Mediante a Resolución do 30 de novembro de 2015 (DOG núm. 243, do 22 de decembro), establécense as bases reguladoras para a concesión, en réxime de concorrencia competitiva, das axudas do programa Conecta Peme e procédese á súa convocatoria para o ano 2016.
No artigo 22 da devandita resolución establécese un prazo dun mes, contado desde o día seguinte ao da publicación da resolución no Diario Oficial de Galicia, para a presentación de solicitudes, prazo que finaliza o próximo día 22 de xaneiro.
Ao coincidir numerosos días inhábiles durante o prazo de presentación de solicitudes é aconsellable unha ampliación deste prazo co obxecto de evitar prexuízos ás persoas interesadas en participar nesta convocatoria.
En consecuencia, de conformidade co disposto no artigo 49 da Lei 30/1992, do 26 de novembro, de réxime xurídico das administracións públicas e do procedemento administrativo común,
RESOLVO:
Artigo único. Ampliación do prazo de presentación de solicitudes
Ampliar ata o 9 de febreiro, inclusive, o prazo de presentación de solicitudes previsto no artigo 22 da Resolución do 30 de novembro de 2015 pola que se establecen as bases reguladoras para a concesión, en réxime de concorrencia competitiva, das axudas do programa Conecta Peme para fomentar a cooperación entre as pemes e os demais axentes do Sistema rexional de innovación, a través do apoio a proxectos de investigación e innovación orientados ao mercado e aliñados cos retos e prioridades identificados na RIS3 para Galicia, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020, e se procede á súa convocatoria para o ano 2016 (código de procedemento IN852A).
Santiago de Compostela, 20 de xaneiro de 2016
Manuel Antonio Varela Rey
Director da Axencia Galega de Innovación