O artigo 14, no seu punto 1, letras c) e d) da Lei 8/1985, do 13 de agosto, de eleccións ao Parlamento de Galicia, modificada pola Lei 15/1992, do 30 de decembro, establece que a Xunta Electoral de Galicia está composta, entre outros, por catro vogais maxistrados do Tribunal Superior de Xustiza de Galicia e por catro vogais profesores en activo das facultades de Dereito, de Ciencias Políticas ou de Socioloxía das universidades de Galicia.
Mediante o Decreto 194/2017, do 10 de xaneiro, nomeáronse os membros da Xunta Electoral de Galicia.
O día 8 de xullo de 2019, Santiago Antonio Roura Gómez presentou a súa renuncia ao cargo de vogal ante a Xunta Electoral.
A Mesa do Parlamento de Galicia, mediante escrito dirixido a esta Presidencia, propón un novo vogal da dita xunta electoral, designado de conformidade co establecido no punto 2.b) do devandito artigo 14.
Polo exposto e en cumprimento do disposto no artigo 15.1 da Lei 8/1985, do 13 de agosto, de eleccións ao Parlamento de Galicia,
DISPOÑO:
Artigo único
Nomear, por proposta da Mesa do Parlamento de Galicia, vogal da Xunta Electoral de Galicia o profesor que a seguir se indica:
– Carlos Martínez-Buján Pérez.
Disposición derradeira
Este decreto entrará en vigor o mesmo día da súa publicación no Diario Oficial de Galicia.
Santiago de Compostela, vinte e nove de agosto de dous mil dezanove
Alberto Núñez Feijóo
Presidente