A Orde do 22 de xaneiro de 2019 pola que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao Sistema integrado de xestión e control (DOG núm. 22, do 31 de xaneiro) establece no artigo 11.3 que o prazo para a presentación da solicitude única para o ano 2019 se iniciará o 1 de febreiro e finalizará o día 30 de abril, ambos o dous incluídos.
Este prazo cumpre co disposto no artigo 95.2 do Real decreto 1075/2014, do 19 de decembro, sobre a aplicación a partir de 2015 dos pagamentos directos á agricultura e á gandaría e outros réximes de axuda, que establece con carácter de normativa básica que o prazo de presentación da solicitude única a partir do ano 2016 se iniciará o 1 de febreiro e finalizará o 30 de abril de cada ano.
A disposición derradeira segunda do Real decreto 1075/2014, do 19 de decembro, faculta a persoa titular do Ministerio de Agricultura, Pesca e Alimentación para adaptar as datas e prazos que se establecen no referido real decreto ás exixencias derivadas da normativa da Unión Europea.
O Ministerio de Agricultura, Pesca e Alimentación está tramitando un proxecto de orde pola que se amplía o prazo de presentación da solicitude única, para o ano 2019, establecido no artigo 95 do Real decreto 1075/2014, do 19 de decembro, sobre a aplicación a partir de 2015 dos pagamentos directos á agricultura e á gandaría e outros réximes de axuda, así como sobre a xestión e control dos pagamentos directos e dos pagamentos ao desenvolvemento rural.
En relación co artigo 95 do real decreto mencionado, solicítase que o prazo de presentación da solicitude única se amplíe ao 7 de maio de 2019 incluído, co obxecto de evitar que posibles beneficiarios non poidan presentar a solicitude en prazo por unha previsible saturación das entidades colaboradoras, de acordo coa baixa porcentaxe de presentación de solicitudes coñecida na data de hoxe,
DISPOÑO:
Artigo único
Acórdase modificar o artigo 11.3 da Orde do 22 de xaneiro de 2019 e ampliar o prazo para a presentación en Galicia da solicitude única de axudas da PAC de 2019, que concluirá o 7 de maio de 2019, incluído.
Santiago de Compostela, 23 de abril de 2019
José González Vázquez
Conselleiro do Medio Rural
