Descargar PDF Galego | Castellano

DOG - Xunta de Galicia -

Diario Oficial de Galicia
DOG Núm. 249 Mércores, 24 de decembro de 2003 Páx. 15.987

I. DISPOSICIÓNS XERAIS

CONSELLERÍA DE SANIDADE

DECRETO 443/2003, do 11 de decembro, de regulación das actividades de elaboración e control de calidade de fórmulas maxistrais e preparados oficinais.

A Lei 5/1999, do 21 de maio, de ordenación farmacéutica, establece nos seus artigos 8.3º, 29 a) e 32.3º, para as oficinas de farmacia, os servicios de farmacia de atención primaria e os servicios de farmacia dos hospitais e centros de asistencia social, respectivamente, que a elaboración de fórmulas maxistrais e preparados oficinais se deberá realizar sempre de acordo coas normas de correcta fabricación e os requisitos sanitarios establecidos nos artigos 35 e 36 da Lei 25/1990, do 20 de decembro, do medicamento.

O Real decreto 175/2001, do 23 de febreiro, polo que se aproban as normas de correcta elaboración e control de calidade de fórmulas maxistrais e preparados oficinais, desenvolve regulamentariamente

o disposto nos anteditos artigos 35 e 36 e establece os requisitos e as condicións da correcta elaboración das fórmulas maxistrais e dos preparados oficinais. Co obxecto de lle permitir ó farmacéutico garanti-la calidade das súas preparacións, este real decreto describe as condicións xerais que deben reuni-las oficinas e os servicios de farmacia, no que respecta ó persoal, os locais, os utensilios, a documentación, as materias primas utilizadas e os materiais de acondicionamento, a elaboración, o control de calidade e a dispensación. O devandito real decreto foi modificado polo Real decreto 905/2003, do 11 de xullo, ampliando o prazo inicialmente previsto para a adaptación gradual ós requisitos previstos nel ata o 1 de xaneiro de 2004.

Así mesmo, os artigos 35.2º e 36.2º da Lei 25/1990, do 20 de decembro, e o capítulo V do Real decreto 175/2001, do 23 de febreiro, regulan a posibilidade de que aquelas oficinas e servicios de farmacia que non dispoñan dos medios necesarios para realiza-las súas preparacións, poidan encomendar, con base nunha prescrición facultativa para un paciente, a elaboración e/ou o control de fórmulas maxistrais e preparados oficinais a un terceiro legalmente autorizado para tal fin pola Administración sanitaria competente, todo isto sen prexuízo do establecido no artigo 76.2º da citada Lei 25/1990, do 20 de decembro, para a fabricación por terceiros.

De acordo co disposto no artigo 7.6º da citada Lei 5/1999, do 21 de maio, correspóndelle á Consellería de Sanidade a autorización, o rexistro, a catalogación e a inspección das actividades e funcións que se van desenvolver nas oficinas e servicios de farmacia.

Tendo en conta o anterior, e coa finalidade de controlar dunha maneira máis completa o cumprimento das condicións e requisitos establecidos polo Real decreto 175/2001, do 23 de febreiro, polo que se aproban as normas de correcta elaboración e control de calidade de fórmulas maxistrais e preparados oficinais, considérase necesario regula-lo procedemento para realiza-la catalogación e a conseguinte anotación no rexistro das oficinas e servicios de farmacia da Comunidade Autónoma de Galicia. Este rexistro está recollido no artigo 5 f) en relación co artigo 2.3º do Decreto 77/2001, do 29 de marzo, sobre centros, servicios e establecementos sanitarios da Comunidade Autónoma de Galicia. As referidas catalogacións e anotacións efectuaranse en función das preparacións que realicen e da tecnoloxía necesaria para elo. Así mesmo, considérase necesario regula-la autorización de oficinas e servicios de farmacia que pretendan realizar preparacións para outras oficinas e servicios de farmacia que

lle encomenden a elaboración e o control de calidade de fórmulas maxistrais e preparados oficinais.

Polo exposto e co fin de levar á práctica o cumprimento do establecido na disposición derradeira primeira da Lei 5/1999, do 21 de maio, de ordenación farmacéutica, por proposta do conselleiro de Sanidade, consultados os colexios oficiais de far

macéuticos de Galicia e de acordo co Consello Consultivo de Galicia, no dictame nº 657/2003, do 22 de outubro de dous mil tres, e despois da deliberación do Consello da Xunta de Galicia, na súa reunión do día once de decembro de dous mil tres,

DISPOÑO:

Artigo 1º.-Obxecto.

