Visto o expediente de extinción da Fundación Océano Vivo, presentado ante este protectorado de fundacións de interese galego,
Feitos:
Primeiro. O 21 de maio de 2019 o presidente do padroado da Fundación solicita a ratificación polo protectorado do acordo de extinción da Fundación.
Segundo. A Fundación Océano Vivo constituíuse en escritura pública do 28 de febreiro de 2003, clasificouse como benéfico-social pola Orde da Consellería de Presidencia, Relacións Institucionais e Administración Pública do 27 de maio de 2003, foi declarada de interese galego pola Orde da Consellería de Pesca e Asuntos Marítimos do 23 de xuño de 2003 e está inscrita no Rexistro de Fundacións de Interese Galego, Sección da Consellería do Mar, co número 2003/18.
Terceiro. Os fins da Fundación, segundo consta no artigo 7 dos seus estatutos, son os seguintes: a Fundación ten por obxecto promover, incentivar e executar cantas accións se orienten á recuperación ambiental e económica de Galicia, traballando na recuperación dos danos causados polo afundimento do Prestige, canalizando as axudas públicas que, se for o caso, lle sexan concedidas ou privadas que para este fin se destinen.
Neste contexto, e a título meramente enunciativo, serán fins:
– A recuperación dos ecosistemas litorais, en especial das rías de Galicia, dos efectos dos hidrocarburos liberados no litoral galego tras a vertedura e o afundimento do Prestige.
– A colaboración directa coas confrarías de mariñeiros galegas na recuperación da riqueza natural das costas galegas.
– A recuperación dos valores naturais e turísticos dos ecosistemas galegos ata alcanzar a devolución dos ditos valores ao seu estado anterior á vertedura e ao afundimento do Prestige.
– Actuacións tendentes á recuperación e/ou creación de zonas de cultivo extractivo, a adquisición de crías para a sementeira destinadas ao sector pesqueiro e marisqueiro, así como os investimentos destinados para reparar ou substituír os elementos materiais utilizados no cumprimento dos fins deste artigo 7.
– A promoción dos produtos galegos provintes do mar, tanto nos mercados nacionais como internacionais.
– O investimento en investigación e desenvolvemento, coa finalidade de obter a mellor avaliación dos danos ocasionados polo Prestige e a posterior recuperación dos ecosistemas litorais.
Cuarto. O padroado da Fundación, na súa reunión do 16 de maio de 2019, aprobou o acordo de extinción por se ter realizado integramente o fin fundacional.
Quinto. No expediente tramitado consta a documentación prevista nos artigos 44 e 45 da Lei 12/2006, do 1 de decembro, de fundacións de interese galego, e no artigo 48 do Decreto 14/2009, do 21 de xaneiro, polo que se aproba o Regulamento de fundacións de interese galego.
Consideracións legais e técnicas:
Primeira. O artigo 44 da Lei 12/2006, do 1 de decembro, de fundacións de interese galego, establece entre as causas de extinción das fundacións a realización íntegra do fin fundacional, sendo necesario para tal efecto acordo favorable do padroado ratificado polo protectorado. O mesmo artigo establece que o acordo de extinción inscribirase no Rexistro de Fundacións de Interese Galego.
Segunda. O artigo 54 da Lei 12/2006, do 1 de decembro, de fundacións de interese galego, e o artigo 21 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, establecen o acordo de extinción entre os actos suxeitos a inscrición no Rexistro de Fundacións.
Terceira. A Consellería do Mar é competente para resolver esta solicitude segundo o Decreto 168/2015, do 13 de novembro, polo que se aproba a estrutura orgánica da Consellería do Mar, modificado polo Decreto 39/2018, do 5 de abril, en relación co artigo 7.2.b) do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego.
Polo exposto, e de conformidade co establecido na Lei 12/2006, do 1 de decembro, de fundacións de interese galego, e nos decretos 14/2009, do 21 de xaneiro, polo que se aproba o Regulamento de fundacións de interese galego, e 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, e demais normativa de xeral aplicación,
RESOLVO:
Ratificar o acordo de extinción adoptado polo padroado da Fundación Océano Vivo e ordenar a súa inscrición no Rexistro de Fundacións de Interese Galego.
Contra esta resolución, que pon fin á vía administrativa, poderá interpoñerse recurso potestativo de reposición ante o mesmo órgano que ditou o acto no prazo dun mes, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben interpoñer directamente recurso contencioso-administrativo ante a Sala do Contencioso-Administrativo do Tribunal Superior de Xustiza no prazo de dous meses, de conformidade co disposto na Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 28 de maio de 2019
A conselleira do Mar
P.D. (Orde do 8.9.2017, DOG do 21 de setembro)
Mª Isabel Concheiro Rodríguez-Segade
Secretaria xeral técnica da Consellería do Mar