O Pleno da Corporación Municipal, na sesión ordinaria que tivo lugar na data do 4 de marzo de 2019, adoptou, entre outros, o seguinte acordo:

Primeiro. Aprobar definitivamente o texto refundido do Plan parcial do ámbito do SUR PPI-1 redactado pola entidade Visier Arquitectos, S.L.U.

Segundo. Aprobar os condicionantes ambientais da declaración ambiental estratéxica que finalizou o procedemento de avaliación ambiental estratéxica, así como as recomendacións e condicionantes establecidos polos informes sectoriais e os recabados durante os procesos de participación pública e consultas. Deberá requirirse a empresa redactora do Plan, Visier Arquitectos, S.L.U., a inclusión da seguinte documentación:

a) Incluír un mapa de riscos naturais obrigatorio segundo o texto refundido da Lei do solo e rehabilitación urbana.

b) Incluír un plano de zonificación acústica e os obxectivos de calidade acústica correspondentes ao ámbito reflectirán os índices de ruído Ld, Le e Ln en lugar dos límites de inmisión.

c) Incluír na normativa que para calquera movemento de terras que se pretenda levar a cabo, estableceranse medidas de control ambiental dirixidas a evitar a dispersión da contaminación por lindano, consonte o protocolo que se adoptará pola Consellería e o Concello do Porriño.

d) Incluír medidas preventivas para a conservación do solo na execución de desmontes e recheos asociados á fase de obras, especialmente no sur do ámbito onde se dan as maiores pendentes. Garantirase que non se produce afección directa ou escoamentos ás canles fluviais nin a ZEC.

e) Incluír na normativa do Plan as medidas para a integración paisaxística da actuación e para o mantemento da conectividade ecolóxica coa ZEC Gándaras de Budiño.

f) Indicar na normativa que o proxecto de urbanización que desenvolva o ámbito deberá incluír un proxecto técnico de prevención e defensa contra os incendios forestais.

g) O parágrafo de normativa do Plan fai referencia na parte final do número 4.2.8. a medias ambientais derivadas do ISA que non concreta. Deberá concretarse no citado número as medidas normativas que a memoria ambiental exixe trasladar á normativa.

Terceiro. Publicar a aprobación definitiva no Diario Oficial de Galicia, para efectos do establecido no artigo 82 da Lei 2/2016, do 10 de febreiro, do solo de Galicia. Esta publicación deberá realizarse no prazo dun mes desde a adopción da aprobación definitiva.

Cuarto. Comunicar o acordo de aprobación definitiva, en virtude do artigo 88 da Lei 2/2016, do 10 de febreiro, do solo de Galicia, á Consellería competente en materia de urbanismo, para a súa inscrición no Rexistro de Planeamento Urbanístico de Galicia, achegando un exemplar en soporte dixital, debidamente dilixenciado.

Quinto. Dar traslado dun exemplar do plan parcial aprobado á Dirección Xeral de Calidade Ambiental.

Sexto. Notificar individualmente a aprobación definitiva do Plan parcial a todas as persoas titulares catastrais dos terreos afectados ás cales xa se lles tivese notificado a aprobación inicial deste, de conformidade co artigo 186.4 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia.

O contido íntegro do devandito plan queda á disposición do público na web do Concello www.oporrino.org e na sede electrónica https://oporrino.sedelectronica.gal.

Contra o acordo de aprobación definitiva do citado plan parcial, que pon fin á vía administrativa, por ser unha disposición de carácter xeral, cabe interpor recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous (2) meses, contado desde o día seguinte ao da publicación deste anuncio, conforme o establecido na Lei 29/1998, do 13 de xullo. Todo iso sen prexuízo de interpor calquera outro recurso que se entenda máis procedente e sexa conforme a dereito.

O Porriño, 11 de marzo de 2019

Eva García de la Torre
Alcaldesa