O artigo 28.2 da Constitución española recoñece como dereito fundamental da persoa o dereito á folga.

O exercicio deste dereito na Administración e nas empresas, entidades e institucións públicas ou privadas que presten servizos públicos ou de recoñecida e inaprazable necesidade, no ámbito e competencias da Comunidade Autónoma de Galicia, está condicionado ao mantemento dos servizos esenciais fixados no artigo 2 do Decreto 155/1988, do 9 de xuño (DOG núm. 116, do 20 de xuño), entre os que se encontra a sanidade.

O exercicio público da prestación da asistencia sanitaria non se pode ver afectado gravemente polo lexítimo exercicio do dereito de folga, xa que aquel é considerado e recoñecido prioritariamente en relación con este.

O artigo 3 do citado decreto faculta os conselleiros ou conselleiras competentes por razón dos servizos esenciais afectados para que, mediante orde e ante cada situación de folga, decidan o mínimo de actividade necesaria para asegurar o mantemento dos tales servizos, así como para determinar o persoal necesario para a súa prestación.

A organización Solidariedade e Unidade dos Traballadores (SUT) convocou unha folga de 24 horas para o vindeiro 21 de marzo de 2019, dirixida –no seu teor literal– a «todos os traballadores temporais das distintas administracións públicas de todo o Estado e os funcionarios de carreira que queiran sumarse» a ela.

A Xunta de Galicia determinou a procedencia de fixar servizos mínimos para os sectores afectados por esta folga na Administración da Comunidade Autónoma de Galicia. En consecuencia, procede facer o propio no ámbito do Servizo Galego de Saúde e as entidades públicas adscritas ao dito organismo e á Consellería de Sanidade. Para o cal e ante a urxencia da comunicación da folga –recibida tan só uns días antes do seu comezo–, cómpre remitirse aos termos da anterior folga xeral do 8 de marzo de 2019 (publicada no Diario Oficial de Galicia –DOG– núm. 46, do 6 de marzo).

Con base no que antecede,

DISPOÑO:

Artigo único

A convocatoria de folga xeral que terá lugar o 21 de marzo de 2019, realizada pola organización Solidariedade e Unidade dos Traballadores (SUT), deberá entenderse condicionada ao mantemento dos servizos mínimos que se establecen nesta orde.

Os cales, por remisión, serán os contidos na Orde do 1 de marzo de 2019 pola que se determinan os servizos mínimos, no ámbito da asistencia sanitaria, durante as folgas convocadas para o día 8 de marzo de 2019 (publicada no DOG núm. 46, do 6 de marzo de 2019 –páxs. 12719 e ss.–).

Deste xeito aplicarase na súa integridade a devandita orde, tanto no que atinxe ao seu articulado como aos seus anexos, para determinar os servizos esencias que se deberán respectar durante a folga do 21 de marzo de 2019; agás no que concirne ao persoal das empresas e entidades privadas recollidas naquela, por non estaren incluídos no ámbito de aplicación da folga do 21 de marzo, dirixida exclusivamente –á vista do seu teor literal– ao persoal temporal e fixo das distintas administracións públicas.

Disposición derradeira

Esta orde producirá efectos e entrará en vigor o mesmo día da súa publicación no Diario Oficial de Galicia.

Santiago de Compostela, 18 de marzo de 2019

Jesús Vázquez Almuíña
Conselleiro de Sanidade