O 28 de agosto de 2017 a Dirección Xeral de Desenvolvemento Rural ditou resolución de modificación do acordo de concentración parcelaria da zona de San Salvador de Meis (Meis-Pontevedra), que se transcribe a seguir:
O acordo de concentración parcelaria da zona de San Salvador de Meis (Meis-Pontevedra) foi aprobado pola dirección xeral de competencia por razón da materia con data do 22 de abril de 2005 e publicado na forma legalmente establecida, e atópase na actualidade pendente de firmeza.
Con posterioridade a estes actos, o Concello de Meis solicitou a cesión da titularidade do predio número 1974 para a instalación dunha estación depuradora de augas residuais.
Vista a proposta da xunta local da zona, a disposición transitoria primeira da Lei 4/2015, do 17 de xuño, de mellora da estrutura territorial agraria de Galicia, a Lei de reforma e desenvolvemento agrario, do 12 de xaneiro de 1973, a Lei 10/1985, do 14 de agosto, de concentración parcelaria para Galicia, modificada pola Lei 12/2001, do 10 de setembro, a Lei 6/2011, do 13 de outubro, de mobilidade de terras, a Lei 39/2015, do 1 de outubro, do procedemento administrativo común das administracións públicas, e demais disposicións vixentes de aplicación ao caso.
Á vista do destino para o cal se solicita o referido predio, e respecto do cal é perfectamente subsumible o suposto recollido no artigo 32 da antedita lei galega, esta dirección xeral resolve:
1. Modificar o acordo de concentración parcelaria da zona de San Salvador de Meis (Meis-Pontevedra),dando de alta como propietario na zona co número 1084 o Concello de Meis e adxudicándolle a titularidade do predio número 1974 –que causa baixa no fondo de terras da zona– para destinalo á instalación dunha estación depuradora de augas residuais, tal e como se recolle na parte expositiva da presente resolución.
2. Transcorridos cinco anos desde a cesión da propiedade sen que os predios fosen destinadas aos fins para os cales son adxudicados, a titularidade dos referidos predios reverterá sobre o fondo de terras da zona, o patrimonio da Comunidade Autónoma, a Axencia Galega de Desenvolvemento Rural (Agader) ou outra entidade que corresponda, segundo o caso.
3. Ordenar que á presente resolución se lle dea a oportuna publicidade, sen prexuízo da súa notificación ao Concello de Meis.
Contra esta resolución, que non é definitiva na vía administrativa, poderase interpor recurso de alzada ante a persoa titular da Consellería do Medio Rural no prazo dun mes, que se contará desde o día seguinte ao da publicación deste anuncio.
Pontevedra, 13 de setembro de 2017
Antonio Crespo Iglesias
Xefe territorial de Pontevedra