A Orde do 16 de maio de 2019 (publicada no DOG nº 94, o 20 de maio de 2019) pola que se convocan para o ano 2019 as axudas para o apoio aos investimentos nas explotacións agrícolas, para a creación de empresas para as persoas agricultoras mozas, e para a creación de empresas para o desenvolvemento de pequenas explotacións, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, establece no artigo 21 como prazo máximo para presentar a correspondente licenza municipal de obras ou calquera outro permiso administrativo o 15 de setembro do 2019.
E ante as peticións de diferentes organismos para prolongar o dito prazo co fin de poder emitir os preceptivos permisos, cómpre ampliar o dito prazo de presentación da licenza municipal e do resto dos permisos administrativos.
En consecuencia, de conformidade co previsto no artigo 30.1.3 do Estatuto de autonomía de Galicia e no uso das facultades que me confire a Lei 9/2007, do 13 de xuño, de subvencións de Galicia, e no uso das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo único. Modificación do prazo de presentación de permisos administrativos
A data de presentación da licenza municipal e do resto dos permisos administrativos prevista no artigo 21 da Orde do 16 de maio de 2019 ata o 15 de setembro de 2019 amplíase ata o 15 de outubro de 2019, inclusive.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de setembro de 2019
José González Vázquez
Conselleiro do Medio Rural