Coa finalidade de regular diferentes aspectos da modalidade electrónica da taxa fiscal sobre o xogo, a Axencia Tributaria de Galicia está a elaborar o proxecto de orde pola que se regula a xestión, a presentación e o pagamento electrónico da taxa fiscal sobre o xogo realizado a través de máquinas de xogo.
Para esta modalidade do tributo a opción de cumprir as obrigas tributarias dos suxeitos pasivos dun xeito electrónico vén establecida desde hai unha década, e cómpre remarcar a aceptación do procedemento e o éxito do seu funcionamento, que permite nunha única transacción a presentación da autoliquidación da taxa de todas as máquinas con autorización vixente á data do devengo de cada ano. É preciso estender a dita posibilidade ao longo de todo o ano para o cumprimento das obrigas tributarias tamén nos casos de reinicio da explotación da expedición de novas autorizacións e para o caso dos trocos das máquinas con modificacións nas súas características.
Eses motivos fan necesaria a elaboración dunha nova orde que recolla a normativa, hoxe dividida en dúas ordes, e que desenvolva os procedementos electrónicos para a presentación de autoliquidacións de calquera carácter durante todo o ano.
De conformidade co disposto no artigo 42.3 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, cando o contido e a repercusión da disposición o aconsellen, esta será sometida a información pública. Asemade, no artigo 42.5 prevese a posibilidade de abreviar o trámite de información pública ata o mínimo de sete días hábiles cando razóns debidamente motivadas así o xustifiquen. Neste caso considérase urxente, polo propio interese dos contribuíntes, que esta norma entre en vigor o antes posible.
Na súa virtude,
RESOLVO:
Someter a información pública, por un prazo de 7 días hábiles contados desde o seguinte ao da publicación desta resolución, o proxecto de orde polo que se regula a xestión, a presentación e o pagamento electrónico da taxa fiscal sobre o xogo realizado a través de máquinas de xogo.
O proxecto de orde poderase consultar na páxina web da Consellería de Facenda: http://www.conselleriadefacenda.es/web/portal/disposicions
As posibles alegacións presentaranse durante o prazo sinalado, dirixidas ao director da Axencia Tributaria de Galicia, en calquera das oficinas previstas no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 13 de maio de 2013
Ulpiano L. Villanueva Rodríguez
Director da Axencia Tributaria de Galicia