1. Este decreto regula o procedemento de catalogación das oficinas de farmacia e dos servicios de farmacia legalmente establecidos na Comunidade Autónoma de Galicia, segundo o tipo de formas farmacéuticas que elabore, de acordo co disposto no Real decreto 175/2001, do 23 de febreiro, polo que se aproban as normas de correcta elaboración e control de calidade de fórmulas maxistrais e preparados oficinais.

Da devandita catalogación quedará constancia en anotación marxinal no rexistro previsto no artigo 7.6º da Lei 5/1999, do 21 de maio.

2. Así mesmo, regúlase o procedemento de autorización das oficinas e servicios de farmacia legalmente establecidos na Comunidade Autónoma de Galicia para realiza-las actividades de elaboración e/ou o control de calidade de fórmulas maxistrais e preparados oficinais para outras oficinas e servicios de farmacia.

Artigo 2º.-Competencias.

Correspóndelle ó conselleiro de Sanidade ordena-la catalogación das actividades de elaboración e control de calidade de fórmulas maxistrais e preparados oficinais na Comunidade Autónoma de Galicia, así como concede-la autorización das actividades de elaboración e control de calidade de fórmulas maxistrais e preparados oficinais na Comunidade Autónoma de Galicia con destino a outras oficinas e servicios de farmacia.

Artigo 3º.-Solicitudes de catalogación.

1. As oficinas e os servicios de farmacia que elaboren fórmulas maxistrais e preparados oficinais para seren dispensados ós pacientes no seu propio establecemento, deberán contar cos utensilios mínimos establecidos no Real decreto 175/2001, do 23 de febreiro, segundo o tipo de preparacións que realice, tal e como se recolle no anexo III.

2. Para tal fin deberanlle comunicar á División de Farmacia e Productos Sanitarios o nivel de formas farmacéuticas que realizan, segundo o modelo establecido do anexo IA e xuntando a documentación indicada no anexo IIA.

Artigo 4º.-Solicitudes de autorización.

1. As oficinas de farmacia e os servicios de farmacia que pretendan elaborar fórmulas maxistrais e preparados oficinais para outras oficinas e servicios de farmacia deberán dispoñer de autorización sanitaria.

2. Para tal fin, deberán solicita-la autorización correspondente con carácter previo ó inicio das actividades, segundo o modelo establecido no anexo IB.

3. A antedita solicitude, xunto coa documentación descrita no anexo IIB, deberá ser dirixida á División de Farmacia e Productos Sanitarios do Servicio Galego de Saúde.

Artigo 5º.-Emenda.

Se a solicitude ou a documentación presentada non reúnen os requisitos que sinala este artigo, ou non se presenta toda a documentación necesaria, requirirase o interesado para que, nun prazo de dez días, emende a falta ou xunte os documentos preceptivos, con indicación de que, se así non o fixese, se lle terá por desistido da súa petición, logo de resolución que deberá ser dictada nos termos previstos no artigo 42 da Lei 30/1992, do 26 de novembro.

Artigo 6º.-Resolución de recoñecemento do nivel de elaboración.

1. O conselleiro de Sanidade recoñecerá ou, se é o caso, denegará o nivel de elaboración das fórmulas maxistrais e preparados oficinais que elaboren as oficinas e os servicios de farmacia para seren dispensados ós pacientes no seu propio establecemento.

2. Con anterioridade á antedita resolución, a División de Farmacia e Productos Sanitarios poderá ordenar que se efectúe a correspondente visita de inspección, co obxecto de verifica-lo cumprimento das normas de correcta elaboración e control de calidade establecidas no Real decreto 175/2001, do 23 de febreiro.

3. Á vista do actuado estenderase, se é o caso, a correspondente acta de inspección que, de ser favorable, dará lugar ó recoñecemento do nivel das actividades polo conselleiro de Sanidade.

4. Na resolución de recoñecemento de nivel, especificaranse as formas farmacéuticas das fórmulas maxistrais e preparados oficinais obxecto da actividade. As oficinas e os servicios de farmacia serán catalogados segundo o disposto no artigo 7º.

