Segundo se recolle na Lei 9/2010, do 4 de novembro, de augas de Galicia, correspóndelle á Administración hidráulica de Galicia a elaboración dos plans de seca a que se refire o artigo 27 da Lei 10/2001, do 5 de xullo, do plan hidrolóxico nacional, no ámbito das bacías intracomunitarias.
No Plan hidrolóxico da demarcación hidrográfica de Galicia-Costa, aprobado polo Real decreto 1332/2012, do 14 de setembro, recóllese na memoria e no Programa de medidas a necesidade de dispoñer dun plan de seca para a demarcación hidrográfica de Galicia-Costa, co obxecto de ter un instrumento que permita á Administración a toma de decisións e a adopción de medidas que permitan minimizar os efectos adversos das situacións de seca.
Con base no anterior, Augas de Galicia desenvolveu o Plan de seca da demarcación hidrográfica de Galicia-Costa.
Pola súa banda, a Lei 9/2006, do 28 de abril, sobre avaliación dos efectos de determinados plans e programas no ambiente, recolle no seu artigo 7 a obriga de que o órgano promotor do plan integre no procedemento os aspectos ambientais e que lle corresponde elaborar un informe de sustentabilidade ambiental de acordo coa amplitude, nivel de detalle e grao de especificación determinado polo órgano ambiental, que formará parte integrante do plan en cuestión.
A estrutura do informe de sustentabilidade ambiental do Plan de seca da demarcación hidrográfica de Galicia-Costa foi determinada pola Resolución da Secretaría Xeral de Calidade e Avaliación Ambiental, do 3 de agosto de 2012, pola que se aprobou o documento de referencia para a avaliación ambiental estratéxica do Plan de seca da demarcación hidrográfica de Galicia-Costa.
De acordo co anterior e de conformidade co disposto no artigo 10 da Lei 9/2006, do 28 de abril, sobre avaliación dos efectos de determinados plans e programas no ambiente, acórdase someter ao trámite de información pública o Plan de seca da demarcación hidrográfica de Galicia-Costa e o seu correspondente informe de sustentabilidade ambiental.
Os citados documentos poderanse consultar desde o día seguinte á publicación deste anuncio no Diario Oficial de Galicia e, polo período de 45 días, no enderezo electrónico http://augasdegalicia.xunta.es ou nas distintas sedes do organismo de bacía:
a) Augas de Galicia, servizos centrais: praza de Camilo Díaz Baliño, 7-9, 15781 Santiago de Compostela.
b) Augas de Galicia, Servizo Territorial da Zona Hidrográfica de Galicia-Norte: rúa Wenceslao Fernández Flórez, 1-2º, 15005 A Coruña.
c) Augas de Galicia, Servizo Territorial da Zona Hidrográfica de Galicia-Centro: rúa Tomiño nº 16-baixo, 15781 Santiago de Compostela.
d) Augas de Galicia, Servizo Territorial da Zona Hidrográfica de Galicia-Sur: rúa San Salvador, 2-4º, 36201 Vigo.
Durante o mesmo prazo de consulta pública poderanse formular cantas alegacións e/ou
observacións se consideren oportunas, dirixidas á dirección da entidade pública empresarial Augas de Galicia e remitidas por escrito ao seguinte enderezo: Augas de Galicia, servizos centrais, praza de Camilo Díaz Baliño, 7-9, 15781 Santiago de Compostela.
Santiago de Compostela, 21 de novembro de 2012
Francisco Menéndez Iglesias
Director de Augas de Galicia
