A obra hidráulica correspondente ao proxecto de execución do saneamento e depuración en Tállara, Lousame (A Coruña), de clave: OH.315.1018, é considerada de interese da Comunidade Autónoma, e acórdase sometela ao trámite de información pública.

O proxecto define e valora as actuacións necesarias para proceder á demolición da antiga estación depuradora de augas residuais, cuxas instalacións están obsoletas e non chegan a cubrir as necesidades actuais. Proxéctase a construción dunha nova estación depuradora de augas residuais con capacidade para 800 habitantes equivalentes. A liña de auga constará de desbastamento de groso, desbastamento fino, tratamento primario mediante dous decantadores dixestores, bombeo de paso a tratamento secundario, tratamento biolóxico de leito bacteriano e dixestor anaeróbico con recirculación ao bombeo. Caudal medio 2,2 l/s e máximo 5,27 l/s.

O Concello de Lousame, de conformidade co disposto no artigo 248 do Real decreto 849/1986, do 11 de abril, polo que se aproba o Regulamento do dominio público hidráulico, que desenvolve os títulos preliminar, I, IV, V, VI e VII da Lei 29/1985, do 2 de agosto, de augas, solicitou con data 18 de xullo de 2013 a autorización para a vertedura ao río Tállara dun volume anual medio de 69.030 m3/ano de augas residuais urbanas depuradas procedentes do termo municipal de Lousame (expediente DH.V15.42662). As coordenadas UTM do punto de vertedura son: X=510.306 e Y=4.732.698.

A actuación hidráulica cofinánciase pola Unión Europea a través do Fondo Europeo de Desenvolvemento Rexional (Feder) nun 80 %, no marco do programa operativo Feder Galicia 2007-2013, eixe 3 medio ambiente, contorno natural, recursos hídricos e prevención de riscos, tema prioritario ou medida 46: tratamento de augas residuais. Actuación 3.46.1: actuacións previstas no Plan de saneamento de Galicia, no programa A.X.U.A. (Actuacións para a xestión e a utilización da auga) e nos plans hidrolóxicos de bacía.

Considerando o exposto, ao abeiro da Lei 9/2010, do 4 de novembro, de augas de Galicia, e do Estatuto da entidade pública empresarial Augas de Galicia aprobado polo Decreto 32/2012, do 12 de xaneiro, e segundo o disposto no artigo 12.c do Decreto 59/2013, do 14 de marzo, polo que se desenvolve a Lei 9/2010, do 4 de novembro, de augas de Galicia, en materia de execución e explotación de infraestruturas hidráulicas,

RESOLVO:

Someter, polo prazo de 30 días, contados a partir do día seguinte ao da última publicación deste anuncio de información pública do proxecto de saneamento e depuración en Tállara, Lousame (A Coruña), de clave: OH.315.1018, que se realizará no Diario Oficial de Galicia e no Boletín Oficial da provincia, para os efectos da súa aprobación, e da tramitación da autorización de vertedura DH.15.42662.

O documento técnico pode consultarse, durante o prazo anteriormente sinalado, nas dependencias de Augas de Galicia, sitas na rúa Doutor Maceira, nº 18, baixo, en Santiago de Compostela (A Coruña) e na páxina web augasdegalicia@xunta.es.

O que se fai público para todos os efectos legais e regulamentarios de aplicación na materia e para o seu coñecemento xeral.

Santiago de Compostela, 19 de xullo de 2013

Francisco Menéndez Iglesias
Director de Augas de Galicia