Primeiro. Obxecto
O obxecto desta resolución é a convocatoria das probas para a obtención da habilitación do persoal de control de acceso a espectáculos públicos e actividades recreativas e a súa expedición.
As probas rexeranse polo establecido nesta resolución e nas bases xerais recollidas na Orde do 21.4.2010 (DOG núm. 78, do 27 de abril).
Os códigos dos procedementos regulados son PR471A e PR472A.
Segundo. Requisitos de participación
1. Poderán participar nas probas aquelas persoas que pretendan realizar a actividade de control de acceso a espectáculos públicos e actividades recreativas.
2. Para seren admitidos/as á realización das probas, os/as aspirantes deberán posuír, na data de remate do prazo de presentación de solicitudes prevista en cada convocatoria, os seguintes requisitos exixidos polo artigo 5 do Decreto 8/2010, do 21 de xaneiro, polo que se regula a actividade de control de acceso a espectáculos públicos e actividades recreativas:
a) Ser maior de idade.
b) Ter a nacionalidade española ou dalgún dos países que integran a Unión Europea, ou estar en posesión do permiso de residencia e traballo correspondentes.
c) Carecer de antecedentes penais.
d) Ter coñecementos básicos das linguas oficiais de Galicia para poder atender ao público en calquera delas.
e) Aboar a taxa correspondente de acordo co establecido no punto quinto desta resolución.
Terceiro. Documentación complementaria necesaria para a tramitación do procedemento PR471A e PR472A
Documentación complementaria necesaria para a tramitación do procedemento PR471A (admisión ás probas para a obtención da habilitación do persoal de control de acceso a espectáculos públicos e actividades recreativas):
a) Xustificante do ingreso da taxa (código: 30.48.01), co selo da entidade bancaria con indicación da data.
b) Copia do xustificante, de ser o caso, de ter unha discapacidade igual ou superior ao 33 %, no suposto de que non fose expedido pola Xunta de Galicia.
c) Dúas fotografías tamaño carné de identidade co nome e apelidos escritos no dorso.
d) Certificación de aptitude dos niveis de lingua galega oral, iniciación ou perfeccionamento ou equivalentes (Celga 1, 2, 3, 4), cando non fose expedido directamente pola Secretaría Xeral de Política Lingüistica da Xunta de Galicia.
Documentación complementaria necesaria para a tramitación do procedemento PR472A (expedición da habilitación e do distintivo do persoal de control de acceso a espectáculos públicos e actividades recreativas):
a) Xustificante do ingreso da taxa (código: 30.48.02), co selo da entidade bancaria con indicación da data.
Nos supostos de imposibilidade material de obter o documento, o órgano competente poderá requirirlle á persoa interesada a súa presentación ou, na súa falta, a acreditación por outros medios dos requisitos a que se refire o documento, con anterioridade á formación das propostas de resolución.
A documentación complementaria presentarase preferiblemente por vía electrónica. As persoas interesadas responsabilizaranse da veracidade dos documentos que presenten.
Excepcionalmente, a Administración poderá requirir a exhibición do documento orixinal para o cotexo da copia electrónica presentada.
Opcionalmente, as persoas interesadas poderán presentar a documentación complementaria presencialmente en calquera dos lugares e rexistros establecidos na normativa reguladora do procedemento administrativo común.
Sempre que se realice a presentación de documentos separadamente da solicitude deberase indicar o código e o órgano responsable do procedemento, o número de rexistro de entrada da solicitude e o número de expediente, se se dispón del.
No caso de que algún dos documentos que se vaia presentar de forma electrónica superase os tamaños máximos establecidos ou tivese un formato non admitido pola sede electrónica da Xunta de Galicia, permitirase a presentación deste de forma presencial dentro dos prazos previstos e na forma indicada no parágrafo anterior. A información actualizada sobre o tamaño máximo e os formatos admitidos pode consultarse na sede electrónica da Xunta de Galicia.
A sede electrónica da Xunta de Galicia permite ás persoas interesadas realizar trámites electrónicos, con posterioridade ao inicio do expediente, accedendo á Carpeta cidadá da persoa interesada. Opcionalmente, tamén poderán tramitarse presencialmente en calquera dos lugares e rexistros establecidos na normativa reguladora do procedemento administrativo común.
