Examinada a solicitude de conciliación formulada polos representantes dos MVMC Rotea, Rozadas, Lamagueiro, Costa e Rocegón e Tapada do Crego, Ribadeira e Estremadoiro, no concello de Lobios, resultan os seguintes

Feitos:

Primeiro. Con data do 10 de xullo de 2018, o presidente da xunta reitora da CMVMC de Delás presentou un escrito no rexistro da Xefatura Territorial da Consellería do Medio Rural en Ourense (nº 3307/rx 1854727) co que achegou documentación dun deslindamento levado a cabo cos veciños de Gustomeao, no concello de Lobios.

Coa citada solicitude achegou copias das actas das asembleas xerais das CMVMC de Delás e a de Gustomeao, A Regada e Sa; unha solicitude de demanda de conciliación e acta de conciliación levantada no xulgado de paz de Lobios; así como un informe e planos.

Posteriormente, o día 12 de novembro de 2018, presentouse a seguinte documentación complementaria: acta de deslindamento asinada polos representantes das comunidades e certificados dos acordos de deslindamento das dúas asembleas.

Segundo. O informe do Servizo de Montes da Xefatura Territorial de Ourense do 21 de decembro de 2018 indica que a solicitude foi realizada de acordo co artigo 53 da Lei 7/2012, do 28 de xuño, de montes de Galicia.

O perímetro estremeiro acordado non afecta outros montes veciñais en man común e, de acordo coa acta de deslindamento e o informe técnico achegados, está perfectamente definido mediante a planimetría e coordenadas UTM de todos os vértices que conforman a liña poligonal aberta que define o límite en cuestión.

A modificación acordada afecta a superficie de ambos os montes, aumentando 2,25 ha a do MVMC Rotea, Rozadas, Lamagueiro, Costa e Rocegón, e diminuíndo a mesma superficie do MVMC Tapada do Crego, Ribadeira e Estremadoiro.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, o Xurado Provincial en Man Común acordou por unanimidade o día 4 de xuño de 2019:

Aprobar o acto de conciliación acadado polas xuntas reitoras dos MVMC Rotea, Rozadas, Lamagueiro, Costa e Rocegón e Tapada do Crego, Ribadeira e Estremadoiro, no concello de Lobios, de acordo co informe favorable do Servizo de Montes do 21 de decembro de 2018.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso- administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 13 de novembro de 2019

Yago Borrajo Sánchez
Presidente del Xurado Provincial de Clasificación
de Montes Veciñais en Man Común de Ourense