O subdirector da Axencia de Protección da Legalidade Urbanística ditou, en substitución do director, o 29 de agosto de 2017, resolución pola cal se impón unha segunda multa coercitiva, como consecuencia de incumprir o ordenado na Resolución do 29 de outubro de 2013, en que se declaraban ilegalizables as obras de ampliación dunha nave industrial, na estrada de Rábade a Cospeito, no quilómetro 4, na parroquia de Damil, no termo municipal de Begonte, por seren incompatibles co ordenamento xurídico vixente e se ordenaba a súa demolición.
Ao non poderse realizar a notificación persoal daquela resolución a Carlos Fernández González, en representación de Fernández y Neira, S.L., mediante a presente cédula, e ao abeiro do disposto no artigo 44 da Lei 39/2015, do 1 de outubro, do procedemento administrativo común das administracións públicas, notifícaselle ao interesado a devandita resolución, por medio dun anuncio publicado no Boletín Oficial del Estado. A súa data de publicación é a que determina a eficacia do acto notificado.
Tendo en conta que, en atención ao previsto no artigo 46 da Lei 39/2015, do 1 de outubro, do procedemento administrativo común das administracións públicas, o acto non se publica na súa integridade, comunícaselle ao interesados que o texto íntegro da resolución que se notifica se encontra á súa disposición nas dependencias da Axencia de Protección da Legalidade Urbanística, situadas no Edificio Witland, Salgueiriños, en Santiago de Compostela, para a súa consulta no prazo de dez (10) días hábiles, que se contarán desde o día seguinte ao da publicación desta cédula. Transcorrido o devandito prazo sen efectuarse a comparecencia, a notificación entenderase producida o día seguinte ao da súa publicación.
Contra esta resolución o interesado pode interpoñer recurso de reposición ante o director da Axencia de Protección da Legalidade Urbanística no prazo dun mes, contado a partir do día seguinte a aquel en que se produza a notificación, ou ben, se non exerce o seu dereito a presentar recurso potestativo de reposición, pode interpoñer directamente recurso contencioso-administrativo, no prazo de dous meses, ante o xulgado do contencioso-administrativo en cuxa circunscrición radique o inmoble afectado, conforme o disposto no artigo 14.1, regra terceira, da Lei 29/1998, reguladora da xurisdición contencioso-administrativa.
Para que conste e lle sirva de notificación ao citado interesado, en cumprimento do disposto no artigo 44 da Lei 39/2015, do 1 de outubro, do procedemento administrativo común das administracións públicas, expido e asino esta cédula.
Santiago de Compostela, 19 de outubro de 2017
José Antonio Cerdeira Pérez
Director da Axencia de Protección da Legalidade Urbanística