A Deputación Provincial de Ourense formula proposta relativa á clasificación do posto de interventor-asesor no Gabinete de Asesoría Xurídica e Asistencia a Municipios da Área de Administración Xeral de Deputación Provincial de Ourense, reservado a funcionarios/as con habilitación de carácter nacional pertencentes á subescala de intervención-tesouraría, categoría entrada, conforme o Acordo adoptado polo Pleno en sesión que tivo lugar o día 31 de marzo de 2016, sobre aprobación inicial da modificación da relación de postos de traballo da Deputación Provincial de Ourense para o exercicio 2015. Unha vez sometido a información pública o dito acordo, mediante anuncio inserido no Boletín Oficial da provincia nº 77, do 5 de abril de 2016, durante o prazo de 20 días hábiles, non se formulou ningunha alegación ou reclamación, polo que queda aprobado definitivamente, e publícase o texto íntegro da modificación no Boletín Oficial da provincia nº 101, do 3 de maio de 2016.

O artigo 5.1 do Real decreto 1732/1994, do 29 de xullo, establece que as deputacións provinciais incluirán nas súas relacións de postos de traballo os postos necesarios para garantir o exercicio das funcións reservadas nas entidades locais ás cales se presta o servizo provincial de asistencia.

Por todo isto, en aplicación do establecido nos artigos 2, 5 e 9 do Real decreto 1732/1994, do 29 de xullo, modificado polo Real decreto 834/2003, do 27 de xuño, e demais normativa concordante de aplicación, e en uso das facultades que lle confire o artigo 15.e) da Lei 2/2015, do 29 de abril, de emprego público de Galicia, en relación co artigo 241 da Lei 5/1997, do 22 de xullo, de Administración local de Galicia, e a Orde do 14 de maio de 2013, sobre delegación de competencias,

RESOLVE:

Primeiro. Clasificar o posto de traballo de interventor-asesor no Gabinete da Asesoría Xurídica e Asistencia a Municipios da Área de Administración Xeral de Deputación Provincial de Ourense reservado a funcionarios/as con habilitación de carácter nacional pertencentes á subescala intervención-tesouraría, categoría entrada, da Deputación Provincial de Ourense, que se clasifica como se especifica no anexo que se xunta á dita resolución.

Segundo. Contra esta resolución, que pon fin á vía administrativa, poderase interpor recurso potestativo de reposición, ante a Vicepresidencia e Consellería de Presidencia, Administracións Públicas e Xustiza, no prazo dun mes contado desde o día seguinte ao da súa publicación, de conformidade co establecido na Lei 30/1992, do 26 de novembro, ou poderá impugnarse directamente ante a xurisdición contencioso-administrativa, no prazo de dous (2) meses contados desde a mesma data, segundo o disposto no artigo 46 en relación co 14 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 9 de maio de 2016

José Alberto Pazos Couñago
Director xeral de Administración Local

ANEXO

Corporación: Deputación Provincial de Ourense.

Posto: interventor-asesor.

Subescala: intervención-tesouraría.

Categoría: entrada.

Forma de provisión: concurso.