Mediante Resolución do 2 de agosto de 2019 déuselle publicidade ao acordo do Consello de Dirección do Igape que aproba as bases reguladoras das axudas para a contratación de xestores de internacionalización, cofinanciadas polo Fondo Social Europeo no marco do programa operativo FSE Galicia 2014-2020, e procedeuse á súa convocatoria en réxime de concorrencia non competitiva (DOG nº 154, do 14 de agosto).
No punto segundo logo do «Resolvo:» establécese que o prazo de presentación de solicitudes de axuda comezará o día seguinte ao da publicación desta convocatoria no Diario Oficial de Galicia e finalizará o 29 de novembro de 2019, agás que se produza o suposto de esgotamento do crédito.
No parágrafo terceiro do punto cuarto logo do «Resolvo:» establécese que o prazo de execución dos proxectos rematará na data establecida na resolución de concesión, sen que nunca poida exceder o 30 de outubro de 2020, e o beneficiario deberá presentar a solicitude de cobramento, como máis tarde, o 17 de novembro de 2020.
Tendo en conta que se prevé que estes prazos non serán suficientes para acadar o orzamento asignado a este programa e, coa finalidade de poñer á disposición das pemes galegas que carecen da infraestrutura necesaria para acometer un proceso de internacionalización, un xestor de internacionalización faise aconsellable prorrogar ata o 30 de decembro de 2019 o prazo de presentación de solicitudes, e igualmente faise necesario ampliar o prazo de xustificación da axuda como un maior período de execución.
Por todo o anterior, de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas, e dado que non se causan prexuízos a terceiros,
RESOLVO:
Artigo 1
Ampliar ata o 31 de decembro de 2019 o prazo de presentación de solicitudes previsto no punto segundo do «Resolvo:» da Resolución do 2 de agosto de 2019, pola que se lle dá publicidade ao acordo do Consello de Dirección do Igape que aproba as bases reguladoras das axudas para a contratación de xestores de internacionalización, cofinanciadas polo Fondo Social Europeo no marco do programa operativo FSE Galicia 2014-2020, e se procede á súa convocatoria en réxime de concorrencia non competitiva.
Artigo 2
Ampliar ata o 11 de decembro de 2020 o prazo máximo de execución dos proxectos, o beneficiario deberá presentar a solicitude de cobramento, como máis tarde, o 21 de decembro de 2020.
Artigo 3
Esta resolución entrará en vigor o mesmo día da súa publicación no Diario Oficial de Galicia.
Santiago de Compostela, 26 de novembro de 2019
Juan Manuel Cividanes Roger
Director xeral do Instituto Galego de Promoción Económica