O artigo 24 da nosa constitución garante o dereito fundamental a obteren a tutela efectiva dos xuíces e tribunais a todas as persoas no exercicio dos seus dereitos e intereses lexítimos, e, así mesmo, á defensa e á asistencia de letrado. Este dereito fundamental compleméntase co disposto no artigo 119 da Carta Magna, onde se establece que a xustiza será gratuíta cando así o dispoña a lei e, en todo caso, respecto de quen acredite insuficiencia de recursos para litigar. Polo que atinxe a esta materia, a Comunidade Autónoma de Galicia posúe plenas competencias, xa que a través do Real decreto 2166/1994, do 4 de novembro, lle foron transferidos pola Administración do Estado os medios materiais e económicos para o funcionamento da Administración de xustiza, entre os cales se atopa o aboamento da compensación económica aos colexios de avogados polas actuacións dos seus colexiados no ámbito da asistencia xurídica gratuíta.

Coa entrada en vigor da Lei 1/1996, do 10 de xaneiro, de asistencia xurídica gratuíta, esta materia foi obxecto dunha fonda reforma e como consecuencia do Real decreto 2166/1994, do 4 de novembro, polo que lle foron transferidas pola Administración do Estado a Galicia os medios materiais e económicos para o funcionamento da Administración de xustiza, entre os cales se atopa o aboamento da compensación económica aos colexios de avogados e de procuradores dos tribunais polas actuacións dos seus colexiados no ámbito da asistencia xurídica gratuíta, a Comunidade Autónoma galega realizou o desenvolvemento normativo da dita Lei 1/1996, nun primeiro momento a través do Decreto 146/1997 e, posteriormente, coa pertinente reforma deste para a súa necesaria adaptación ao contexto actual, mediante o vixente Decreto 269/2008, do 6 de novembro, polo que se aproba o Regulamento de asistencia xurídica gratuíta de Galicia, modificado polo Decreto 138/2012, do 21 de xuño.

Por outra banda, con data do 24 de setembro de 2003 a Xunta de Galicia e o Consello da Avogacía Galega asinaron un acordo para establecer o baremo da compensación económica da asistencia xurídica gratuíta destes profesionais, cun ámbito temporal polo que durante o ano 2008 se debería negociar e, se for o caso aprobar, un novo acordo para os vindeiros anos. Por diversas circunstancias non foi posible acadar no ámbito negocial ese acordo novo, e logo das obrigadas conversas co Consello da Avogacía Galega, ambas as dúas institucións acordaron a prórroga do baremo establecido no acordo do ano 2003 nas cantidades de compensación económica que rexeron no ano 2008 actualizadas pola Orde desta consellería do 2 de xullo de 2009, ao tempo que as partes inician un proceso negociador coa finalidade de acadar un acordo para os vindeiros anos.

Así mesmo, a Orde 2 de agosto de 2012 desenvolve a regulación das certificacións e xustificacións trimestrais establecidas no Decreto 269/2008, do 6 de novembro, polo que se aproba o Regulamento de asistencia xurídica gratuíta de Galicia.

A presente orde tramítase ao abeiro do disposto na Orde da Consellería de Economía e Facenda, do 11 de febreiro de 1998, pola que se regula a tramitación anticipada de expedientes de gasto (modificada pola do 27 de novembro de 2000 e a do 25 de outubro de 2001), quedando a eficacia da presente orde sometida á condición suspensiva da existencia de crédito suficiente para financiar as obrigas derivadas dela.

En consecuencia co anteriormente exposto,

DISPOÑO:

Primeiro. A prórroga do Acordo do 24 de setembro de 2003 entre a Xunta de Galicia e o Consello da Avogacía Galega, polo que se estableceu o baremo da compensación económica da asistencia xurídica gratuíta.

Segundo. Durante o cuarto trimestre do ano 2013 e o primeiro, segundo e terceiro trimestres de 2014 as cantidades do baremo da compensación económica da asistencia xurídica gratuíta serán as que rexeron durante o ano 2008, actualizadas pola Orde desta consellería do 2 de xullo de 2009 especificadas no anexo da presente orde. Estas cantidades deberán ser certificadas trimestralmente polos colexios de avogados, seguindo estritamente a ordenación de tipoloxías recollidas no modelo que figura no anexo da presente orde, de acordo co artigo 38.3 do Decreto 269/2008, polo que se aproba o Regulamento de asistencia xurídica gratuíta de Galicia, e tendo en conta o disposto nos puntos primeiro, segundo e terceiro da Orde do 2 de agosto de 2012.

