Examinada a solicitude de conciliación formulada polos representantes dos MVMC Testeiro, no concello do Irixo, e montes de Zobra, no concello de Lalín, resultan os seguintes
Feitos:
Primeiro. Con data do 25 de abril de 2017 o presidente da xunta reitora da CMVMC de Carballeda, Munín e Subirol presentou un escrito na Oficina Agraria Comarcal do Carballiño (nº 541/rx 1364830) en que comunicou a realización dun deslindamento entre a citada comunidade e a CMVMC da parroquia de Zobra, no concello de Lalín, na provincia de Pontevedra.
Coa citada solicitude achegou unha memoria descritiva con planos topográficos; unha acta do deslindamento practicado; certificados dos acordos das asembleas xerais de comuneiros; unha acta de conciliación levantada no Xulgado de Paz do Irixo, así como un CD cos arquivos en formato PDF dos documentos e formato SHP dos puntos medidos.
Segundo. O informe do Servizo de Montes da Xefatura Territorial de Ourense do 4 de outubro de 2018 indica que a solicitude foi realizada de acordo co artigo 53 da Lei 7/2012, do 28 de xuño, de montes de Galicia.
O perímetro estremeiro atópase perfectamente definido mediante a acta de deslindamento que consta na documentación e constitúe unha liña poligonal aberta en que o estremo situado no punto nº 6 conflúe co MVMC da Ermida e co MVMC Val de María. Tal e como se recolle na citada acta de deslindamento, a liña poligonal que define o perímetro estremeiro pode considerarse unha mellora da que consta na carpeta-ficha do expediente de clasificación.
De acordo co exposto, o Servizo de Montes emitiu informe favorable ao deslindamento, sen prexuízo da necesidade de que o Servizo de Montes de Pontevedra emitise o correspondente informe favorable, ao estar situado un dos montes veciñais na citada provincia.
Terceiro. O día 14 de decembro de 2018 o Servizo de Montes de Ourense remitiu ao Xurado Provincial o informe favorable emitido polo Servizo de Montes de Pontevedra.
Consideracións legais e técnicas:
Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o xurado provincial de clasificación de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, o Xurado Provincial de Clasificación de Montes Veciñais en Man Común acordou por unanimidade o día 4 de xuño de 2019:
Aprobar o acto de conciliación acadado polas xuntas reitoras dos MVMC Testeiro, no concello do Irixo, e montes de Zobra, no concello de Lalín, de acordo cos informes favorables dos servizos de Montes de Ourense e Pontevedra.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 14 de novembro de 2019
Yago Borrajo Sánchez
Presidente do Xurado Provincial de Clasificación de Montes Veciñais
en Man Común de Ourense