O artigo 28.2 da Constitución española recoñece o dereito á folga como dereito fundamental da persoa.
O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG nº 116, do 20 de xuño), entre os que se atopa a sanidade.
O exercicio público da prestación da asistencia sanitaria non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación a este.
O artigo 3 do citado decreto faculta os conselleiros competentes por razón dos servizos esenciais afectados para que, mediante orde e diante de cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.
A folga foi convocada polas organizacións sindicais CC.OO., CIG e UGT, está dirixida a todos os traballadores e traballadoras das empresas e centros de traballo afectados polo convenio colectivo de transporte de enfermos e accidentados en ambulancia na Comunidade Autónoma de Galicia, e levarase a efecto todos os xoves e venres desde as 00.00 horas do día 25 de febreiro ata as 24.00 horas do día 5 marzo de 2013.
Con base no anterior, e despois da audiencia ao comité de folga e aos responsables das prestacións de transporte sanitario no ámbito da folga, a conselleira
DISPÓN:
Artigo 1
A convocatoria de folga que afecta o persoal das empresas e centros de traballo afectados polo convenio colectivo de transporte de enfermos e accidentados en ambulancia na Comunidade Autónoma de Galicia, que terá efecto desde as 00.00 horas do día 25 de febreiro ata as 24.00 horas do día 5 marzo de 2013, enténdese condicionada ao mantemento dos servizos mínimos que se establecen nesta orde.
O ámbito da folga abrangue:
1) Transporte sanitario urxente, organizado e xestionado pola Fundación Pública Urxencias Sanitarias Galicia 061 a través da RTSUG (Rede de transporte sanitario urxente de Galicia). O servizo préstase mediante:
– Ambulancias asistenciais de soporte vital avanzado (AA-SVA) medicalizadas ou UVI móbiles, é dicir, ambulancias tipo C concertadas por US-061, que se corresponden cun total de 10 unidades situadas en 10 bases. O horario de servizo é de 24 horas.
– Ambulancias asistenciais de soporte vital básico (AA-SVB), é dicir, ambulancias tipo B concertadas por US-061 que se corresponden cun total de 101 unidades. O número de bases por provincia é a seguinte: 31 bases na provincia da Coruña con 36 vehículos, 19 bases na provincia de Lugo con 20 vehículos, 14 bases na provincia de Ourense con 15 vehículos, e 23 bases na provincia de Pontevedra con 30 vehículos.
2) Transporte sanitario das altas hospitalarias e traslados intercentros, organizado e xestionado desde os hospitais e prestado con ambulancias tipo convencional, asistencial de soporte vital básico e asistencial de soporte vital avanzado.
3) Transporte sanitario non urxente, xestionado desde os centros e estruturas do Servizo Galego de Saúde e prestado con ambulancias tipo convencional, asistencial de soporte vital básico e vehículos de transporte sanitario colectivo.
4) Transporte sanitario prestado polas empresas que afecten enfermos ou accidentados na Comunidade Autónoma, non incluído nos puntos anteriores.
A Rede de transporte sanitario urxente de Galicia (RTSUG) está organizada de acordo cunha superficie, unha poboación e un complexo mapa de isócronas, onde cada recurso garante o servizo a unha poboación nunha área determinada, cun persoal especificamente formado para este tipo de asistencia, e sobre a base de que poden ocorrer accidentes e darse situacións de urxencia de difícil resolución se non están dispoñibles todos os recursos de transporte urxente, dado que non se pode prever a demanda. O número de ambulancias contratadas está axustado a esa finalidade. En consecuencia, para garantir a protección á saúde da poboación e dar resposta ao 100 % dos servizos solicitados pola Fundación Pública Urxencias Sanitarias 061, neste ámbito imponse unha cobertura do 100 % das unidades.
O resto dos traslados que se establecen como esenciais xustifícanse polas necesidades asistenciais específicas de diferentes grupos, e tamén para garantir a protección do dereito á saúde de pacientes en situacións especiais e aos que calquera demora na asistencia derivada da falta de medios de transporte e asistencia adecuada poida desencadear un risco vital.
Os servizos mínimos que se fixan resultan totalmente imprescindibles para manter a necesaria cobertura asistencial respecto ao transporte sanitario a través das empresas afectadas pola folga, coa finalidade de evitar que se produzan prexuízos graves para a saúde.
Tales mínimos responden á necesidade de compatibilizar o respecto ineludible ao exercicio do dereito á folga coa adecuada atención a enfermos e accidentados que, baixo ningún concepto, poden quedar desasistidos polas características do servizo dispensado.
Os criterios reitores para a determinación do persoal necesario para o mantemento dos servizos esenciais na folga referida son os seguintes:
1) Unha cobertura do 100 % das unidades respecto da atención urxente prestada a través do 061.
2) O 100 % dos servizos de transporte para enfermos que requiran tratamentos continuados de oncoloxía e diálise.
3) Para a realización de traslados inter e intrahospitalarios e doutros servizos que poderán ser demandados polos centros hospitalarios, mantendo como mínimo un vehículo, determinarase o 50 % dos recursos por quendas de traballo, que ten que incluír inescusablemente os vehículos de soporte vital avanzado asignados a cada centro.