Terceiro. Os avogados percibirán o 100 % da compensación económica correspondente á súa actuación profesional cando acrediten a realización dalgún dos seguintes trámites procesuais:

a) En materia de asistencia letrada ao detido ou preso, unha vez finalizada a intervención profesional e que o avogado presente o parte selado polo órgano xudicial ou policial onde se levou a cabo a asistencia e no cal se recollan os seguintes datos como mínimo:

– Nome e número de colexiado do avogado.

– Nome e DNI do asistido ou asistidos. No caso de estranxeiros, número de pasaporte ou tarxeta de residencia.

– Motivo polo cal o asiste e, se for o caso, da detención e número de dilixencias policiais ou xudiciais.

Cando o colexio de avogados teña establecida unha quenda de garda, pagarase unha única compensación por cada quenda de garda. Se o número de asistencias realizadas a persoas diferentes é superior a cinco dentro dunha mesma garda, o avogado percibirá unha compensación equivalente ao dobre do módulo establecido, sexa cal for o número de asistencias realizadas.

b) Nos procesos penais, a presentación da copia da dilixencia ou solicitude da actuación procesual na que interveña o letrado, ou a apertura do xuízo oral.

c) Nos procesos civís, a presentación da copia da providencia de admisión da demanda ou de ter por formulada a contestación dela.

d) Nos demais procesos, a presentación da copia da dilixencia xudicial acreditativa da intervención do avogado.

e) Nas apelacións civís, a presentación da copia da providencia pola que se admite a trámite o recurso ou, se procede, a comparecencia ante a sala.

f) Nas apelacións penais, a presentación da copia da resolución xudicial en que se teña por formalizado ou impugnado o recurso ou o sinalamento para a vista.

g) Nos recursos de casación formalizados, a presentación da copia da providencia pola que se teña por interposto o recurso.

h) Nos anuncios de recurso de casación que non chegan a ser formalizados, a presentación da copia do anuncio do recurso, debidamente xustificada.

i) Nas transaccións extraxudiciais e informe de insustentabilidade da pretensión, a presentación do documento de transacción subscrito polos interesados ou do informe da insustentabilidade dirixido ao colexio.

j) Nas desistencias extraxudiciais por pasividade do interesado, a presentación de xustificación escrita do letrado.

k) Nas execucións de sentenzas que se produzan transcorridos máis de dous anos despois de ditada resolución xudicial, presentación da copia de petición de execución, debidamente acreditada.

Os documentos referidos poderán ser substituídos pola copia selada polo órgano xudicial da primeira folla do escrito presentado.

Cuarto. En cumprimento do establecido no artigo 44.1 do Decreto 269/2008 e do disposto na Orde do 2 de agosto de 2012, dentro do mes natural seguinte ao da finalización de cada trimestre, o colexio de avogados remitirá á Dirección Xeral de Xustiza unha certificación que conteña os datos relativos ás actuacións realizadas polos profesionais durante ese período nas cales exista recoñecemento expreso do dereito á asistencia xurídica gratuíta, así como unha relación desagregada a que fai referencia a Orde do 2 de agosto de 2012.

Quinto. En cumprimento do establecido no artigo 48 do Decreto 269/2008, do 6 de novembro, e segundo o establecido na Orde do 2 de agosto de 2012, os colexios de avogados deberán remitir a xustificación trimestral dos fondos percibidos aos que se refire o artigo 47 do devandito Decreto 269/2008.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 11 de decembro de 2013

Alfonso Rueda Valenzuela
Vicepresidente e conselleiro de Presidencia, Administracións Públicas e Xustiza

ANEXO
Módulos e bases da compensación económica
Baremos para o cuarto trimestre do ano 2013 e o primeiro, segundo e terceiro trimestre de 2014

Avogados/tipoloxía

Asistencia ao detido ou preso:

