Antecedentes:

Primeiro. Por Orde do 30 de decembro de 1986 do Ministerio de Agricultura, Pesca e Alimentación, procedeuse ao recoñecemento da Organización de Produtores Pescagalicia (OPP-31) como organización de produtores no sector de pesca de altura e gran altura.

Segundo. O recoñecemento da Organización de Produtores Pescagalicia (OPP-31) tivo lugar ao abeiro do Real decreto 724/2003, do 13 de xuño, polo que se regulan as organizacións de produtores da pesca e da acuicultura, derrogado polo vixente Real decreto 277/2016, do 24 de xuño, polo que se regulan as organizacións profesionais no sector dos produtos da pesca e da acuicultura. Esta última norma establece o procedemento para o recoñecemento e para a retirada das organizacións de produtores e o artigo 14.1 prescribe que as organizacións de produtores presentarán á administración competente un plan de produción e comercialización anual ou plurianual antes do 31 de outubro do ano no que remate a vixencia do seu plan aprobado.

Terceiro. O artigo 28.1 do Regulamento (UE) núm. 1379/2013 do Parlamento Europeo e do Consello, do 11 de decembro, e a Recomendación 2014/117/UE, da Comisión, do 3 de marzo, relativa ao establecemento e aplicación dos plans de produción e comercialización en virtude do citado regulamento, establecen que as organizacións de produtores deberán presentar un plan de produción e comercialización ás súas autoridades competentes, para a súa aprobación. A presentación de ditos plans de produción constitúe unha obriga para as organizacións de produtores.

Cuarto. Por Resolución do 19 de xaneiro de 2018, a Consellería do Mar aprobou o plan de produción e comercialización presentado pola Organización de Produtores Pescagalicia (OPP-31) para o ano 2018.

Quinto. Á data, a citada organización de produtores non presentou o plan de produción e comercialización para o ano 2019 ou seguintes, para a súa aprobación. Incumpriu deste xeito a normativa de aplicación.

Sexto. De conformidade co disposto no artigo 28.7 do Regulamento (UE) núm. 1379/2013 do Parlamento Europeo e do Consello, do 11 de decembro, a constatación do incumprimento das obrigas previstas no dito artigo por parte desa organización de produtores con respecto da elaboración dos plans de produción e comercialización aprobado por esta dirección xeral, pode levar consigo a retirada do recoñecemento como organización de produtores. Polo tanto, da análise da normativa comunitaria e estatal de desenvolvemento establécese con claridade que as organizacións de produtores deberán axustarse ao disposto nas ditas normas para poder manter o recoñecemento que ostentaban como tales.

Sétimo. No artigo 3.6 do Real decreto 277/2016 establécese que o recoñecemento dunha OPP, así como a súa modificación e retirada do mesmo, corresponderá aos órganos competentes das comunidades autónomas no caso de ámbito autonómico. Así, o recoñecemento será retirado cando as organizacións de produtores deixen de cumprir os requisitos que determinaron o seu recoñecemento, ou incumpran o establecido en canto ao seu funcionamento.

Oitavo. Á data, a citada organización no presentou o plan de produción e comercialización para o ano 2019 para a súa aprobación. Incumpriu deste xeito a normativa de aplicación.

Noveno. Na súa consecuencia ditouse proposta de resolución de retirada de recoñecemento con data 22 de febreiro de 2019. No trámite de audiencia concedido na citada proposta, a Organización de Produtores Pescagalicia (OPP-31) non presentou alegacións.

Décimo. Segundo o artigo 15 do Real decreto 277/2016, do 24 de xuño, polo que se regulan as organizacións profesionais no sector dos produtos da pesca e da acuicultura, a non presentación ou a non aprobación dos informes anuais ou dun plan de produción e comercialización comportará a retirada do recoñecemento da OPP ou AOP.

Fundamentos de dereito:

– Regulamento (CE) núm. 2406/1996 do Consello, do 26 de novembro, polo que se establecen normas comúns de comercialización para determinados produtos pesqueiros.

– Regulamento (CE) núm. 1224/2009 do Consello, do 20 de novembro, polo que se establece un réxime comunitario de control para garantir o cumprimento das normas da política pesqueira común.

– Regulamento (UE) núm. 1379/2013 do Parlamento Europeo e do Consello do 11 de decembro, polo que se establece a organización común de mercados no sector dos produtos da pesca e da acuicultura, modifícanse os Regulamentos (CE) núm. 1184/2006 e (CE) núm. 1224/2009 do Consello e derrógase o Regulamento (CE) núm. 104/2000 do Consello.

– Regulamento de execución (UE) núm. 1418/2013 da Comisión do 17 de decembro de 2013 relativo aos plans de produción e comercialización en virtude do Regulamento (UE) núm. 1379/2013 do Parlamento Europeo e do Consello, polo que se establece a organización común de mercados no sector dos produtos da pesca e da acuicultura.

– Regulamento de execución (UE) núm. 1419/2013 da Comisión do 17 de decembro de 2013, relativo ao recoñecemento das organizacións de produtores e as organizacións interprofesionais, a aplicación extensiva das normas das organizacións de produtores e as organizacións interprofesionais e a publicación dos prezos de activación, de conformidade co Regulamento (UE) núm. 1379/2013 do Parlamento Europeo e do Consello, polo que se establece a organización común de mercados no sector dos produtos da pesca e da acuicultura.

– Recomendación da Comisión, do 3 de marzo de 2014, relativa ao establecemento e aplicación dos plans de produción e comercialización en virtude do Regulamento (UE) núm. 1379/2913 do Parlamento Europeo e do Consello, polo que se establece a organización común de mercados no sector dos produtos da pesca e da acuicultura.

– Lei 3/2001, do 26 de marzo, de Pesca Marítima do Estado (BOE núm. 75, do 28 de marzo), modificada pola Lei 33/2014, do 26 de decembro.

– Real decreto 277/2016, do 24 de xuño, polo que se regulan as organizacións profesionais no sector dos produtos da pesca e da acuicultura, modificado polo Real decreto 956/2017, do 3 de novembro polo que se establece o marco regulador de axudas ás organizacións profesionais do sector da pesca e da acuicultura, cofinanciadas polo Fondo Europeo Marítimo e de Pesca, e as súas bases reguladoras de ámbito estatal.

– Lei 11/2008, do 3 de decembro, de pesca marítima de Galicia (DOG núm. 243 do 16 de decembro) modificada por Lei 6/2009, do 11 de decembro.

– Ademais normativa de aplicación.

Esta consellería en cumprimento do artigo 55.1.a) da Lei 3/2001, do 26 de marzo, de pesca marítima do Estado e do establecido nos artigos 3.6 e 14.1 do Real decreto 277/2016, do 24 de xuño, por incumprimento de obrigas,

RESOLVE:

Retirar o recoñecemento como organización de produtores á Organización de Produtores Pescagalicia (OPP-31) outorgada por orde do 30 de decembro de 1986, por incumprimento das obrigas establecidas para as organizacións de produtores na lexislación vixente, e particularmente por non presentar o plan de produción e comercialización para o ano 2019 ou seguintes, para a súa aprobación.

Contra esta resolución, que pon fin á vía administrativa, cabe interpoñer recurso potestativo de reposición ante a conselleira do Mar no prazo máximo de un (1) mes, ou ben recurso contencioso-administrativo ante o órgano competente desta orde xurisdicional, no prazo de dous (2) meses, contados en ambos os dous casos desde o día seguinte ao da súa notificación.

Santiago de Compostela, 12 de xuño de 2019

Rosa María Quintana Carballo
Conselleira do Mar