4) No traslado para consultas externas e probas diagnósticas en pacientes ambulatorios, cubrirase o servizo no caso de que o paciente necesite padiola.
Os vehículos que resulten precisos para o mantemento dos servizos mínimos, consonte os anteriores criterios reitores, contarán coa dotación mínima de persoal establecida na normativa vixente.
Artigo 2
Con base nos criterios anteriores, no anexo desta orde recóllense as bases e ambulancias asistenciais básicas e avanzadas medicalizadas precisas para cubrir os servizos mínimos durante a folga.
A determinación concreta do persoal que debe cubrir os servizos mínimos será realizada pola dirección da empresa, mediante comunicación nominativa e individual do dito persoal.
A designación deberá ser publicada nos taboleiros de anuncios da empresa con antelación ao comezo da folga.
O persoal designado que desexe exercer o seu dereito de folga poderá instar a súa substitución por outro/a profesional da empresa que voluntariamente acepte o cambio de xeito expreso.
No expediente de determinación de servizos mínimos da empresa, que estará dispoñible para xeral coñecemento do persoal destinatario, deberá quedar constancia dos criterios e xustificación ponderados para determinar os ditos servizos.
Artigo 3
Os paros e alteracións no traballo por parte do persoal necesario para o mantemento dos servizos mínimos determinados serán considerados ilegais para os efectos do establecido no artigo 16.1 do Real decreto lei 17/1977, do 4 de marzo (BOE nº 58, do 9 de marzo).
Artigo 4
O disposto nos artigos anteriores non significará ningún tipo de limitación dos dereitos que a normativa reguladora da folga recoñece ao persoal nesta situación, nin tampouco sobre a tramitación e efectos das peticións que a motiven.
Artigo 5
Sen prexuízo do que establecen os artigos anteriores, deberanse observar as normas legais e regulamentarias vixentes en materia de garantías á poboación e usuarios dos servizos sanitarios. Os altercados ou incidentes que se produzan serán obxecto de sanción de acordo coas normas vixentes.
Disposición derradeira
A presente orde producirá efectos e entrará en vigor o mesmo día da súa publicación no Diario Oficial de Galicia.
Santiago de Compostela, 20 de febreiro de 2013
Rocío Mosquera Álvarez
Conselleira de Sanidade
Anexo
Bases e ambulancias asistenciais básicas e avanzadas medicalizadas precisas para cubrir os servizos mínimos durante a folga
Provincia da Coruña:
A Coruña (3) |
*Narón |
Arteixo |
Negreira |
Arzúa |
Noia |
As Pontes |
Oleiros |
Betanzos |
Ordes |
Boiro |
Ortigueira |
Cambre |
Padrón |
Carballo (2) |
Ponteceso |
Cariño |
Pontedeume |
Cedeira |
Ribeira |
Cee |
Sada |
Cerceda |
Santa Comba |
Ferrol (2) |
Santiago (2) |
Mazaricos |
Teixeiro |
Melide |
Vimianzo |
Muros |
Total provincia da Coruña: 31 bases/36 ambulancias |
Provincia de Lugo:
Becerreá |
Monforte |
Guitiriz |
Navia de Suarna |
Burela |
Palas de Rei |
O Corgo |
A Pontenova |
Chantada |
Quiroga |
A Fonsagrada |
Ribadeo |
*Foz |
Sarria |
Lugo (2) |
Vilalba |
Meira |
Viveiro |
Mondoñedo |
Total provincia de Lugo: 19 bases/20 ambulancias |
Provincia de Ourense:
A Gudiña |
Ourense (2) |
Allariz |
A Pobra de Trives |
Bande |
Ribadavia |
O Carballiño |
Verín |
Castro Caldelas |
Viana do Bolo |
Celanova |
Xinzo de Limia |
Maceda |
Total provincia de Ourense: 14 bases/15 ambulancias |
O Barco |
Provincia de Pontevedra:
A Cañiza |
Nigrán |
A Estrada |
O Grove |
A Guarda |
*Ponteareas (2) |
*Arbo |
Pontevedra (2) |
Bueu |
O Porriño |
**Baiona |
Sanxenxo |
Caldas de Reis |
Redondela |
Cambados |
Silleda |
Cangas |
Tui |
Lalín |
*Vigo (6) |
*Marín |
Vilagarcía |
Moaña |
Total provincia de Pontevedra: 23 bases/30 ambulancias |
Total Galicia: 87 bases/101 ambulancias |
* Estas unidades están operativas 12 horas en horario diúrno. Este mesmo horario correspóndese co de tres das unidades de Vigo e unha das unidades de Ponteareas.
** Esta unidade está operativa doce horas en horario diúrno de luns a venres e vinte e catro horas os sábados e domingos.
Entre paréntese figura o número de recursos cando a base ten máis de un.
• Ambulancias medicalizadas:
A Coruña (2) |
Vigo |
Ferrol |
Mos |
Lugo |
Santiago |
Ourense |
Foz |
Pontevedra |