O artigo 28.2 da Constitución española recoñece, como dereito fundamental da persoa, o dereito á folga.
O exercicio deste dereito na Administración e nas empresas, entidades e institucións públicas ou privadas, que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG núm. 116, do 20 de xuño), entre os cales se atopa a sanidade.
O exercicio público das funcións en materia de saúde pública non se pode ver afectado gravemente polo lexítimo dereito do exercicio de folga, xa que aquel é considerado e recoñecido prioritariamente en relación con este.
O artigo 3 do citado decreto faculta os conselleiros ou conselleiras competentes, por razón dos servizos esenciais afectados, para que, mediante orde e diante de cada situación de folga, decidan o mínimo de actividade necesaria para asegurar o mantemento de tales servizos, así como para determinar o persoal necesario para a súa prestación.
As organizacións sindicais CIG, UGT e CC.OO. comunicaron a convocatoria dunha folga de carácter indefinido que afectará o persoal da empresa Linorsa que presta servizos de limpeza de determinadas dependencias desta consellería na provincia de Lugo, entre elas aquela en que se encontra o Laboratorio de Saúde Pública de Galicia.
Unha vez outorgada audiencia ao comité de folga,
DISPOÑO:
Artigo 1
A convocatoria de folga referida deberá entenderse condicionada ao mantemento dos servizos mínimos, segundo os criterios que se establecen na presente orde.
Tales mínimos respostan á necesidade de compatibilizar o respecto ineludible ao exercicio do dereito á folga coa protección da saúde.
O criterio reitor que se toma como base para determinar os servizos mínimos é o seguinte: persoal necesario para garantir o 50 % das presenzas habituais.
Os efectivos de servizos mínimos que resulten da dita garantía poderán ampliarse sempre que se xustifique que resulta estritamente necesario para evitar riscos para a saúde.
Artigo 2
A determinación do persoal necesario farao a empresa con base no antedito criterio reitor. A xustificación do número de efectivos debe constar no expediente de determinación de mínimos e debe exteriorizarse adecuadamente para xeral coñecemento dos/das destinatarios/as.
O persoal necesario para a cobertura dos servizos mínimos deberá ser publicado nos taboleiros de anuncios con antelación suficiente.
Artigo 3
A designación nominal de efectivos que deben cubrir os servizos mínimos será realizada pola empresa e notificada ao persoal designado.
O persoal designado como servizo mínimo que desexe exercer o seu dereito de folga poderá instar a substitución da súa designación por outro/a empregado/a que voluntariamente acepte o cambio de forma expresa.
Artigo 4
Os paros e alteracións no traballo por parte do persoal necesario para o mantemento dos servizos mínimos serán considerados ilegais para os efectos do establecido no artigo 16.1 do Real decreto lei 17/1977, do 4 de marzo (BOE núm. 58, do 9 de marzo).
Artigo 5
O disposto nos artigos anteriores non significará ningún tipo de limitación dos dereitos que a normativa reguladora da folga recoñece ao persoal nesta situación, nin tampouco sobre a tramitación e efectos das peticións que a motiven.
Disposición derradeira
Esta orde producirá efectos e entrará en vigor o mesmo día da súa publicación no Diario Oficial de Galicia.
Santiago de Compostela, 21 de abril de 2016
Jesús Vázquez Almuíña
Conselleiro de Sanidade