O representante da titularidade do Centro de Ensinanzas Deportivas Manuel Peleteiro, de Santiago de Compostela, solicita autorización para impartir as ensinanzas conducentes á obtención dos títulos de técnico deportivo e técnico deportivo superior en Baloncesto, reguladas no Real decreto 980/2015, do 30 de outubro, e no Real decreto 982/2015, do 30 de outubro, respectivamente.
O Real decreto 1363/2007, do 24 de outubro, establece a ordenación xeral das ensinanzas deportivas de réxime especial.
O Decreto 410/2003, do 6 de novembro, regula os requisitos e o procedemento para a autorización a centros privados e a centros públicos que non sexan de titularidade da Consellería de Cultura, Educación e Ordenación Universitaria para impartiren ensinanzas de técnicos deportivos na Comunidade Autónoma de Galicia; norma desenvolvida pola Orde desta consellería do 17 de abril de 2008, na cal se determinan o procedemento de autorización e os requisitos mínimos dos espazos administrativos e docentes xenéricos con que deben contar os centros.
Por isto, por proposta da Dirección Xeral de Centros e Recursos Humanos,
DISPOÑO:
Primeiro
Autorizar a apertura e o funcionamento do Centro de Ensinanzas Deportivas Manuel Peleteiro, que queda configurado como se sinala a continuación:
Denominación xenérica: Centro Autorizado de Ensinanzas Deportivas.
Denominación específica: Manuel Peleteiro.
Código do centro: 15033034.
Titular: Herederos de Manuel Peleteiro, S.C.
Domicilio: O Monte Redondo, s/n.
Código postal: 15702.
Concello: Santiago de Compostela.
Provincia: A Coruña.
Ensinanzas que se autorizan:
Grao medio: ensinanzas conducentes á obtención do título de técnico deportivo en Baloncesto (2 unidades para 30 postos escolares cada unha).
Grao superior: ensinanzas conducentes á obtención do título de técnico deportivo superior en Baloncesto (2 unidades para 30 postos escolares cada unha).
Segundo
Antes da posta en funcionamento das ensinanzas que se autorizan, a Xefatura Territorial da Consellería de Cultura, Educación e Ordenación Universitaria da Coruña, logo do informe do Servizo Territorial de Inspección Educativa, aprobará expresamente a relación de persoal que impartirá docencia no devandito centro, así como o equipamento adecuado.
Terceiro
Esta orde dará lugar á correspondente inscrición no Rexistro de Centros da Consellería de Cultura, Educación e Ordenación Universitaria.
Cuarto
O centro queda obrigado ao cumprimento da normativa vixente e a solicitar a oportuna revisión cando teña que modificarse calquera dos datos que se sinalan nesta orde.
Contra esta orde, que esgota a vía administrativa, as persoas interesadas poderán formular recurso potestativo de reposición, ante esta consellería, no prazo dun mes contado a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, ou ben directamente o recurso contencioso-administrativo, no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 20 de xullo de 2016
Román Rodríguez González
Conselleiro de Cultura, Educación e Ordenación Universitaria