Con data do 26 de xullo de 2013, publicouse no Diario Oficial de Galicia a Resolución do 11 de xullo de 2013, da Dirección Xeral de Mobilidade, pola que se convocou ás asociacións profesionais de transportistas e de empresas de actividades auxiliares e complementarias do transporte por estrada para que acreditasen a súa representatividade, co fin de revisar a composición do Comité Galego de Transportes por Estrada.
Na referida resolución habilitouse un prazo, comprendido entre o día seguinte ao da publicación da resolución e o 20 de setembro de 2013, ambos os dous incluídos, en que aquelas asociacións e federacións que o desexasen debían achegar a documentación acreditativa da súa representatividade no comité.
Unha vez rematado o prazo establecido, efectuados os requirimentos de emenda e logo do exame da documentación presentada, considérase procedente abrir, de conformidade co disposto no artigo 86.1 da Lei 30/1992, do 26 de novembro, de réxime xurídico das administracións públicas e do procedemento administrativo común, un período de información pública no prazo de 10 días contado a partir do día seguinte ao de publicación desta cédula, en que calquera interesado poida comparecer, examinar e facer alegacións á documentación contida nos expedientes que se atopan en tramitación.
Co obxecto de facilitar o acceso á documentación achegada, esta será exposta na páxina web da Dirección Xeral de Mobilidade:
http://www.cmati.xunta.es/seccion-tema/c/Conducion?content=Direccion_Xeral_Mobilidade/Procedementos_formularios/seccion.html&std=outros-formularios-dx-mobilidade.html
Santiago de Compostela, 16 de decembro de 2013
Mª del Camino Triguero Salas
Directora xeral de Mobilidade