Cuarto. Comprobación de datos
Para a tramitación do procedemento PR471A (anexo I) consultaranse automaticamente os datos incluídos nos seguintes documentos elaborados polas administracións públicas:
a) DNI ou NIE da persoa solicitante.
b) Situación de desemprego.
c) Certificado de inexistencia de antecedentes penais.
d) Certificación de aptitude dos niveis de lingua galega oral, iniciación ou perfeccionamento ou equivalentes (Celga 1, 2, 3, 4), sempre que fose expedido pola Secretaría Xeral de Política Lingüística da Xunta de Galicia.
Consultarase ademais o seguinte dato cando a persoa faga constar que lle é aplicable: certificado de discapacidade igual ou superior ao 33 %, no suposto de ser expedido pola Xunta de Galicia.
No caso de que as persoas interesadas se opoñan a esta consulta, deberán indicalo no cadro correspondente habilitado no formulario de inicio e achegar os documentos.
Excepcionalmente, no caso de que algunha circunstancia imposibilitase a obtención dos citados datos, poderáselles solicitar ás persoas interesadas a presentación dos documentos correspondentes.
Quinto. Taxa
Conforme dispón a Lei 6/2003, do 9 de setembro, de taxas, prezos e exaccións reguladoras da Comunidade Autónoma de Galicia, segundo a modificación introducida pola Lei de orzamentos para o ano 2011, a taxa por participación nas probas para obter a certificación acreditativa da habilitación será de 53,02 euros, que serán ingresados mediante o modelo xeral de autoliquidación de taxas.
Poden acceder a el desde a páxina web da Axencia Tributaria de Galicia (www.atriga.gal), a través da cal poderán pagar; no caso de non ter certificado dixital, de forma presencial (comparecendo na entidade colaboradora, das cales existe unha listaxe pública nesa mesma páxina web, ou telematicamente con tarxeta bancaria). No caso de ter certificado dixital, poderán pagar accedendo á oficina virtual, de forma presencial ou telematicamente, mediante, cargo en conta ou con tarxeta.
As/os aspirantes deberán cubrir, nos puntos habilitados para o efecto no referido modelo de autoliquidación de taxas, tanto se o pagamento se fai de xeito presencial na entidade colaboradora como telematicamente a través da oficina virtual da Axencia Tributaria de Galicia, os seguintes códigos:
Consellería de: Presidencia, Administracións Públicas e Xustiza.
Código: 04.
Delegación de Pontevedra.
Código: 40.
Servizo de Academia Galega de Seguridade Pública.
Código: 19.
Taxa: denominación: participación nas probas para obter certificación acreditativa da habilitación.
Código: 30.48.01.
Total: 53,02 euros.
Ademais, as/os aspirantes cubrirán os seus datos persoais nos puntos reservados para tal fin no citado modelo.
Están exentos do pagamento desta taxa:
1. As/os aspirantes que figuren inscritas/os como desempregados no Instituto Nacional de Emprego.
2. As/os aspirantes que teñan unha discapacidade igual ou superior ao 33 %, acreditando documentalmente tal situación, agás no caso de que a situación de discapacidade fose expedida pola Xunta de Galicia.
A falta de xustificación do pagamento íntegro da taxa por dereitos de exame, dentro do prazo de presentación de solicitudes, determinará a exclusión da/do aspirante do proceso, sen que sexa posible emendar tal deficiencia nun momento posterior.
Sexto. Lugar e prazo de presentación de solicitudes
As solicitudes do procedemento PR471A presentaranse preferiblemente por vía electrónica a través do formulario normalizado (anexo I) dispoñible na sede electrónica da Xunta de Galicia, https://sede.xunta.gal.
Opcionalmente poderanse presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común.
Para a presentación de solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365).
O prazo de presentación de solicitudes será de 20 días hábiles, contados a partir do día seguinte ao da publicación da presente convocatoria no Diario Oficial de Galicia.
Sétimo. Admisión
A admisión das persoas que o soliciten realizarase nos prazos e na forma prevista no artigo 5 das bases xerais.
Oitavo. Data, tribunal cualificador e lugar de realización
A data e composición do tribunal cualificador das probas correspondentes a esta convocatoria coñeceranse na resolución que faga pública a relación definitiva de aspirantes admitidas/os á realización delas.
As probas realizaranse na sede da Agasp (avda. da Cultura, s/n, 36680 A Estrada, Pontevedra).
