O artigo 7 da Lei 4/1987, do 27 de maio, de creación da Escola Galega de Administración Pública, modificado pola Lei 10/1989, do 10 de xullo, establece no punto 3.c) que formarán parte, como vogais do Consello Reitor, cinco expertos no eido de Administración pública.
De acordo co anterior, mediante o Decreto 225/2007, do 29 de novembro, e o Decreto 153/2011, do 14 de xuño, efectuouse a designación, como vogais do Consello Reitor da EGAP, de cinco expertos no eido de Administración pública.
Finalizado o seu mandato como membros do Consello Reitor, segundo o disposto no artigo 7 da Lei 4/1987, procede agora efectuar a designación por un novo período de cinco expertos no eido de Administración pública como vogais do Consello Reitor da EGAP.
Na súa virtude, por proposta do conselleiro de Presidencia, Administracións Públicas e Xustiza e logo de deliberación do Consello da Xunta de Galicia na súa reunión do día vinte e seis de xullo de dous mil doce,
DISPOÑO:
Artigo único
Nomear como vogais do Consello Reitor da Escola Galega de Administración Publica, na súa calidade de expertos no eido da Administración pública a:
– José Luis Carro Fernández-Valmayor, catedrático de dereito administrativo da Universidade de Santiago de Compostela.
– José Luis Meilán Gil, catedrático emérito de dereito administrativo da Universidade da Coruña.
– Antonio Piña Alonso, maxistrado decano dos xulgados de Ourense.
– Roberto Blanco Valdés, catedrático de dereito constitucional da Universidade de Santiago de Compostela.
– Ángel Gómez-Iglesias Casal, catedrático de dereito romano da Universidade de Santiago de Compostela.
Agradecer a Amelia Valcárcel Bernaldo de Quirós, conselleira electiva do Consello de Estado e catedrática de filosofía moral na Universidade Nacional de Educación a Distancia, e a Álvaro Rodríguez Bereijo, catedrático de dereito financeiro e tributario da Universidade Autónoma de Madrid, os servizos prestados.
Disposición derradeira
Este decreto entrará en vigor o día seguinte ao da súa publicación no Diario Oficial de Galicia.
Santiago de Compostela, vinte e seis de xullo de dous mil doce
Alberto Núñez Feijóo
Presidente
Alfonso Rueda Valenzuela
Conselleiro de Presidencia, Administracións Públicas e Xustiza