O Concello de Fene, en sesión que tivo lugar o día seis de setembro de dous mil un, aprobou o proxecto de urbanización do predio de Cela, 1ª fase, e na sesión do vinteún de marzo de dous mil dous acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
Por parte do Concello de Fene foi remitida a documentación complementaria para a correcta tramitación do expediente con data de entrada no rexistro
xeral da Consellería de Xustiza, Interior e Relacións Laborais o día vintedous de maio de dous mil dous.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Relacións Laborais o día vinteseis de abril de dous mil dous.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque segundo sinala o concello o alargamento da rúa Camiño da Casa Nova é fundamental para evita-lo illamento do Barrio do Sartego, consolidado na actualidade polas edificacións existentes e dando así cumprimento ás previsións do Plan Xeral de Ordenación Urbana.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día seis de xuño de dous mil dous,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Fene para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de urbanización do predio de Cela, 1ª fase.
Santiago de Compostela, seis de xuño de dous mil dous.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais
