Anuncio do DOG nº 133 do 2019/7/15

VI. Anuncios

a) Administración autonómica

Consellería do Medio Rural

ANUNCIO do 24 de xuño de 2019, da Dirección Xeral de Defensa do Monte, polo que se publica a resolución das axudas concedidas ao abeiro da Orde do 19 de decembro de 2018 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e en sociedades de fomento forestal (Sofor), cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2019.

O día 22 de xaneiro de 2019 publicouse no DOG a Orde do 19 de decembro de 2018 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocan para o ano 2019.

De conformidade co establecido no artigo 15 da Lei 9/2007, do 13 de xuño, de subvencións de Galicia, e no artigo 17 da Lei 1/2016, do 18 de xaneiro, de transparencia e bó goberno, os órganos administrativos concedentes publicarán no Diario Oficial de Galicia as subvencións concedidas, con expresión da convocatoria, o programa e crédito orzamentario a que se imputen, finalidade da subvención, beneficiario e cantidade concedida.

De conformidade co establecido no artigo 45.1.b) da Lei 39/2015, a notificación realizarase mediante a publicación no Diario Oficial de Galicia, no taboleiro de anuncios e na páxina web da Consellería do Medio Rural. Nesta publicación especificaranse a data da convocatoria, o beneficiario, a cantidade concedida, a finalidade da subvención outorgada, así como a indicación das causas da desestimación, e expresaranse, ademais, os recursos que contra a resolución procedan, o órgano administrativo ou xudicial ante o cal deben presentarse e o prazo para interpoñelos.

En virtude do artigo 2 da Orde do 17 de novembro de 2015, sobre delegación de competencias en diversos órganos da Consellería do Medio Rural (DOG núm. 223, do 23 de novembro), o director xeral de Defensa do Monte:

1. Acorda a publicación do contido da Resolución do 24 de xuño de 2019, das axudas concedidas con cargo á aplicación orzamentaria 14.02.551B.770.0, ao abeiro da Orde do 19 de decembro de 2018 pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e Sofor, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocan para o ano 2019.

Estas axudas sométense ao Regulamento (UE) 702/2014 da Comisión, do 25 de xuño de 2014, polo que se declaran determinadas categorías de axudas nos sectores agrícola e forestal e nas zonas rurais compatibles co mercado interior, en aplicación dos artigos 107 e 108 do Tratado de funcionamento da Unión Europea. Esta medida foi comunicada polo estado co número de axuda SA.43021 ao abeiro do Regulamento (UE) nº 702/2014, e cumpre co Programa de desenvolvemento rural (PDR) de Galicia para a etapa 2014-2020, en que se inclúe a medida 8.3. «Prevención de danos causados por incendios forestais, desastres naturais e catástrofes». O PDR 2014-2020 foi aprobado pola Decisión de execución da Comisión C (2015) 8144, do 18 de novembro de 2015.

A orde estableceu dúas finalidades de subvencións:

a) Liña I: subvencións para o control selectivo de combustible (código de procedemento MR651A).

b) Liña II: subvencións para a construción de puntos de auga (código de procedemento MR651B).

No anexo I relaciónase a listaxe daquelas axudas solicitadas da liña I que foron concedidas e o anexo II, aquelas pertencentes á liña II. Finalmente, o anexo III presenta aquelas axudas desestimadas coa indicación das causas da desestimación. Estas listaxes atópanse na páxina web da Xunta de Galicia.

2. Respecto das axudas concedidas, dispostas nos anexos I e II:

a) As persoas beneficarias deberán presentar, no prazo de 10 días hábiles contados a partir do día seguinte ao da publicación deste anuncio e de xeito electrónico, a documentación descrita no artigo 14 incluíndo un documento descritivo das actuacións que se axuste aos contidos mínimos que se indican no artigo 14.

b) As persoas beneficiarias poderán presentar a súa renuncia no mesmo prazo estipulado no parágrafo anterior, nomeadamente 10 días hábiles. Se o último día de prazo de presentación é inhábil, entenderase prorrogado ao primeiro día hábil seguinte.

c) Presentada a documentación complementaria poderán realizar unha inspección previa funcionarios da Consellería do Medio Rural para verificar as localizacións e superficies propostas de traballo e a súa viabilidade, en particular, a súa elixibilidade, consonte os criterios establecidos na medida 8.3 do PDR de Galicia 2014-2020.

