Examinado o expediente instruído por pedimento de Energía Ambientales, S.A. (Easa), con enderezo para efectos de notificacións en Bugallal Marchesi, 10-1º esq., 15008 A Coruña, sobre autorización das instalacións do parque eólico denominado Monte Redondo, resultan os seguintes

Antecedentes de feito.

Primeiro.-O 3 de marzo de 2000, Ignacio Aguiriano Ramudo, en nome e representación de Easa, solicitou a autorización administrativa, declaración de utilidade pública e aprobación do proxecto de execución, do parque eólico denominado Monte Redondo, de 49,5 MW, achegando a documentación establecida para o efecto polo Decreto 2617/1966, do 20 de outubro, sobre autorización de instalacións eléctricas e o Decreto 205/1995, do 6 de xullo, polo que se regula o aproveitamento da enerxía eólica na Comunidade Autónoma de Galicia.

Segundo.-O proxecto coas características fundamentais da instalación e a relación concreta e individualizada de bens e dereitos afectados someteuse á información pública por Resolución do 21 de marzo de 2000, para os efectos previstos nos decretos 2617/1966, xa mencionado, 2619/1996, sobre expropiación forzosa e sancións en materia de instalacións eléctricas, artigos 53 e 54 da Lei 54/1997, do 27 de novembro, do sector eléctrico, artigo 25 da Lei 10/1995, de ordenación do territorio de Galicia e Decreto 205/1995 citado. A resolución publicouse nos seguintes medios: o diario El Ideal Galle

go, do 31 de marzo de 2000, no BOP da Coruña, do 7 de abril de 2000, no Diario Oficial de Galicia do 18 de abril de 2000 e no taboleiro de anuncios do Concello de Vimianzo, e deuse coñecemento ós afectados mediante a oportuna notificación individual.

Terceiro.-Durante o período de información pública presentáronse as seguintes alegacións:

1. Andrés Carballo, en representación da Comunidade de Veciños de La Gándara, e titulares dos predios nº 28, 31, 187, 302 e 303, incluídos na relación de afectados polo parque, reivindica tamén a titularidade do predio nº 32, que na relación de propietarios figura a nome de Juan Castro Gándara, presidente da Comunidade de Veciños de Ogas.

2. Salvador Vázquez Gándara, en representación de Balbina Gándara Varela e Mª Pilar Gándara Varela, titulares do predio nº 333, solicita que se lle aclare exactamente a afección ó predio das súas representadas.

3. O Concello de Vimianzo, pola súa parte, manifesta:

-Que a normativa urbanística do concello é contraria á instalación do proxecto do parque, ó situarse nunha zona altamente protexida, tanto polo seu valor paisaxístico, como histórico.

-Que no estudio de impacto ambiental non se analiza o impacto acústico que vai producir nos lugares próximos e que non se achegan medicións reais, así como produce un importantísimo impacto electromagnético e paisaxístico.

Cuarto.-O 25 de setembro de 2000, a Dirección Xeral de Calidade e Avaliación Ambiental resolveu aproba-la declaración de efectos ambientais do citado parque eólico, reducíndose o número de aeroxeradores de 66 a 63, dado que se considera os aeroxeradores nº 37, 38 e 39, na súa actual posición non son compatibles coa defensa dos valores ambientais existentes así como os accesos proxectados para este.

Quinto.-O 24 de novembro de 2000, a Dirección Xeral de Industria resolveu autoriza-la instalación dos equipos electromecánicos da primeira fase do parque eólico denominado Monte Redondo, para unha potencia de 47,25 MW, e aproba-lo correspondente proxecto de execución, coas seguintes características básicas:

Situación e coordenadas poligonais:

Nº de aeroxeradores63

Potencia unitaria por aeroxerador750 kW

Potencia total instalada47, 25 MW

Producción anual estimada131.423 MWh/ano

Investimento previsto7.425.000.000 ptas.

Características técnicas da infraestructura eléctrica de transformación e interconexión:

-63 aeroxeradores, mod. Ecotecnia 48/750, de 750 kW de potencia, montados sobre torres metálicas troncocónicas de 55 m de altura e rotores de 3 pas de 48 m de diámetro.

-Liñas de media tensión subterráneas para evacuación de enerxía a 20 kV, de interconexión entre centros de recollida de media tensión e subestación transformadora 20/66 kV.

-Subestación transformadora 20/66 kV para evacuación de enerxía, composta por un transformador principal 20/66 kV de 50 MVA de potencia nominal e un transformador para servicios auxiliares 20/0,4 kV de 100 kVA de potencia nominal cos correspondentes equipos de control, seccionamento, manobra, medida e protección.

Fundamentos de dereito.

Primeiro.-A Consellería de Industria e Comercio é competente para resolver este expediente con fundamento no Estatuto de autonomía de Galicia, o Real decreto 2563/1982, de 24 de xullo, o Decreto 132/1982, de 4 de novembro, e o Decreto 99/1998, de 26 de marzo, polo que se establece a estructura orgánica da Consellería de Industria e Comercio, en relación coa Lei 54/1997, de 27 de novembro, do sector eléctrico e o Decreto 205/1995, polo que se regula o aproveitamento da enerxía eólica na Comunidade Autónoma de Galicia.

Segundo.-Á vista das alegacións presentadas, da contestación dada a estas por parte da empresa promotora e do resto de documentación que consta no expediente, queda de manifesto que:

1. Con respecto á alegación presentada por Andrés Carballo, cabe dicir que será no levantamento de actas o momento no que pode demostrar a titularidade do citado predio, en litixio, achegando a documentación acreditativa necesaria.

2. En relación coa alegación presentada por Salvador Vázquez Gándara cabe manifestar que o predio nº 333 exclúese da relación de predios afectados polo parque eólico.

3. Por último e en relación coa alegación presentada polo Concello de Vimianzo, cómpre dici-lo seguinte:

-As alegacións ó proxecto sectorial serán consideradas no momento de dicta-la resolución correspondente.

-As alegacións ambientais foron tidas en conta na Resolución do 25 de setembro de 2000, da Dirección Xeral de Calidade e Avaliación Ambiental pola que se aprobou a declaración de efectos ambientais do citado parque eólico.

Terceiro.-No expediente instruído para o efecto cumpríronse os trámites regulamentarios.

Esta consellería, de acordo co que antecede e no exercicio das competencias que ten atribuídas

RESOLVE:

Declara-la utilidade pública, en concreto, das instalacións da primeira fase do parque eólico Monte Redondo, o que leva implícita a necesidade de ocupación dos bens e dereitos afectados e implica a urxente ocupación para os efectos do artigo 52 da Lei de expropiación forzosa.

Contra a presente resolución, que é definitiva en vía administrativa, cabe interpoñer, se é o caso, recurso potestativo de reposición no prazo dun mes contado desde o día seguinte ó da súa notificación ou ben directamente recurso contencioso-administrativo ante o Xulgado do Contencioso-Administrativo da Coruña, no prazo de dous meses contados a partir da citada data.

Santiago de Compostela, 15 de xaneiro de 2001.

Juan Rodríguez Yuste

Conselleiro de Industria e Comercio