Visto o texto da acta do acordo da actualización das táboas salariais do convenio colectivo Unidad de Vehículos Industriales, S.A. (Unvi, S.A.) de Ourense para o ano 2001 (código de convenio 3200722, publicado no BOP nº 202, do 2-9-2000), con entrada nesta delegación provincial da Consellería de Xustiza, Interior e Relacións Laborais o día 5-2-2001, subscrito pola dirección de empresa e o comité de empresa o día 31-1-2001, de conformidade co disposto no artigo 90.2º e 3º do Estatuto dos traballadores, texto refundido aprobado polo Real decreto 1/1995, do 24 de marzo, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo e demais normas aplicables de dereito común.

Esta delegación provincial,

ACORDA:

Primeiro.-Ordena-la inscrición no libro rexistro de convenios colectivos de traballo, que consta nesta delegación provincial e notificación ás representacións económica e social da comisión negociadora.

Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación.

Terceiro.-Dispoñe-la súa publicación no Diario Oficial de Galicia.

Ourense, 14 de febreiro de 2001.

José Lage Lage

Delegado provincial de Ourense

Unidad de Vehículos Industriales, S.A. (Unvi)

Revisión convenio colectivo 2001

Acta de acordo

En San Cibrao das Viñas, o día 31 de xaneiro de 2001, reúnese a comisión negociadora do convenio colectivo da compañía Unvi, S.A. Formada polos seguintes membros:

Pola dirección da empresa: Isabel Pérez Martínez, Javier González Pereira e Ramón F. González Doniz.

Polo comité de empresa: Manuel Alvarez González, Narciso Martínez Ojea, Félix Chaudarcas Gómez, Elías Rubín Currás e Francisco Núñez Iglesias.

Os negociadores acadaron un acordo definitivo para a revisión dos puntos comprometidos para o

exercicio 2001, respecto ó convenio colectivo subscrito durante o ano 2000 cunha vixencia de dous anos,

ACORDAN:

1. Aproba-las táboas salariais, vixentes a partir do día 1 de xaneiro de 2001, que se xuntan como anexo I a este documento e que son as vixentes o 31 de decembro de 2000 incrementadas nas seguintes cantidades:

-un 25% correspondente ó IPC previsto para o 2001 (2%) máis o 0,5% pactado polos negociadores no acordo final sobre o contido do convenio.

2. Presentar este acordo e os seus anexos na delegación provincial da Consellería de Xustiza, Interior e Relacións Laborais, para a súa inscrición no correspondente libro-rexistro da dita delegación e notificación ás representacións económica e social da comisión negociadora.

3. Solicita-lo depósito do acordo no Servicio de Relacións Laborais, Unidade de Mediación, Arbitraxe e Conciliación desta provincia de Ourense.

4. As partes negociadoras apodéranse reciprocamente para que calquera delas poida realiza-las operacións pactadas nos números anteriores ante o organismo público competente.

5. Unha vez redactada e lida a acta da reunión é aprobada por unanimidade, asinándoa tódolos asistentes en proba de conformidade.

E sen haber máis asuntos que tratar levántase a sesión no lugar e data no encabezamento expresados.

Táboa salarial ano 2001. 2,5%