Dentro do programa anual de actividades para o ano 2015 da Academia Galega de Seguridade Pública (Agasp), aprobado polo Consello Reitor deste organismo con data 23 de decembro de 2014, conscientes da importancia da actualización permanente e da súa especialización, convocase un curso de carácter básico e reciclaxe de coñecementos e operativa policial, conforme as seguintes bases:
Primeira. Obxectivos
Obter unha actualización normativa de acordo cos últimos cambios lexislativos que afectan directamente a función policial, así como dos procedementos básicos de operativa e intervención policial.
Segunda. Destinatarios/as
Este curso está dirixido ao persoal dos corpos de Policía local de Galicia que ingresaran neles e realizaran o correspondente curso selectivo cunha antigüidade de mais de 5 anos e que se atopen na situación de servizo activo sen incapacidade temporal ou en excedencia por coidado de familiares.
A baixa laboral por incapacidade temporal impide a participación nas accións formativas convocadas, polo que, de producirse esta situación, os/as interesados deberán comunicar tal situación ao Servizo de Formación en Seguridade Pública da Agasp, competente na materia, de xeito inmediato; no caso de non facelo, serán penalizados coa non participación en accións formativas da Agasp nun ano contado desde o día seguinte a que se teña coñecemento do feito e, no caso de estar realizando efectivamente un curso, non se emitirá ningún diploma (nin de asistencia, nin de aproveitamente.
Será revisable a admisión de persoas en baixa laboral por incapacidade temporal cando esta veña producida por accidente de traballo recoñecido como tal e a asistencia ao curso non interfira na súa recuperación.
Terceira. Desenvolvemento da actividade
• Lugar: Academia Galega de Seguridade Pública.
• Datas: do 25 ao 29 de maio de 2015, en réxime de internado.
• Horario: desde as 10.00 horas do día 25 de maio ata as 14.00 horas do día 29 de maio de 2015.
• Número de prazas: 25.
• Horas lectivas: 45.
• Contido: actualización normativa e práctica en seguridade cidadá, tráfico, seguridade viaria e policía administrativa.
Cuarta. Solicitudes
1. O persoal que desexe participar neste curso deberá cubrir o formulario de matrícula telemática dispoñible na páxina web da Agasp (http://agasp.xunta.es), non se admitirá ningunha outra forma ou modelo de solicitude.
2. A falsidade ou ocultación de datos esenciais para a selección das persoas dará lugar á exclusión automática da xornada, así como á imposibilidade de participar en ningún outro curso durante o prazo dun ano computado no prazo dun ano desde o momento en que se detecte o feito.
3. O prazo de presentación de solicitudes será de dez (10) días naturais desde a publicación desta resolución no DOG.
Quinta. Admisión
A Agasp publicará na súa páxina web a relación das persoas seleccionadas para participar no curso, cunha antelación mínima de dez (10) días naturais á data de inicio.
A renuncia non xustificada ou acreditación documental da causa que a produce suporá a exclusión da persoa seleccionada nos seguintes dez cursos que convoque o Servizo de Formación en Seguridade Pública da Agasp e nos cales a persoa figure como posible destinataria, sen contar edicións repetidas, cursos xa realizados e que polo menos teñan a mesma carga horaria do curso polo que foi penalizado.
Sexta. Asistencia
1. Obrigatoria.
2. O alumnado deberá asistir co uniforme regulamentario.
A Estrada, 16 de abril de 2015
Luis Menor Pérez
Director xeral da Academia Galega de Seguridade Pública