Poxa nº S2017R1586001062.
Faise saber que, de conformidade co disposto no artigo 101 do Regulamento xeral de recadación aprobado polo Real decreto 939/2005, do 29 de xullo, se ditaron acordos con data do 9 de maio de 2017 nos cales se decreta o alleamento, mediante poxa, dos bens embargados que se detallan na relación de bens que se van poxar, incluída neste anuncio como anexo I. A poxa terá lugar o día 20 de setembro de 2017, ás 9.30 horas, na Delegación da Axencia Estatal de Administración Tributaria da Coruña, na rúa Comandante Fontanes, 10, 3º andar (salón de actos), da Coruña.
En cumprimento do citado artigo, publícase este anuncio e as persoas que desexen participar na poxa son informadas do seguinte:
Primeiro. Os bens que se poxarán están afectos polas cargas e gravames que figuran na súa descrición e que constan no expediente, as cales quedan subsistentes sen que se lles poida aplicar á súa extinción o prezo do remate.
Segundo. A poxa suspenderase en calquera momento anterior á adxudicación dos bens se se realiza o pagamento do importe da débeda non ingresada, os xuros que se devindicasen ou se devindiquen ata a data do ingreso no Tesouro, as recargas do período executivo e as custas do procedemento de constrinximento.
Terceiro. Os licitadores poderán enviar ou presentar as súas ofertas en sobre pechado desde o anuncio da poxa ata unha hora antes do comezo desta, sen prexuízo de que poidan participar persoalmente na licitación con ofertas superiores ás do sobre. As devanditas ofertas, que terán o carácter de máximas, serán presentadas no rexistro xeral da oficina en que teña lugar a poxa, facendo constar no exterior do sobre os datos identificativos dela. No sobre incluiranse, ademais da oferta e do depósito constituído conforme o punto número catro, os datos correspondentes ao nome e aos apelidos ou a razón social ou denominación completa, número de identificación fiscal e domicilio do licitador.
Os licitadores poderán participar na poxa pola vía telemática, mediante a presentación de ofertas e/ou poxas automáticas a través da páxina web da Axencia Tributaria http://www.agenciatributaria.es, de acordo co establecido na Resolución 5/2002, do 17 de maio (BOE do 24 de maio), da Dirección Xeral da Axencia Estatal de Administración Tributaria, pola que se regula a participación pola vía telemática nos procedementos de alleamento de bens desenvolvidos polos órganos de recadación.
Cuarto. Todo licitador terá que constituír ante a mesa da poxa, con anterioridade a súa realización, un depósito do 20 por cento do tipo de poxa en primeira licitación, agás no caso daqueles lotes en que se acordase unha porcentaxe menor, que en ningún caso será inferior ao 10 por cento. O importe do depósito para cada uns dos lotes está determinado na relación de bens que se van poxar incluída neste anuncio.
O depósito deberase contituír mediante cheque que cumpra os requisitos establecidos no artigo 35.1 do Regulamento xeral de recadación ou por vía telemática a través dunha entidade colaboradora adherida a este sistema, que asignará un número de referencia completo (NRC) que permita a súa identificación, de acordo co establecido na Resolución 5/2002, do 17 de maio (BOE do 24 de maio), do director xeral da Axencia Estatal de Administración Tributaria.
Se os adxudicatarios non satisfán o prezo do remate, este depósito aplicarase á cancelación da débeda, sen prexuízo das responsabilidades en que poidan incorrer polos maiores danos que orixine a falta de pagamento.
Quinto. No caso de que non resulten adxudicados os bens nunha primeira licitación, a mesa de poxa poderá realizar unha segunda licitación, se o considera procedente, fixará o novo tipo de poxa no 75 % do importe da primeira licitación, ou ben anunciará a iniciación do trámite de adxudicación directa que se levará a cabo de acordo co artigo 107 do Regulamento xeral de recadación.
Sexto. O adxudicatario deberá ingresar na data de adxudicación, ou dentro dos quince (15) días seguintes, a diferenza entre o depósito constituído e o prezo da adxudicación.
O ingreso poderase realizar en bancos, caixas de aforros e cooperativas de crédito nas cales non é preciso ter conta aberta. Tamén poden realizar o pagamento mediante cargo na súa conta corrente, a través da internet no enderezo http://www.agenciatributaria.es, na opción: Sede electronica-procedementos, servizos e trámites-trámites destacados. Pagamento de impostos. Para facer o pagamento a través da internet é necesario dispor dun sistema de sinatura electrónica dos admitidos pola Axencia Tributaria.
Así mesmo, se llo solicita á mesa de poxa no acto da adxudicación, o adxudicatario poderá realizar o ingreso do importe total do prezo da adxudicación; neste caso, unha vez comprobado o ingreso, a Axencia Tributaria levantará a retención realizada sobre o depósito constituído polo adxudicatario.
Sétimo. Cando na licitación non se cubra toda a débeda e falten bens por adxudicar, a mesa de poxa anunciará o inicio de trámite de adxudicación directa.
