Visto o expediente para outorgamento de autorización administrativa e aprobación do proxecto de execución da instalación eléctrica que a continuación se describe:

Solicitante: Unión Fenosa Distribución, S.A.

Domicilio social: travesía de Vigo, 204, 36207 Vigo.

Denominación: recuamento LMT en San Bieito, polígono 10, parcela 396 (eixe atlántico de alta velocidade, tramo Vigo-A Coruña, p.q. 42+600).

Situación: Portas.

Características técnicas: LMT aérea a 20 kV con condutor tipo LA-56 E LA-110, de 387 metros de lonxitude, con orixe no apoio existente nº 46 da LMTA TIB805 e final no apoio existente nº 51 desta (elevación do tramo). LMT aérea a 20 kV con condutor LA-56 de 24 metros de lonxitude, con orixe no apoio 48 proxectado do tramo a elevar e final no apoio existente nº 1 da LMTA ao CT túnel Illó boca norte. As instalacións están situadas no lugar de San Bieito, polígono 10, parcela 396, Portas.

Cumpridos os trámites ordenados na Lei 54/1997, do 27 de novembro, do sector eléctrico, e no capítulo II, título VII do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, esta xefatura territorial resolve:

Autorizar e aprobar o proxecto de execución das devanditas instalacións cuxas características se axustarán en todas as súas partes ás que figuran nel e ás condicións técnicas e de seguridade establecidas nos regulamentos de aplicación, e nos condicionados establecidos polos ministerios, organismos ou corporacións que constan no expediente.

Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

O prazo de posta en marcha da instalación, de acordo co artigo 131 do Real decreto 1955/2000, será de 12 meses a partir da recepción da presente resolución. Para efectos da posible solicitude de prórroga, o peticionario deberá ter en conta o disposto no capítulo IV do Decreto 1775/1967, do 22 de xullo.

Contra a presente resolución poderá interpoñer recurso de alzada ante o conselleiro de Economía e Industria no prazo dun mes contado a partir de día seguinte ao da notificación desta resolución; tamén poderá interpoñer calquera outro recurso que estime pertinente ao seu dereito.

Pontevedra, 29 de maio de 2014

Ignacio Rial Santomé
Xefe territorial de Pontevedra