O Regulamento (CE) 1257/1999, do Consello, do 17 de marzo, establece o marco das axudas comunitarias a favor dun desenvolvemento rural sustentable. Estas axudas, que se centrarán nas actividades agrarias e na súa reconversión, poden ter por obxecto, entre outros, a reconversión e reorientación da capacidade de producción agraria e introducción de novas tecnoloxías e a mellora da calidade dos productos; a diversificación das actividades coa creación doutras de carácter complementario e alternativo; o desenvolvemento de actividades económicas e o mantemento e creación de postos de traballo; o mantemento e fomento de sistemas agrícolas de baixos consumos; a conservación e promoción dunha natureza de alta calidade e dunha agricultura sustentable que respecte as esixencias ambientais.
Conforme o anterior, dentro do marco das medidas previstas no programa operativo integrado de Galicia 2000-2006, a orde desta consellería, do 2 de agosto de 2002, estableceu as bases reguladoras das axudas para programas agrarios de mellora técnica e desenvolvemento sustentable dos procesos productivos agrícolas.
A experiencia adquirida coa aplicación destas axudas durante as convocatorias dos anos 2002 e 2003, fai conveniente efectuar puntuais modificacións na Orde do 2 de agosto de 2002 pola que se establecen
as bases reguladoras das axudas para programas agrarios de mellora técnica e desenvolvemento sustentable dos procesos productivos agrícolas precisándose a porcentaxe de subvención, o máximo investimento auxiliable destas axudas e a documentación que hai que presentar coas solicitudes.
A devandita orde cumpre os requisitos previstos, para as bases reguladoras aplicables á concesión de axudas e subvencións, no artigo 78º.6 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, conforme a redacción dada pola Lei 8/1999, do 30 de decembro, de medidas fiscais e orzamentarias e de función pública e actuación administrativa, polo que, previstas as bases reguladoras das axudas para programas agrarios de mellora técnica e desenvolvemento sustentable dos procesos productivos agrícolas, é necesario establece-la súa convocatoria para o ano 2004, mediante esta orde que, á súa vez, cumpre os requisitos esixidos no artigo 8.3º do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.
En consecuencia, de acordo co disposto no artigo 30.I.3 do Estatuto de autonomía de Galicia e en uso das facultades que me confire a Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, e no Decreto 50/2002, do 14 de febreiro,
DISPOÑO:
Sección primeira.-Modificación da Orde do 2 de agosto de 2002 pola que se establecen as bases reguladoras de axudas para programas agrarios de mellora técnica e desenvolvemento sustentable dos procesos productivos agrícolas.
Artigo 1º.-Modificación do artigo 5º.2. da Orde do 2 de agosto de 2002 relativo ás solicitudes de axuda e á documentación complementaria.
1. O punto e) do artigo 5º, alínea 2, quedará redactado como segue:
«e) Relación de técnicos e outro personal contratado responsable da execución do programa. Deberase acredita-la formación adecuada para o fin demandado dos técnicos propostos polo solicitante, e será valorada polos Servicios Provinciais de Explotacións Agrarias previamente á aprobación da axuda».
2. Engádense os puntos i) e j) no artigo 5º, alínea 2, que quedan redactados como seguen:
«i) Copia da solicitude da licencia de obras para aquelas construccións ou instalacións fixas que de acordo co establecido na normativa urbanísitca deban contar con licencia municipal.
j) No caso de agricultores mozos xuntarase:
-Acreditación da capacidade e competencia profesionais a través da presentación das titulacións académicas ou dos cursos de capacitación agraria (mínimo 200 horas) que procedan. En caso negativo, compromiso de realiza-los cursos de capacitación no prazo de dous anos.
-Informe da vida laboral do titular.
-Copia da declaración da renda do ano no que se instala e á do ano anterior a dita instalación».
Artigo 2º.-Modificación dos artigos 17º, 22º, 42º e 47º da Orde do 2 de agosto de 2002 relativos á contía das subvencións.
O punto 1.II do artigo 17º queda redactado como segue:
«Artigo 17º
1.II. Investimentos en bens e servicios necesarios para a correcta execución do programa: ata o 40% dos investimentos, agás para aqueles solicitantes titulares de explotacións que estean situadas en zonas desfavorecidas, nas que esta porcentaxe poderá acada-lo 50%.