5. O prazo máximo para resolver e notifica-las solicitudes de catalogación será de tres meses. Transcorrido o dito prazo sen resolución expresa entenderase que se produciu a súa catalogación e anotación marxinal no rexistro nos termos da solicitude efectuada.

Artigo 7º.-Resolución de autorización.

1. O conselleiro de Sanidade resolverá, autorizando ou denegando o inicio de actividades daquelas oficinas e servicios de farmacia que soliciten a elaboración e/ou o control de calidade de fórmulas maxistrais e preparados oficinais para outras oficinas e servicios de farmacia.

2. Con anterioridade á antedita resolución, a División de Farmacia e Productos Sanitarios ordenará

que se efectúe a correspondente visita de inspección, co obxecto de verifica-lo cumprimento das normas de correcta elaboración e control de calidade establecidas no Real decreto 175/2001, do 23 de febreiro.

3. Á vista do actuado expedirase, se é o caso, a correspondente acta de inspección que, de ser favorable, dará lugar á autorización de inicio de actividades expedida polo conselleiro de Sanidade.

4. Na resolución de autorización especificaranse as formas farmacéuticas das fórmulas maxistrais e preparados oficinais obxecto da actividade, así como as responsabilidades e obrigas que as oficinas e servicios de farmacia deberán cumprir cando lles sexan encomendadas por outras a elaboración e/ou o control de calidade de fórmulas maxistrais e preparados oficinais.

5. O prazo máximo para resolver e notifica-la autorización ou a súa denegación será de seis meses. Transcorrido o dito prazo sen resolución expresa entenderase estimada a solicitude de autorización.

Artigo 8º.-Recursos.

As resolucións expresas ou presuntas que se dicten ó abeiro deste decreto poñerán fin á vía administrativa e contra elas poderá recorrerse potestativamente en reposición, de acordo co previsto no artigo 116 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro; ou ben ser impugnadas directamente ante a orde xurisdiccional contencioso-administrativa, de conformidade co previsto na Lei 29/1998, do 13 de xullo, reguladora da xurisdicción contencioso-administrativa, e sen prexuízo de que os interesados poidan executar calquera outro que consideren oportuno.

Artigo 9º.-Catalogación.

1. As oficinas e os servicios de farmacia autorizados para realizar actividades de elaboración e control de calidade de fórmulas maxistrais e preparados oficinais serán catalogados segundo o tipo de formas farmacéuticas que elaboren.

2. A División de Farmacia e Productos Sanitarios remitirá copia da documentación acreditativa das actividades de elaboración e control de fórmulas maxistrais e preparados oficinais á Delegación Provincial da Consellería de Sanidade correspondente, para que esta catalogación sexa incluída nos expedientes de autorización das correspondentes oficinas e servicios de farmacia.

Artigo 10º.-Inspección.

1. A División de Farmacia e Productos Sanitarios poderá ordena-la inspección das oficinas e servicios de farmacia cando o coide conveniente, para os efectos do mantemento por parte destes establecementos e servicios dos requisitos esixidos para desenvolver actividades de elaboración e control de calidade de fórmulas maxistrais e preparados oficinais.

2. Se na visita de inspección se observasen deficiencias, poderáselles conceder un prazo para a súa emenda. Transcorrido o dito prazo sen que fosen corrixidas, procederase á apertura de procedemento sancionador por incumprimento dos requisitos e condicións esixidos para a realización desta actividade. Sen prexuízo disto, no caso das oficinas ou servicios de farmacia que elaboren fórmulas maxistrais e preparados oficinais para outras oficinas e servicios de farmacia, o conselleiro de Sanidade dictará resolución en virtude de que a oficina ou o servicio de farmacia non poderá realiza-las devanditas actividades ata que cumpran cos requisitos esixidos. O cumprimento dos requisitos será verificado pola correspondente visita de inspección que o farmacéutico responsable da oficina ou servicio de farmacia deberá solicitar expresamente para tal fin.

Artigo 11º.-Comunicación de modificacións.

Os cambios efectuados na titularidade, condicións estructurais, equipamento e persoal da oficina ou servicio de farmacia, sempre que non sexan circunstanciais, nin respondan a situacións transitorias, deberán ser comunicados á División de Farmacia e Productos Sanitarios no prazo máximo dun mes, xuntando os documentos acreditativos ó respecto.

