Dentro do Plan de actividades da Escola Galega de Administración Pública para o 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre muller, Administración e poder político, convocatoria que se desenvolverá conforme as seguintes bases:

1. Obxectivos.

Achegar unha visión actualizada da situación da muller española co fin de comprobar ata qué punto a conciencia de igualdade esbozada desde a Constitución Española ten reflexo no ámbito xurídico e social españois. En concreto, preténdese analiza-lo grao de integración da muller nas esferas de poder público e político, así como as técnicas e medios utilizados na actualidade para promociona-la súa participación nestes ámbitos.

2. Contido.

Trataranse estes temas:

-Muller, feminismo e poderes públicos.

-Status e dereitos da muller nos Estados Unidos.

-O valor constitucional da igualdade.

-Dereito comunitario e promoción da muller na vida pública.

-A participación da muller española na toma de decisións políticas.

-Vida laboral versus vida familiar.

-Muller, función pública e altos cargos da Administración.

-As políticas de promoción da igualdade da muller en España.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos do edificio administrativo da Xunta en Ferrol (praza Camilo José Cela, s/n, da citada cidade) os días 23 e 24 de abril de 2002.

5. Inscrición.

-Prazo: remata o venres, día 19 de abril de 2002.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por fax: 981 54 63 30.

-Número de prazas: limitado á capacidade do local.

-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 22 de abril, de 8.30 a 14.30 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 25 de marzo de 2002.

Domingo Bello Janeiro

Director da Escola Galega de Administración

Pública