Noveno. Información ás persoas interesadas
Sobre esta convocatoria poderase obter información adicional, na Academia Galega de Seguridade Pública, a través dos seguintes medios:
a) Páxina web da Academia Galega de Seguridade Pública (https://agasp.xunta.gal).
b) No enderezo electrónico formacion.agasp@xunta.gal.
c) Nos teléfonos da Agasp 886 20 61 10.
d) No Servizo de Formación en Seguridade Pública na Agasp (avda. da Cultura, s/n, 36680 A Estrada, Pontevedra).
e) Na Guía de procedementos e servizos, no enderezo https://sede.xunta.gal/guia-de-procedementos-e-servizos.
Décimo. Publicación dos actos
1. Concluídas as probas, o tribunal fará públicas e elevará á Dirección Xeral da Agasp as relacións dos/das aspirantes declarados/as aptos/as. Esta publicación substitúe as notificacións ás persoas interesadas de acordo co artigo 45 da Lei 39/2025.
2. A Dirección Xeral da Agasp elevará á dirección xeral competente en materia de espectáculos públicos a listaxe definitiva dos/das aspirantes declarados/as aptos/as e procederá á súa publicación no DOG, no taboleiro de anuncios da Agasp e na páxina web da Agasp http://agasp.xunta.gal/.
Décimo primeiro. Expedición da habilitación do persoal de control de acceso
As/os aspirantes que superaron as probas deberán presentar unha solicitude dirixida á Dirección Xeral de Emerxencias e Interior axustada ao modelo normalizado que figura como anexo II desta resolución (código de procedemento PR472A), xunto co xustificante de ter aboada a correspondente taxa, para que lle sexa expedida a habilitación prevista no artigo 6 do Decreto 8/2010, do 21 de xaneiro, necesaria para desenvolver a función de control de acceso, xunto co distintivo que os identifique e acredite como persoal de control de acceso a espectáculos públicos e actividades recreativas.
As solicitudes poderán presentarse segundo o establecido no punto sexto desta resolución no prazo de 10 días hábiles, contados a partir do día seguinte ao da publicación da relación definitiva das/dos aspirantes que superaron as probas no Diario Oficial de Galicia.
O pagamento da taxa poderá facerse en calquera das modalidades previstas no punto quinto desta resolución e deben cubrir os seguintes códigos no modelo de autoliquidación:
Consellería de: Presidencia, Administracións Públicas e Xustiza.
Código: 04.
Delegación de Servizos Centrais.
Código: 13.
Servizo de Interior e Espectáculos Públicos.
Código: 20.
Taxa: denominación: expedición e renovación da habilitación.
Código: 30.48.02.
Total: 6,23 euros.
Disposición adicional. Información básica sobre a protección de datos persoais
Os datos persoais recadados neste procedemento serán tratados na súa condición de responsable pola Xunta de Galicia –Vicepresidencia e Consellería de Presidencia, Admnistracións Públicas e Xustiza– coas finalidades de levar a cabo a tramitación administrativa que derive da xestión deste procedemento e a actualización da información e dos contidos da Carpeta cidadá.
O tratamento dos datos baséase no cumprimento dunha misión de interese público ou no exercicio de poderes públicos, conforme a normativa recollida na ficha do procedemento incluída na Guía de procedementos e servizos, no propio formulario anexo e nas referencias recollidas en https://www.xunta.gal/informacion-xeral-proteccion-datos. Con todo, determinados tratamentos poderán fundamentarse no consentimento das persoas interesadas, esta circunstancia reflectirase no devandito formulario.
Os datos serán comunicados ás administracións públicas no exercicio das súas competencias, cando sexa necesario para a tramitación e resolución dos seus procedementos ou para que os cidadáns poidan acceder de forma integral á información relativa a unha materia.
Co fin de dar a publicidade exixida ao procedemento, os datos identificativos das persoas interesadas serán publicados conforme o descrito na presente norma reguladora a través dos distintos medios de comunicación institucionais de que dispón a Xunta de Galicia, como son os diarios oficiais, páxinas web e os taboleiros de anuncios.
As persoas interesadas poderán acceder, rectificar e suprimir os seus datos, así como exercer outros dereitos ou retirar o seu consentimento, a través da sede electrónica da Xunta de Galicia ou presencialmente nos lugares e rexistros establecidos na normativa reguladora do procedemento administrativo común, segundo se explicita na información adicional recollida en https://www.xunta.gal/proteccion-datos-persoais.
Disposición derradeira primeira
Esta resolución entrará en vigor o día seguinte ao da súa publicación no Diario Oficial de Galicia.
A Estrada, 27 de febreiro de 2020
Santiago Villanueva Álvarez
Director xeral da Academia Galega de Seguridade Pública