Artigo 12º.-Alteración das condicións.

1. As oficinas e os servicios de farmacia que dispoñan de autorización para a elaboración e o control de determinadas formas farmacéuticas de fórmulas maxistrais e preparados oficinais para outras oficinas e servicios de farmacia, e pretendan amplía-las anteditas actividades para outras formas farmacéuticas distintas das autorizadas, deberán solicita-la correspondente autorización con carácter previo ó das novas actividades inicio, segundo o modelo establecido no anexo IV.

Así mesmo, as oficinas e os servicios de farmacia que elaboren fórmulas maxistrais e preparados oficinais para seren dispensados ós pacientes no seu propio establecemento, que pretendan modifica-lo nivel de elaboración no que están catalogados, estarán suxeitos ó réxime previsto no artigo 4 deste decreto, sen prexuízo da presentación do anexo IV.

2. A antedita solicitude dirixirase á División de Farmacia e Productos Sanitarios, xunto coa documentación correspondente ás formas farmacéuticas que solicita a súa elaboración e/ou control de calidade descrita nos anexos IIA ou IIB, e III.

3. As oficinas e os servicios de farmacia que elaboren fórmulas maxistrais e preparados oficinais para seren dispensados ós pacientes no seu propio establecemento, que pretendan non continuar coa elaboración e control das fórmulas maxistrais e preparados oficinais, deberanlle comunicar con 15 días de antelación tal situación á antedita división co obxecto de proceder á súa baixa no rexistro correspondente.

Así mesmo, as oficinas e os servicios de farmacia que, dispoñendo de autorización, pretendan non continuar coa elaboración e control de fórmulas maxistrais e preparados oficinais para outras oficinas e

servicios de farmacia, deberanlle comunicar con 15 días de antelación tal situación á antedita división co obxecto de proceder ó seu cesamento de actividades e á súa baixa no rexistro correspondente.

Artigo 13º.-Revogación da autorización.

1. A autorización de inicio das actividades de elaboración e control de calidade de fórmulas maxistrais e preparados oficinais para outras oficinas e servicios de farmacia será revogada nos seguintes supostos:

a) alteración substancial non autorizada consonte o disposto no artigo 10 deste decreto, ou perda das condicións que serviron de base á devandita autorización,

b) traslado da oficina de farmacia sen ter solicitado autorización para realizar estas actividades no novo local.

2. A revogación producirase sen prexuízo das medidas sancionadoras que procedan.

Artigo 14º.-Réxime sancionador.

1. Constitúen infraccións administrativas nesta materia as reguladas nos artigos 108 da Lei 25/1990, do 20 de decembro, do medicamento, e 56 da Lei 5/1999, do 21 de maio, de ordenación farmacéutica.

2. É de aplicación o réxime sancionador establecido nos artigos 107 e seguintes da Lei 25/1990, do 20 de decembro, do medicamento, no título IX da Lei 5/1999, do 21 de maio, de ordenación farmacéutica, na Lei 14/1986, do 25 de abril, xeral de sanidade e demais disposicións aplicables.

Disposición adicional

A Consellería de Sanidade publicará unhas guías que, partindo da regulación efectuada polo Real decreto 175/2001, do 23 de febreiro, servirán de referencia tanto á autorización de actividades de elaboración e control de fórmulas maxistrais e preparados oficinais coma ós seus niveis de elaboración e ás distintas esixencias en función destes.

Disposición transitoria

As oficinas e os servicios de farmacia que viñesen elaborando fórmulas maxistrais e preparados oficinais con anterioridade á publicación deste decreto deberán estar adaptados ás súas disposicións o 1 de xaneiro de 2004.

Disposicións derradeiras

Primeira.-Facúltase o conselleiro de Sanidade para dicta-las disposicións necesarias para o desenvolvemento e a execución deste decreto.

Segunda.-Este decreto entrará en vigor o día seguinte ó da súa publicación no Diario Oficial de Galicia.

Santiago de Compostela, once de decembro de dous mil tres.

