Antecedentes de feito:
Primeiro. O Consello da Xunta de Galicia, mediante Acordo do 15 de marzo de 2007 (DOG núm. 76, do 19 de abril), aprobou definitivamente o proxecto sectorial do parque empresarial de Xinzo de Limia. Esta aprobación levaba implícita a declaración da utilidade pública e interese social das obras, instalacións e servizos previstos, así como a necesidade de ocupación, para os efectos de expropiación dos bens e dereitos necesarios para a súa execución. No proxecto sectorial establécese como sistema de xestión a expropiación forzosa.
Segundo. O Consello da Xunta de Galicia, mediante Acordo do 25 de outubro de 2012 (DOG núm. 221, do 20 de novembro) aprobou definitivamente a modificación puntual do proxecto sectorial do parque empresarial de Xinzo de Limia. Nesta modificación divídese a totalidade do ámbito en varios polígonos de actuación independentes.
Terceiro. O día 3 de outubro de 2018 Xestión de Solo de Galicia-Xestur, S.A. (en diante, Xestur Galicia, S.A.), que actúa como promotora do citado parque empresarial, entrega no Instituto Galego da Vivenda e Solo (en diante, IGVS) o proxecto de expropiación dos terreos, bens e dereitos necesarios para a execución do polígono número 2 do proxecto sectorial do parque empresarial de Xinzo de Limia-Ourense para a súa tramitación. Previamente, o promotor solicitou ao Rexistro da Propiedade de Xinzo de Limia que expedise as certificacións de dominio e cargas de todas as parcelas incluídas no ámbito desta expropiación.
Na citada expropiación actúa como Administración expropiante o IGVS en beneficio de Xestur Galicia, S.A.
Consideracións legais:
Primeira. O procedemento do expediente expropiatorio para a execución do polígono número 2 do proxecto sectorial do parque empresarial de Xinzo de Limia-Ourense, iníciase en virtude da antedita aprobación definitiva do proxecto sectorial e de conformidade cos artigos 117.2 da Lei 2/2016, do 10 de febreiro, do solo de Galicia, e 290.2 do Decreto 143/2016, do 22 de setembro, polo que se aproba o Regulamento da Lei 2/2016, nos que se establece que a expropiación se aplicará por polígonos completos e abranguerá todos os bens e dereitos neles incluídos.
Segunda. O IGVS goza de potestade expropiatoria forzosa, en virtude do artigo 4.2 da Lei 3/1988, do 27 de abril, de creación do IGVS.
Terceira. Trátase dunha expropiación urbanística e, como tal, regulada na Lei 2/2016, do 10 de febreiro, do solo de Galicia, no Real decreto lexislativo 7/2015, do 30 de outubro, polo que se aproba o texto refundido da Lei do solo e rehabilitación urbana e no Decreto 143/2016, do 22 de setembro, polo que se aproba o Regulamento da Lei 2/2016.
Cuarta. O expediente formúlase polo procedemento de taxación conxunta e de acordo co disposto nos artigos 117 e 118 da Lei 2/2016; 42 e seguintes do Real decreto lexislativo 7/2015; e 290 e seguintes do Decreto 143/2016.
Quinta. Para os efectos de fixación do prezo xusto, o seu pagamento ás persoas propietarias e a ocupación dos predios afectados, confeccionouse o oportuno expediente, de acordo coa normativa previamente citada. Este expediente tramitarase polo procedemento de taxación conxunta e ten por obxecto a expropiación polo IGVS dos bens e dereitos necesarios para a execución do polígono número 2 do proxecto sectorial do parque empresarial de Xinzo de Limia-Ourense, tendo Xestur Galicia, S.A. a condición de beneficiaria da expropiación.
Sexta. A persoa titular da Dirección Xeral do IGVS é o órgano competente para asinar a presente resolución, en virtude das competencias conferidas polo artigo 12.2.k) do Decreto 97/2014, do 24 de xullo, polo que se establece a estrutura orgánica do IGVS.
De conformidade co previsto no artigo 118.2 da Lei 2/2016, do 10 de febreiro, do solo de Galicia,
ACORDO:
Primeiro. Aprobar inicialmente o proxecto de expropiación forzosa polo procedemento de taxación conxunta dos bens e dereitos que se precisan ocupar para a execución do polígono número 2 do proxecto sectorial do parque empresarial de Xinzo de Limia-Ourense.
Segundo. Someter a información pública polo prazo dun mes, mediante inserción de anuncios no Diario Oficial de Galicia e nun xornal dos de maior circulación na provincia, o citado proxecto de expropiación forzosa, para que aquelas persoas que poidan resultar interesadas formulen as observacións e reclamacións que xulguen convenientes, en particular, no que atinxe á titularidade ou valoración dos seus respectivos dereitos.
Así mesmo, darase audiencia ao concello de Xinzo de Limia e notificarase ao Ministerio Fiscal e á Delegación Provincial do Ministerio de Economía e Facenda e, para os efectos previstos no artigo 44 da Lei 39/2015, do 1 de outubro, do procedemento administrativo común das administracións públicas, publicarase no Boletín Oficial del Estado.
Igualmente, o expediente estará exposto polo prazo dun mes á disposición das persoas interesadas no concello de Xinzo de Limia, nas oficinas de Ourense de Xestur Galicia, S.A., sitas na rúa Valente Docasar, nº 2, baixo, e nas oficinas centrais, sitas no polígono das Fontiñas, Área Central, 1º andar, local 25 Z, de Santiago de Compostela, das 9.00 ás 14.00 horas. Durante o antedito prazo, todas aquelas persoas ou entidades que se consideren afectadas poderán presentar as alegacións que consideren oportunas dirixidas á Área Provincial do IGVS en Ourense, no enderezo rúa Sáenz Díez, nº 1, 32071 Ourense, así como nos lugares establecidos no artigo 16 da Lei 39/2015, do 1 de outubro.
Terceiro. Notificar individualmente as valoración ás persoas que aparecen como titulares de bens e dereitos no expediente, mediante traslado literal da correspondente folla de prezo xusto e da proposta de fixación dos criterios de valoración, para que poidan formular alegacións no prazo dun mes, contado a partir da data de notificación.
Incorpórase como anexo a relación inicial de bens, dereitos e titulares.
Santiago de Compostela, 18 de outubro de 2018
Heriberto García Porto
Director xeral do Instituto Galego da Vivenda e Solo
