O 30 de xaneiro de 2015 publicouse no Diario Oficial de Galicia a Orde do 29 de decembro de 2014 pola que se establecen as bases reguladoras para a concesión de axudas a entidades colaboradoras de pesca fluvial para o fomento da riqueza piscícola e se convocan para o ano 2015.
No artigo 17 da citada orde establécese que o prazo para a xustificación da fin das actividades e do pagamento de conceptos correspondentes a elas finalizará o día 16 de outubro de 2015 e que para percibir o importe da axuda a beneficiaria deberá presentar, antes do vencemento do prazo de xustificación, a documentación que se indica no citado artigo.
O número de solicitudes presentadas, a necesidade de efectuar un gran número de requirimentos para completar a documentación presentada coa solicitude ou emenda de erros, ademais do breve período de tempo outorgado aos adxudicatarios para xustificar o gasto, imposibilita o cumprimento dos prazos establecidos na orde para a xustificación da fin das actividades e do pagamento de conceptos correspondentes a elas, polo que é procedente ampliar o prazo de xustificación previsto na Orde do 29 de decembro de 2014.
En virtude do exposto, e no uso das facultades que teño conferidas pola Lei 1/1983, do 22 de febreiro, reguladora da Xunta e da súa Presidencia,
DISPOÑO:
Artigo único. Modificación do punto 1 do artigo 17 da Orde do 29 de decembro de 2014 pola que se establecen as bases reguladoras para a concesión de axudas a entidades colaboradoras de pesca fluvial para o fomento da riqueza piscícola e se convocan para o ano 2015
O artigo 17.1 da referida orde queda redactado nos seguintes termos:
«1. O prazo para a xustificación da fin das actividades e do pagamento de conceptos correspondentes a elas finalizará o día 16 de novembro de 2015».
Disposición adicional primeira
A modificación establecida non supón a apertura dun novo prazo de presentación de solicitudes de axudas.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 8 de outubro de 2015
Beatriz Mato Otero
Conselleira de Medio Ambiente e Ordenación do Territorio