No Diario Oficial de Galicia núm. 182, do 25 de setembro de 2017, publicouse a Resolución do 15 de setembro de 2017 pola que se dá publicidade do acordo do Consello de Dirección que aproba as bases reguladoras das axudas para o desenvolvemento do Plan Foexga 2017-2018, cofinanciado polo Fondo Europeo de Desenvolvemento Rexional no marco do programa operativo Feder Galicia 2014-2020, así como a selección de entidades colaboradoras que participarán na súa xestión, e se procede á súa convocatoria en réxime de concorrencia non competitiva.
No punto cuarto do resolvo establécense os créditos dispoñibles, así como que o director xeral do Igape ampliará o crédito no caso de que o crédito actual sexa insuficiente para atender todas as solicitudes presentadas, logo de declaración da súa dispoñibilidade, nos termos referidos no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, mediante resolución publicada para o efecto.
Tendo en conta que:
A programación correspondente á convocatoria está resultando de moita aceptación polo que se están a producir incrementos nos custos das accións realizadas que aconsellan un incremento de crédito para atender á demanda que se está a xerar.
Declárase a existencia de crédito dispoñible, pola existencia de remanentes doutras convocatorias financiadas con cargo ao mesmo crédito ou a créditos incluídos no mesmo programa.
Na súa virtude e de conformidade coas facultades que teño conferidas,
RESOLVO:
Artigo único
Ampliar para o exercicio 2018 o crédito establecido na partida orzamentaria 09.A1-741A-7708 en 200.000 €, para as axudas do Igape para o desenvolvemento do Plan Foexga 2017-2018, cofinanciado polo Fondo Europeo de Desenvolvemento Rexional no marco do programa operativo Feder Galicia 2014-2020, que queda establecido do seguinte xeito:
Partida orzamentaria |
Ano 2017 |
Ano 2018 |
Total |
09.A1-741A-7708 |
100.000 |
1.500.000 |
1.600.000 |
Santiago de Compostela, 19 de setembro de 2018
Juan Manuel Cividanes Roger
Director xeral do Instituto Galego de Promoción Económica