Con data do 28 de maio de 2002 foi publicada no Diario Oficial de Galicia a orde da Consellería da Presidencia, Relacións Institucionais e Administración Pública, do 14 de maio de 2002, pola que se clasifica de interese sanitario a Fundación de Estudios y Formación Sanitaria, adscribíndoa á Consellería de Sanidade, que exercerá plenamente o protectorado sobre ela.
Esta fundación, de acordo co establecido no artigo 4 dos seus estatutos ten como obxecto:
a) A realización de toda clase de estudios, a programación e desenvolvemento de conferencias, cursos, presenciais e a distancia, congresos e actividades dirixidas a promociona-la cultura, en xeral, a educación e a sanidade, en particular, co obxecto de levar a cabo accións tendentes á mellora das condicións da saúde da comunidade, e en xeral o fomento de actividades que teñan como fin a promoción humana e social.
b) A potenciación e desenvolvemento dos recursos humanos a través de actividades dirixidas ó fomento da investigación en materia de formación profesional, ocupacional e social dos traballadores, con especial atención á formación dos desempregados con necesidades especiais de reinserción no mercado de traballo.
c) Favorece-la mellora das condicións de traballo a través da participación na formación dos traballadores e no estudio das necesidades de formación destes, en particular, todo o referente á prevención de riscos laborais en tódolos ámbitos, incluído o sanitario.
d) Fomentar e prestar axudas ó estudio, investigación e asistencia nos aspectos legais, económicos, sociais, culturais, sanitarios, laborais de rehabilitación e integración das persoas que sufran enfermidade e marxinación social, procurando a mellora na súa calidade de vida, desenvolvemento humano e fomentar accións para que estas persoas sexan atendidas por calquera institución ou organismo público ou privado.
Por todo isto, en virtude das competencias que me confire o artigo 34 da Lei 1/1983, do 22 de febreiro, reguladora da Xunta e do seu presidente, e segundo o establecido no artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro e o artigo 32.3º a) do Decreto 248/1992, do 18 de xuño, polo que se aproba o regulamento de organización e funcionamento das fundacións de interese galego,
DISPOÑO:
Primeiro.-Declarar de interese galego a Fundación de Estudios y Formación Sanitaria, ó cumpriren os
seus estatutos as prescricións que, para tal efecto, sinala a vixente lexislación en materia de fundacións de interese galego.
Segundo.-Ordena-la inscrición da Fundación de Estudios y Formación Sanitaria, no rexistro de fundacións de interese galego, sección da Consellería de Sanidade, para os efectos constitutivos que sinala o artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro.
Terceiro.-A dita fundación queda sometida ó disposto no resto da normativa de xeral aplicación, en especial, á obriga de dar publicidade suficiente ás súas actividades e á ausencia de ánimo de lucro na prestación dos seus servicios, quedando obrigada a lle render contas anualmente ó protectorado e xustificar, a través dunha memoria anual, o cumprimento das cargas fundacionais, así como a presentarlle o proxecto de orzamento, ó protectorado con anterioridade ó inicio do exercicio económico para o que se formula, e debendo solicita-las preceptivas autorizacións do protectorado cando sexan necesarias.
Santiago de Compostela, 28 de maio de 2002.
José María Hernández Cochón
Conselleiro de Sanidade