Manuel Fraga Iribarne

Presidente

José María Hernández Cochón

Conselleiro de Sanidade

ANEXO IA

Solicitude de catalogación para realizar actividades de elaboración e control de calidade de fórmulas maxistrais e preparados oficinais

D/Dª..., con DNI..., farmacéutico/a colexiado/a número... titular/xefe de servicio da oficina de farmacia/servicio de farmacia de SIGLA..., situado en... pertencente á zona farmacéutica/centro hospitalario de..., provincia de..., con número de teléfono..., número de fax... e correo electrónico...,

SOLICITA

A catalogación e rexistro para a elaboración e o control de fórmulas maxistrais e preparados oficinais, para seren dispensados na oficina de farmacia/servicio de farmacia da miña titularidade, con base na documentación que se xunta, correspondente ás seguintes formas farmacéuticas:

p 1. Tópicas.

p 2. Orais e rectais líquidas.

p 3. Orais, rectais e vaxinais sólidas.

p 4. Estériles.

En... o..., de... de 200...

Asdo.:...

ANEXO IB

Solicitude de autorización para realizar actividades de elaboración e control de calidade de fórmulas maxistrais e preparados oficiais

D/Dª..., con DNI..., farmacéutico/a colexiado/a número... titular/xefe de servicio da oficina de farmacia/servicio de farmacia de SIGLA..., situado en... pertencente á zona farmacéutica/centro hospitalario de..., provincia de..., con número de teléfono..., número de fax... e correo electrónico...,

SOLICITA

A autorización para a elaboración e o control de fórmulas maxistrais e preparados oficinais, para outras oficinas e servicios de farmacia con base na documentación que se xunta, correspondentes ás seguintes formas farmacéuticas:

p 1. Tópicas.

p 2. Orais e rectais líquidas.

p 3. Orais, rectais e vaxinais sólidas.

p 4. Estériles.

En... o... de... de 200...

Asdo.:...

ANEXO IIA

Actividades de elaboración e control de calidade de fórmulas maxistrais e preparados oficinais para seren dispensados na mesma oficina/servicio de farmacia

Documentación

1. Persoal que participará nos procesos de elaboración e control, indicando a súa titulación e vinculación coa oficina/servicio de farmacia, así como as súas funcións e responsabilidades.

2. Memoria explicativa da zona ou local de preparación que se dispón na oficina/servicio de farmacia, con indicación da súa superficie, situación no interior da oficina/servicio de farmacia, características dos materiais dos chans, paredes e teitos, e no que se deberá reflecti-lo seguinte:

2.1. Descrición dos seguintes elementos:

2.1.1. Superficie ou superficies de traballo, con indicación das características dos materiais dos que está composta.

2.1.2. Pía con auga fría e quente, provista dun sifón antirretorno, con indicación das características dos materiais dos que está composta.

2.1.3. Zona diferenciada para os recipientes e utensilios pendentes de limpeza.

2.1.4. Soporte horizontal para a/s balanza/s, que evite o máis posible as vibracións e que garanta unha correcta pesada.

2.1.5. Espacio para a lectura e redacción de documentos.

2.1.6. Armarios e andeis para colocar todo aquilo necesario para as preparacións.

2.1.7. Frigorífico con termómetro de temperatura máxima e mínima.

2.2. Deseño e descrición, se é o caso, da zona de preparación de formas farmacéuticas estériles, con indicación da súa superficie e das características dos materiais dos chans, paredes e teitos e dos mecanismos de filtración do aire.

3. Descrición do equipamento e utensilios que se van utilizar para as formas farmacéuticas das fórmulas maxistrais e preparados oficinais que se pretendan elaborar.

4. Xustificante de ter feito o ingreso da taxa correspondente.

ANEXO IIB

Actividades de elaboración e control de calidade de fórmulas maxistrais e preparados oficinais para outras oficinas e servicios de farmacia

Documentación

1. Persoal que participará nos procesos de elaboración e control, indicando a súa titulación e vinculación coa oficina/servicio de farmacia, así como as súas funcións e responsabilidades.

2. Plano da zona ou local de preparación, elaborado por técnico competente, con indicación da súa superficie, situación no interior da oficina/servicio de farmacia, características dos materiais dos chans, paredes e teitos, e no que se deberá reflecti-lo seguinte:

2.1. Deseño e descrición dos seguintes elementos:

2.1.1. Superficie ou superficies de traballo, con indicación das características dos materiais dos que está composta.

2.1.2. Pía con auga fría e quente, provista dun sifón antirretorno, con indicación das características dos materiais dos que está composta.