Non obstante, cando estes investimentos supoñan un aumento dos custos derivados da protección e mellora do ambiente, indo máis alá dos requisitos comunitarios vixentes, as axudas poderán chegar ata o 70% ou 75%, respectivamente.
No caso de agricultores mozos segundo o artigo 8º, punto 1 do regulamento (CE) nº 1257/1999 do Consello, do 17 de maio, que simultaneamente á súa primeira instalación ou nos seguintes cinco anos a esta, presente, antes de cumpri-los corenta anos de idade, un plan de mellora conforme as condicións establecidas nesta orde, poderá obter unha axuda suplementaria do 5% como máximo, do investimento, que poderá ser aplicada en cualquera dos dous supostos citados no primeiro parágrafo deste punto».
Os puntos a) e b) do artigo 22º quedan redactados como segue:
«Artigo 22º
a) Investimento en estructuras productivas necesarias para a implantación do cultivo ou actividade complementaria/alternativa: ata ó 40% do investimento.
b) Investimento en bens e equipos para o inicio e mellora dos procesos productivos: ata ó 40% do investimento.
En canto ós casos de zonas desfavorecidas, custos derivados da protección e mellora do ambiente ou agricultores mozos, haberá que aterse ó disposto no artigo 17º da Orde do 2 de agosto de 2003, segundo redacción dada por esta orde».
Os puntos 2 e 3 do artigo 42º quedan redactados como segue:
«Artigo 42º
2. No caso de investimentos en estructuras productivas para a implantación do cultivo: ata ó 40% dos investimentos.
3. No caso de investimentos en bens e equipamentos necesarios para o inicio e mellora dos procesos productivos: ata ó 40% dos investimentos.
En canto ós casos de zonas desfavorecidas, custos derivados da protección e mellora do ambiente ou agricultores mozos, haberá que aterse ó disposto no artigo 17º da Orde do 2 de agosto de 2003, segundo redacción dada por esta orde».
Os puntos 2 e 3 do artigo 47º quedan redactados como segue:
«Artigo 47º
2. No caso de investimentos en estructuras productivas necesarias para a implantación do cultivo: ata ó 40% dos investimentos.
3. No caso de investimentos en bens e equipamentos necesarios para o inicio e mellora dos procesos productivos: ata ó 40% dos investimentos.
En canto ós casos de zonas desfavorecidas, custos derivados da protección e mellora do ambiente ou agricultores mozos, haberá que aterse ó disposto no artigo 17º da Orde do 2 de agosto de 2003, segundo redacción dada por esta orde».
Artigo 3º.-Modificación do artigo 27º da Orde do 2 de agosto de 2002 relativo á contía das subvencións para creación e mellora de empresas de servicios agrarios.
O punto a) do artigo 27º queda redactado como segue:
«Artigo 27º
a) Adquisición de equipamentos e apeiros agrarios: ata o 30% do seu custo, cun investimento máximo auxiliable de 750.000 euros para un período de 6 anos».
Artigo 4º.-Modificación do artigo 28º da Orde do 2 de agosto de 2002 relativo ós compromisos dos beneficiarios.
Engádese o punto c) no artigo 28º, quedando redactado como segue:
«Artigo 28º
c) Inscribirse no Rexistro Oficial de Empresas de Servicios Agrarios da Dirección Xeral de Producción e Sanidade Agropecuaria».
Sección segunda.-Convocatoria das axudas para o 2004.
Artigo 5º.-Obxecto.
Esta sección ten por obxecto establece-la convocatoria, para o ano 2004, das axudas para programas
agrarios de mellora técnica e desenvolvemento sustentable dos procesos productivos agrícolas en Galicia, de acordo coas bases reguladoras previstas na Orde do 2 de agosto de 2002, publicadas no Diario Oficial de Galicia nº 153, do 9 de agosto de 2002, coas modificacións introducidas na sección primeira desta orde.
Artigo 6º.-Condicións e finalidade.
1. Para poder acceder ós distintos programas de axudas previstos no artigo 2º da Orde do 2 de agosto de 2002 pola que se establecen as bases reguladoras das axudas para programas agrarios de mellora técnica e desenvolvemento sustentable dos procesos productivos agrícolas, deberanse cumpri-los requisitos establecidos, para cada programa agrario que se vai desenvolver, conforme o previsto no capítulo II e III da devandita orde, relativo a programas para a mellora dos procesos productivos agrícolas e no capítulo III que establece os programas agrarios especiais.
