O Concello de Poio formula proposta relativa á clasificación do posto de tesouraría-recadación do Concello, reservado a funcionarios/as con habilitación de carácter nacional, pertencente á subescala de intervención-tesouraría, conforme o acordo adoptado polo Pleno en sesión do día 27 do outubro de 2015, sobre creación da praza-posto de tesouraría reservado a funcionarios de habilitación de carácter nacional. Logo de publicado no Boletín Oficial da provincia núm. 214, do 5 de novembro de 2015, sen que se presentase alegación ningunha, o dito acordo quedou definitivamente aprobado.

O artigo 92 bis da Lei 7/1985, do 2 de abril, reguladora das bases do réxime local, modificada pola Lei 27/2013, do 30 de decembro, de racionalización e sustentabilidade da Administración local, establece a previsión xeral de que as funcións de contabilidade, tesouraría e recadación teñen o carácter de funcións públicas necesarias reservadas a funcionarios da Administración local con habilitación de carácter nacional en todas as corporacións locais.

Por todo isto, en aplicación do establecido nos artigos 2 e 9 do Real decreto 1732/1994, do 29 de xullo, modificado polo Real decreto 834/2003, do 27 de xuño, e demais normativa concordante de aplicación, e no uso das facultades que lle confire o artigo 15.e) da Lei do emprego público de Galicia, en relación co artigo 241 da Lei 5/1997, do 22 de xullo, de Administración local de Galicia, e a Orde do 14 de maio de 2013 sobre delegación de competencias,

DISPÓN:

Primeiro. Clasificar o posto de traballo de tesouraría-recadación, reservado a funcionarios/as con habilitación de carácter nacional pertencente á subescala intervención-tesouraría, do Concello de Poio, que se clasifica como se especifica no anexo que se xunta á dita resolución.

Segundo. Contra esta resolución, que pon fin á vía administrativa, poderase interpoñer recurso potestativo de reposición, ante a Vicepresidencia e Consellería de Presidencia, Administracións Públicas e Xustiza, no prazo dun mes contado desde o día seguinte ao da súa publicación, de conformidade co establecido na Lei 30/1992, do 26 de novembro, ou poderá impugnarse directamente, ante a xurisdición contencioso-administrativa, no prazo de dous meses contados desde a mesma data, segundo o disposto no artigo 46 en relación co 14 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 16 de febreiro de 2016

José Alberto Pazos Couñago
Director xeral de Administración Local

ANEXO

Corporación: Poio.

Posto: tesouraría-recadación.

Subescala: intervención-tesouraría.

Forma de provisión: concurso.