2.1.3. Zona diferenciada para os recipientes e utensilios pendentes de limpeza.

2.1.4. Soporte horizontal para a/s balanza/s, que evite o máis posible as vibracións e que garanta unha correcta pesada.

2.1.5. Espacio para a lectura e redacción de documentos.

2.1.6. Armarios e andeis para colocar todo aquilo necesario para as preparacións.

2.1.7. Frigorífico con termómetro de temperatura máxima e mínima.

2.2. Deseño e descrición, se é o caso, da zona de preparación de formas farmacéuticas estériles, con indicación da súa superficie e das características dos materiais dos chans, paredes e teitos e dos mecanismos de filtración do aire.

3. Descrición do equipamento e utensilios que se van utilizar para as formas farmacéuticas das fórmulas maxistrais e preparados oficinais que se pretendan elaborar.

4. Xustificante de ter feito o ingreso da taxa correspondente.

ANEXO III

Actividades de elaboración e control de calidade de fórmulas maxistrais e preparados oficinais

Utensilios mínimos

1. Formas farmacéuticas tópicas.

-Balanza con precisión de 1 mg.

-Aparellos de medida de volume de 0,5 mL ata 500 mL(matraces aforados de distintas capacidades, probetas, pipetas, etc.).

-Morteiro de vidro e/ou porcelana.

-Sistema de baño de auga.

-Axitador.

-Espátulas de metal e de goma.

-Termómetro.

-Material de vidro diverso (vasos de precipitados, matraces cónicos, embudes, vidro de reloxo, etc.).

-Lente de aumento.

-Sistema de producción de calor.

-Sistema para a determinación do pH.

2. Formas farmacéuticas orais e rectais líquidas.

Ademais dos utensilios mínimos establecidos para as formas farmacéuticas tópicas, deberase dispor de:

-Barutos para po groso, fino e moi fino.

3. Formas farmacéuticas orais, rectais e vaxinais sólidas.

Ademais dos requisitos establecidos para as formas farmacéuticas tópicas e orais e rectais sólidas, deberase dispor de:

Utensilios obrigatorios:

-Capsuladora con xogo completo de placas.

Utensilios opcionais: no caso de que se pretendan elaborar:

a) Supositorios:

-Molde de supositorios.

-Baño termostático e sistema para medi-lo punto de fusión.

b) Óvulos:

-Molde de óvulos.

-Baño termostático e sistema para medi-lo punto de fusión.

c) Pílulas:

-Piluleiro.

d) Comprimidos:

-Máquina de comprimir e mesturadora.

e) Dráxeas:

-Máquina de comprimir, mesturadora e bombo de draxeado.

f) Gránulos ou glóbulos de homeopatía:

-Sistemas de impregnación e dinamización.

4. Formas farmacéuticas estériles.

Ademais dos requisitos obrigatorios establecidos para as demais formas farmacéuticas, deberase dispor de:

Utensilios obrigatorios:

-Autoclave.

-Dosificadores de líquidos.

-Equipo de filtración esterilizante.

-Campá de fluxo laminar.

-Forno esterilizador e despiroxenizador de calor seca.

-Homoxeneizador.

-Equipo para cerrar ampolas e capsular vías.

-Sistema de lavado de material adecuado.

-Estufa.

-Placas Petri.

Utensilios opcionais: no caso de que se pretendan elaborar liofilizados:

-Liofilizador e neveira con conxelador.

ANEXO IV

Actividades de elaboración e control de calidade de fórmulas maxistrais e preparados oficinais

Solicitude de modificación das actividades

D/Dª..., con DNI..., farmacéutico/a colexiado/a número...titular/xefe de servicio da oficina de farmacia/servicio de farmacia de SIGLA..., situado en... pertencente á zona farmacéutica/centro hospitalario de..., provincia de..., con número de teléfono..., número de fax... e correo electrónico..., que dis

poñendo de autorización para a elaboración e control de calidade para..., de formas farmacéuticas...,

SOLICITA

Con base na documentación que se xunta, amplia-las actividades para a elaboración e o control de fórmulas maxistrais e preparados oficinais, correspondentes ás seguintes formas farmacéuticas:

p Orais e reactais líquidas.

p Orais, reactais e vaxinais sólidas.

p Estériles.

En... o... de... de 200...

Asdo.:...

CONSELLERÍA DE FAMILIA, XUVENTUDE, DEPORTE

E VOLUNTARIADO