. Esta certificación debe vir asinada polo presidente da cooperativa ou SAT.

6. Coa resolución de concesión das subvencións que se regulan nesta orde poderase solicitar documentación adicional de carácter complementario que se considere necesaria para a xustificación, seguimento e control destas axudas.

7. O importe final das axudas concedidas calcularase en función das facturas e demais xustificantes e documentación que se presente ó respecto, unha vez descontado o IVE. Se os gastos totais xustificados son inferiores ós orzados e admitidos, practicarase

a reducción proporcional correspondente, sempre que se cumprisen os obxectivos previstos.

Artigo 44º.-Seguimento e control.

1. Ante a complexidade e diversidade desta orde de axudas, será obrigatorio que as entidades beneficiarias comuniquen á Dirección Xeral de Industrias e Alimentación calquera circunstancia ou eventualidade que poida afectar substancialmente ó destino ou correcta aplicación da subvención concedida.

2. Toda alteración das condicións tidas en conta para a concesión da subvención, incluída a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.

3. Así mesmo, deberán permitir que a devandita dirección xeral realice as comprobacións e inspeccións que considere oportunas co fin de comproba-la veracidade dos datos e da documentación presentada, así como o lóxico seguimento e control das axudas concedidas. Tamén facilitarán toda a información que lle sexa requirida pola Intervención Xeral da Comunidade Autónoma, o Tribunal de Contas e o Consello de Contas, no exercicio das súas funcións de fiscalización e control do destino das axudas.

4. As entidades beneficiarias quedan obrigadas ó reintegro, total ou parcial, da subvención ou axuda pública percibida, no suposto de incumprimento das condicións establecidas para a súa concesión.

5. No caso de que as cooperativas e SAT beneficiarias destas axudas non cumpran os requisitos e fins fixados nesta orde, aplicaráselle-lo establecido no artigo 7 da Lei 8/1999, do 30 de decembro, de medidas fiscais e orzamentarias e de función pública e actuación administrativa.

Artigo 45º.-Réxime de recursos.

A convocatoria desta axuda, as súas bases e todos cantos actos administrativos se deriven dela, poderán ser impugnados polos interesados nos casos e na forma establecidos na Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

Disposicións derradeiras

Primeira.-Facúltase o director xeral de Industrias e Alimentación da Consellería de Agricultura, Gandería e Política Agroalimentaria para que, no ámbito das súas competencias, dicte as normas necesarias para a correcta aplicación, desenvolvemento e cumprimento desta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 9 de xuño de 2000.

Cástor Gago Álvarez

Conselleiro de Agricultura, Gandería e Política

Agroalimentaria