BDNS (Identif.): 377092.

De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións (BDNS)
(http://www.pap.minhap.gob.es/bdnstrans/index):

Primeiro. Persoas beneficiarias

As persoas beneficiarias das bolsas serán persoas tituladas universitarias e técnicas superiores de formación profesional con nacionalidade española ou nacionais dun Estado membro da Unión Europea.

Deberán ser naturais de Galicia, ser fillos/fillas de galegos ou acreditar residencia en Galicia desde antes do 1 de xaneiro de 2015.

Segundo. Obxecto

Estas bases teñen por obxecto convocar seis bolsas de formación práctica, cinco dirixidas a persoas licenciadas ou posuidoras de grao universitario e unha dirixida a persoas técnicas superiores de formación profesional en Secretariado ou Asistencia á Dirección, para a realización de prácticas en asuntos europeos nas oficinas da Fundación Galicia Europa en Santiago de Compostela e en Bruxelas durante o ano 2018.

As bolsas reguladas nesta orde concederanse en réxime de concorrencia competitiva e baixo os principios de publicidade, obxectividade, transparencia, igualdade, non-discriminación, eficacia e eficiencia.

Terceiro. Bases reguladoras

As bases reguladoras do procedemento están recollidas na Orde do 1 de decembro de 2017 pola que se autoriza a Fundación Galicia Europa para conceder subvencións e se aproban as bases reguladoras para a concesión de bolsas de formación práctica dirixidas a persoas tituladas superiores universitarias e en formación profesional en asuntos relacionados coa Unión Europea (código de procedemento PR770N).

Cuarto. Importe

O financiamento destas bolsas será de 87.117,28 € que se imputarán á aplicación orzamentaria 05.26.111E.443.02 dos orzamentos xerais da Comunidade Autónoma galega para o ano 2018.

Quinto. Prazo de presentación de solicitudes

O prazo de presentación de solicitudes será dun mes contado a partir do día seguinte ao da publicación desta convocatoria no Diario Oficial de Galicia.

Santiago de Compostela, 20 de decembro de 2017

Alfonso Rueda Valenzuela
Vicepresidente da Fundación Galicia Europa