Código	Denominación	Módulo
101	Asistencia individualizada	102,73 €

Xurisdición penal:

Código	Denominación	Módulo
201	Procedemento ante o tribunal do xurado	474,53 €
202	Asistencia diaria á vista ante o tribunal do xurado a partir do segundo día	116,74 €
203	Procedemento ordinario por delito	455,30 €
204	Procedemento abreviado de especial complexidade (causa de máis de 1.000 folios)	455,30 €
205	Procedemento por delito contra a seguranza do tráfico (alcoholemias)	233,49 €
206	Procedemento penal abreviado	338,55 €
207	Procedemento de axuizamento rápido de delitos sen conformidade	350,23 €
208	Procedemento de axuizamento rápido de delitos con conformidade	233,49 €
209	Xuízo de faltas	151,76 €
2010	Menores. Proceso terminado con sentenza	233,49 €
2011	Menores. Proceso con outras formas de terminación	175,12 €
2012	Recurso ante o xulgado de vixilancia penitenciaria con intervención preceptiva ou designación de avogado por requirimento xudicial, conforme o artigo 21 da Lei de asistencia xurídica gratuíta	157,61 €
2013	Saídas a centros de prisión (máximo dúas saídas por proceso)	19,85 €
2014	Desprazamentos para a asistencia a xuízo oral (avogados con despacho oficial nun partido xudicial distinto do da sede do xulgado do penal ou da audiencia provincial)	40,86 €
2015	Recursos de apelación. Proceso por delito	157,61 €
2016	Recursos de apelación. Xuízo de faltas	128,41 €
2017	Defensa xurídica inmediata da muller en dilixencias policiais, tramitación da orde de protección e procedementos administrativos que deriven directa ou indirecta de violencia doméstica	102,73 €

Xurisdición civil:

Código	Denominación	Módulo
301	Procedemento ordinario	350,23 €
302	Xuízo verbal	233,49 €
303	Proceso matrimonial contencioso completo	350,23 €
304	Proceso matrimonial de mutuo acordo	189,81 €
305	Medidas provisionais previas á demanda	93,40 €
306	Modificación de medidas	326,89 €
307	Proceso sobre filiación, paternidade ou capacidade, agás expedientes do artigo 763 da LAC	233,49 €
308	Monitorio	116,74 €
309	Actuación nun proceso como contador partidor	253,08 €
3010	Proceso de división xudicial de patrimonios	175,12 €
3011	Execucións de títulos xudiciais con oposición e posteriores a dous anos	175,12 €
3012	Cambiario e execución de títulos non xudiciais	175,12 €
3013	Expedientes de xurisdición voluntaria e expedientes de internamento non voluntario por razón dun trastorno psíquico	175,12 €
3014	Recursos de apelación	157,61 €

Xurisdición contencioso-administrativa:

Código	Denominación	Módulo
401	Recurso contencioso-administrativo	338,55 €
402	Recurso contencioso-administrativo. Procedemento abreviado	233,49 €
403	Vía administrativa (estranxeiría e asilo)	116,74 €
404	Recursos de apelación	157,61 €
405	Entrada en domicilio	102,73 €

Xurisdición social:

Código	Denominación	Módulo
501	Procesos laborais (ordinarios e especiais)	258,35 €
502	Recursos de suplicación	157,61 €

Xurisdición militar:

Código	Denominación	Módulo
601	Proceso íntegro	221,81 €

Recursos de casación e amparo:

Código	Denominación	Módulo
701	Recurso de casación	350,23 €
702	Recurso de casación cando non se formaliza e hai só anuncio	49,11 €
703	Recurso de amparo	350,23 €

Actuacións extraprocesuais:

Código	Denominación	Módulo
801	Transaccións extraxudiciais	(*) 75 %
802	Informe motivado da insustentabilidade da pretensión	76,57 €
803	Desistencia previa ao proceso por pasividade da persoa axuizable, estudo e preparación do asunto, previa á presentación da demanda	(*) 30 %

Normas xerais:

Código	Denominación	Módulo
901	Sometemento	(*) 30 %
902	Execución da sentenza posterior aos dous anos de recaída a resolución xudicial, agás na xurisdición civil	(*) 30 %

(*) Sobre o módulo aplicable ao procedemento