d) Serán motivo de perda de dereito da subvención as causas recollidas no artigo 15, nomeadamente: os informes desfavorables do Servizo de Conservación da Natureza, do Servizo Provincial de Montes ou do Servizo de Prevención de incendios Forestais (SPIF)da xefatura territorial correspondente, a notificación da resolución pola que se dea por transcorrido o prazo do requirimento de emenda da documentación ou a existencia de discrepancias entre as actuacións reflectidas no documento descritivo e as recollidas na resolución de aprobación.

e) A superficie mínima viable para todas as actuacións, tras informe de admisibilidade, deberá chegar, cando menos, ás 5 hectáreas.

f) Os traballos comezarán unha vez que sexa comprobado o documento descritivo, se acade a superficie mínima e sexan favorables os informes preceptivos, se son necesarios, o cal será comunicado polos SPIF da xefatura territorial correspondente aos beneficiarios.

g) No caso de que, durante o prazo de execución, se realice modificación das parcelas Sixpac ou de distribución de superficies de actuación presentadas na documentación complementaria, solicitarase unha modificación mediante unha memoria tecnicamente xustificada, que deberá obter un informe favorable do SPIF da Xefatura Territorial da Consellería do Medio Rural correspondente. O beneficiario non poderá en ningún caso comezar os traballos nas parcelas obxecto de modificación ata que os ditos cambios non conten con informe favorable. As modificacións presentadas non poderán alterar a información e as condicións contidas na presente notificación de resolución.

h) O beneficiario deberá comunicar electrónicamente aos SPIF das xefaturas territoriais da Consellería do Medio Rural o remate das obras. O prazo máximo para o remate e a xustificación dos traballos será 4 meses desde a notificación da resolución de aprobación da subvención e, como máximo, ata o 31 de outubro do ano 2019. A ampliación do prazo de xustificación será por solicitude do beneficiario e este nunca poderá exceder o 31 de outubro do ano 2019, así como cumprir co disposto no artigo 32 da Lei 39/2015, do 1 de outubro.

i) Lémbrase, que, entre outra documentación, a xustificación da axuda e solicitude de pagamento deberá conter as facturas e xustificantes de pagamento efectivos da actividade subvencionada. Os xustificantes de gasto consistirán, de forma xeral, nas facturas orixinais acreditativas dos investimentos, que cumpran as exixencias que establece a Axencia Tributaria. As facturas presentaranse en orixinal e marcaranse cun selo indicando nel a subvención para cuxa xustificación foron presentadas e se o importe do xustificante se imputa total ou parcialmente á subvención, neste último caso, reflectirase a contía exacta que resulte afectada pola subvención. Unha vez marcadas, devolveranse ao beneficiario. O xustificante bancario do pagamento polo beneficiario (xustificante de transferencia bancaria, xustificante bancario de ingreso de efectivo na entidade, certificación bancaria, etc.), en que conste o número da factura obxecto de pagamento, a identificación do beneficiario que paga e do destinatario do pagamento, que deberá coincidir coa persoa, empresa ou entidade que emitiu a factura. No caso de que o xustificante bancario sexa transferencia bancaria, deberá ser orixinal ou copia compulsada, e estará selado pola entidade bancaria.

3. Contra a resolución que se publica cabe a interposición de recurso potestativo de reposición ante o conselleiro do Medio Rural no prazo dun mes, contado a partir do día seguinte ao da súa notificación, ou recurso contencioso administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte ao da súa publicación no Diario Oficial de Galicia.

Santiago de Compostela, 24 de xuño de 2019

Tomás Fernández-Couto Juanas
Director xeral de Defensa do Monte

ANEXO I

Listaxe de solicitudes de axuda da liña I, subvencións para o control selectivo de combustible, concedidas ao abeiro da Orde do 19 de decembro de 2018
pola que se establecen as bases reguladoras para a concesión de subvencións para a prevención dos danos causados aos bosques por incendios, desastres naturais e catástrofes en montes veciñais en man común e en sociedades
de fomento forestal (Sofor), cofinanciadas co Fondo Europeo Agrícola de
Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2019

Expediente: 02150011/2019. NIF: G15520570. Subvención aprobada: 10.860,23 euros.

Descrición	Uds.	Investimento	% sub.	Subvención
Áreas devasa (roza mecanizada con rozadora de cadeas ou similar)	23,88	9.769,31	100,00	9.769,31
Faixas auxilares (roza mecanizada con rozadora de brazo ou similar)	4,00	1.090,92	100,00	1.090,92