As ofertas poderanse presentar no prazo que para tales efectos comunique a mesa de poxa. Deberanse presentar en sobre pechado no rexistro xeral da oficina onde se realice a poxa e deberán de ir acompañadas, se é o caso, do depósito.
Así mesmo, poderanse presentar ofertas a través da páxina web da Axencia Tributaria http://www.agenciatributaria.es, de acordo co establecido na Resolución 5/2002, do 17 de maio (BOE do 24 de maio), da Dirección Xeral da Axencia Estatal de Administración Tributaria, pola que se regula a participación pola vía telemática nos procedementos de alleamento de bens desenvolvidos polos órganos de recadación.
Rematado o prazo sinalado pola mesa de poxa, esta abrirá as ofertas presentadas e poderá proceder á adxudicación dos bens se algunha delas se considera suficiente nese momento. No caso contrario, anunciarase a extensión do prazo para a presentación de novas ofertas ou mellora das xa existentes, sen prexuízo da validez das ofertas presentadas ata ese momento e así sucesivamente, co límite total de seis meses.
O prezo mínimo de adxudicación directa será o tipo de poxa na primeira licitación cando non se considere procedente realizar unha segunda licitación; se existe segunda licitación, non haberá prezo mínimo.
Oitavo. Cando se trate dun ben inmoble, o adxudicatario poderá solicitar expresamente no acto da adxudicación o outorgamento da escritura pública de venda de inmoble.
Noveno. Cando se trate de bens inscritibles nos rexistros públicos, os licitadores non terán dereito a exixir outros títulos de propiedade distintos aos que se achegan no expediente; os ditos títulos estarán á disposición dos interesados nas oficinas desta dependencia de recadación, onde poderán ser examinados todos os días hábiles a partir da publicación deste anuncio, ata o día anterior ao da poxa. No caso de non estaren inscritos os bens no rexistro, o documento público de venda é un título mediante o cal se pode efectuar a inmatriculación nos termos previstos na lexislación hipotecaria; nos demais casos en que sexa preciso, poderase proceder como dispón o título VI da Lei hipotecaria para levar a cabo a concordancia entre o rexistro e a realidade xurídica.
Décimo. O tipo de poxa non inclúe os impostos indirectos que gravan a transmisión dos ditos bens. Todos os gastos e impostos derivados da transmisión, incluídos os derivados da inscrición no rexistro correspondente do mandamento de cancelación de cargas posteriores, serán por conta do adxudicatario.
O adxudicatario exonera expresamente a AEAT, ao abeiro do artigo 9 da Lei 49/1960, do 21 de xuño, de propiedade horizontal, modificado pola Lei 8/1999, do 6 de abril, da obriga de achegar certificación sobre o estado das débedas da comunidade. Serán por conta deste os gastos que queden pendentes do pagamento.
Décimo primeiro. O procedemento de constrinximento só se suspenderá nos termos e condicións sinalados no artigo 165 da Lei xeral tributaria (Lei 58/2003, do 17 de decembro).
Décimo segundo. Tamén serán de aplicación as condicións que se recollen no anexo II. Para todo o non previsto neste anuncio observarase o preceptuado nas disposicións legais que regulen o acto.
A Coruña, 9 de maio do 2017
Montserrat Casal Bascoy
Xefa da Dependencia Rexional de Recadación da
Delegación Especial da Axencia Estatal da Administración Tributaria de Galicia
ANEXO I
Relación de bens que se van poxar
Poxa nº: S2017R1586001062.
Lote único.
Nº de dilixencia: 151523324570B. Data da dilixencia: 15.9.2015.
Tipo de poxa na primeira licitación: 2.401.406,01 euros.
Tramos: 2.000,00 euros.
Depósito: 480.281,20 euros.
Ben número 1.
Tipo de ben: nave industrial
Localización: rúa Principal, s/n. 32660 Allariz (Ourense).
Inscrita no Rexistro de Allariz.
Tomo: 430; libro: 121.
Folio: 193; predio 13492; inscrición 1.
Referencia catastral : 9226828NG9792N 0001 KY.
Descrición:
Concello de Allariz. Urbana: parcela nº 21-22. Zona industrial, con acceso directo desde a estrada N-525, planta irregular, 13.275 m2 de superficie. Estrema: norte, espazos libres uso público; sur, vía publica e espazo libre uso público; leste, parcela nº 23 de José Fernández Gómez; e oeste, parcela nº 20 e vía. Sobre ese predio, superficie 6.872,57 m2: obra de nova planta: edificacións destinadas a naves industriais, separadas por zona de acceso común; nave 1: zona de fabricación, oficinas e almacén de loxistica, de planta baixa e planta de semisoto, 8.099 m2 de superficie construída e nave 2: comedor, cociña e locais de descanso, de planta baixa, superficie de 178 m2. Total superficie construída 8277 m2.
Valoración: 2.401.406,01 euros.
Cargas: non constan.
ANEXO II
Outras condicións
Poxa nº: S2017R1586001062.
Non existen outras circunstancias, cláusulas ou condicións que se deban aplicar nesta poxa.
