Unha vez que se emitiu informe favorable da proposta de deslinde con predios particulares presentada pola Comunidade de Montes Veciñais en Man Común de Vilacova, concello de Salvaterra do Miño, e de acordo co disposto no artigo 54.1 da Lei 7/2012, do 28 de xuño, de montes de Galicia, sobre o procedemento de deslinde de montes veciñais con propiedades particulares, acórdase sinalar a data do sábado 4 de outubro, ás 9.00 horas, para o comezo das operacións de apeo, que comezarán no punto denominado Coto de Outeiro Longo, no límite co monte de Taboexa.

Emprázanse os lindeiros e as persoas que acrediten un interese lexítimo para que asistan ao mencionado acto.

Ábrese un prazo dun mes, a partir do día seguinte ao desta publicación, para que os que se conceptúen con dereito á propiedade do monte ou de parte del e os lindeiros que desexen comparecer, para presentar alegacións e os títulos que acrediten a propiedade nas dependencias do Centro Cultural Outeiro, s/n, 36868 Salvaterra de Miño.

O que se fai público para xeral coñecemento.

Pontevedra, 12 de agosto de 2014

Miguel Ángel Pérez Dubois
Xefe territorial de Pontevedra