2. Estas axudas teñen por finalidade incentiva-la mellora dos procesos productivos agrícolas e as iniciativas de desenvolvemento coa creación de actividades alternativas ou complementarias das explotacións, así como promociona-las empresas de servicios agrarios e a introducción de técnicas de respecto ambiental.
Artigo 7º.-Prazo e presentación das solicitudes de axuda.
1. O prazo de solicitudes de axuda iníciase o día seguinte ó de publicación desta orde e remata o vindeiro día 1 de marzo de 2004. As solicitudes presentaranse en calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común e, preferentemente, nas delegacións provinciais ou nas oficinas agrarias comarcais da Consellería de Política Agroalimentaria e Desenvolvemento Rural.
2. Os interesados presentarán a solicitude de axuda de acordo co disposto no artigo 5º.1 da Orde de 2 de agosto de 2002, axustada ó modelo do anexo I da dita orde. A esa solicitude achegaranse debidamente cubertos os anexos II, III e IV e, cando se pretenda levar a cabo, ademais, algún dos programas agrarios especiais, os anexos VI a XI específicos para cada caso, acompañados da documentación especificada no artigo 5º.2 e concordantes da antedita orde.
Artigo 8º.-Xustificación.
O cumprimento da finalidade para a que foi concedida a axuda, xustificarase de conformidade co previsto con carácter xeral no artigo 8º da Orde de 2 de agosto de 2002, sobre execución do programa agrario e certificación de actuacións.
Artigo 9º- Financiamento.
1. As axudas reguladas nesta orde financiaranse con cargo ás aplicacións seguintes do proxecto dos
orzamentos xerais da Comunidade Autónoma para o 2004:
a) Na aplicación 09.03.614A.770.0 (código de proxecto 2002.09806), para o fomento de actividades agrícolas complementarias e alternativas, por importe de 2.070.000 euros.
b) Na aplicación 09.03.614A.770.1 (código de proxecto 2002.09809), para fomento de sistemas e ciclos agrarios sustentables, por importe de 885.935 euros.
c) Nas aplicacións 09.03.614A.770.3 (código de proxecto 2002.09810), para producción integrada e outras técnicas de respecto ambiental, por importe de 1.147.697 euros.
2. Poderanse utilizar outros remanentes dispoñibles nas devanditas aplicacións orzamentarias e, no caso de remanentes nalgunha das liñas ou programas de actuación, poderase incrementa-lo orzamento dispoñible nas outras liñas que o precisen.
3. De conformidade co establecido na orde da Consellería de Economía e Facenda, do 11 de febreiro de 1998, modificada polas ordes de 27 de novembro de 2000 e de 25 de outubro de 2001, posibilítase a tramitación anticipada de expedientes de gasto, sempre que exista crédito adecuado e suficiente no proxecto de Lei de orzamentos do exercicio do ano 2004, aprobados polo Consello da Xunta de Galicia, neste momento en trámite parlamentario, quedando sometida a concesión das ditas axudas á condición suspensiva de existencia de crédito adecuado e suficiente no momento da súa resolución.
Disposición adicional
Única.-Aplicarase á presente convocatoria o previsto na disposición adicional única da Orde do 2 de agosto de 2002, en canto á autorización e expedición dos certificados acreditativos de que o solicitante se atopa ó corrente das súas obrigas tributarias e que non ten pendente de pagamento ningunha débeda, por ningún concepto, coa Administración pública da Comunidade Autónoma de Galicia.
Non obstante quedan exentos de achega-los xustificantes de cumprimento das obrigas a que se refire o artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, as axudas especificadas no artigo 42 g) do Proxecto de Lei de orzamentos xerais da Comunidade Autónoma de Galicia para o ano 2004, condicionado á súa aprobación definitiva.
Disposicións derradeiras
Primeira.-Facúltase o director xeral de Producción e Sanidade Agropecuaria para dicta-las instruccións precisas para o desenvolvemento e execución desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 23 de decembro de 2003.
Juan Miguel Diz Guedes
Conselleiro de Política Agroalimentaria
e Desenvolvemento Rural
