Examinado o expediente de declaración de interese galego e inscrición no Rexistro de Fundacións de Interese Galego da Fundación Arume, dítase esta resolución baseada nos feitos e fundamentos que se expoñen a seguir:
Feitos:
1. O 9 de agosto de 2019, José Carballo García, presidente do padroado da Fundación, presentou solicitude de clasificación, para os efectos da inscrición no Rexistro de Fundacións de Interese Galego, desta entidade.
2. A Fundación Arume foi constituída en escritura pública outorgada en Santiago de Compostela (A Coruña) o 10 de xuño de 2019, ante o notario Héctor Ramiro Pardo García, co número de protocolo 556, pola Asociación Galega Monte Industria, representada por José Carballo García; a Federación Empresarial de Aserraderos y Rematantes de Maderas de Galicia (Fearmaga), representada por José Elier Ojea Ureña; a Asociación Forestal de Galicia, representada por Francisco Javier Fernández de Ana Magán; a Asociación de Empresarios de la Primera Transformación de la Madera de Lugo, representada por Daniel Díaz Ramos; o Clúster da Madeira de Galicia, representado por José Manuel Parada Rodríguez; a Asociación de Viveiros Forestais de Galicia (Vifoga), representada por Isabel Álvarez Balvís; a Asociación de Empresas de Servizos Forestais de Galicia (Serfoga), representada por María Elena Picos Vilar; a Asociación Sectorial Forestal Galega (Asefoga), representada por Jacobo Feijóo Lamas; e Abanca Corporación Bancaria, S.A., representada por Jesús Combarro Pereira.
3. A Fundación Arume, segundo establece o artigo 6 dos seus estatutos, ten por obxecto:
– Promover o valor e o uso dos montes galegos, en especial os de coníferas e, en particular, dos piñeiros de Galicia, mediante o impulso de plans integrais e a realización de actuacións de dinamización e recuperación dos montes e a potenciación do uso das súas madeiras para xerar un ecosistema sustentable e, con iso, contribuír activamente a unha maior riqueza forestal, á mellora do medio rural, ao benestar dos cidadáns e ao desenvolvemento económico de Galicia.
– A recadación de fondos e obtención de axudas -ben sexan subvencións, donativos ou axudas de calquera outra índole- destinadas a financiar actividades de investigación, a través de proxectos de I+D, de innovación, de formación, de comunicación e de divulgación coa finalidade de mellorar os montes de coníferas, así como calquera outro de promoción do uso das súas madeiras nos ámbitos propios da cadea de valor forestal galega.
– Fomentar e impulsar a implantación de modelos de silvicultura tecnicamente contrastados, a mellora xenética dos materiais de reprodución e a certificación da xestión forestal sustentable nos montes galegos.
– Sensibilizar a opinión pública e as administracións públicas acerca da importancia ambiental e económica dos ecosistemas de piñeirais e do uso dos piñeiros de Galicia, así como promover as medidas lexislativas adecuadas para protexer e promover a silvicultura activa e a xestión sustentable dos montes e o uso da madeira de coníferas de Galicia.
– Preservar e comunicar os valores ambientais, culturais, sociais e económicos vinculados aos montes e ao uso de madeira de coníferas e, en particular, dos piñeiros de Galicia.
– Promover e fomentar o consumo da madeira de coníferas de Galicia en todos os ámbitos e o uso de produtos certificados, así como impulsar o desenvolvemento de novas aplicacións da madeira con produtos de maior valor engadido.
– Promover e fomentar os aproveitamentos micolóxicos e outros aproveitamentos forestais compatibles coa produción de madeira de coníferas de Galicia.
4. Na escritura de constitución da fundación constan os datos relativos á personalidade do fundador; á súa capacidade para constituíla; á súa vontade de facelo como de interese galego conforme os preceptos da Lei 12/2006, do 1 de decembro, de fundacións de interese galego; á dotación; aos estatutos e á composición do padroado inicial.
5. Nos estatutos da fundación consta a súa denominación; o seu enderezo; o seu obxecto e finalidade; as regras para a aplicación das rendas aos fins fundacionais e para a determinación dos beneficiarios; a composición e as normas de funcionamento do padroado; e as causas de disolución e o destino dos bens e dereitos resultantes da súa liquidación.
6. O padroado inicial da fundación está formado por José Carballo García, en representación da Asociación Galega Monte Industria, como presidente; Francisco Javier Fernández de Ana Magán e Francisco Guillermo Dans del Valle, en representación da Asociación Forestal de Galicia, como vicepresidentes; Jesús Combarro Pereira, en representación de Abanca Corporación Bancaria, S.A., como tesoureiro; Ismael Olveira Lema, como secretario; e José Manuel Cajaraville Varela e Juan José Busto Rodríguez, en representación da Federación Empresarial de Aserraderos y Rematantes de Madera de Galicia (Fearmaga); José Luis Lozano Paz, en representación da Asociación de Empresarios de la Primera Transformación de la Madera de Lugo; Benito García Sánchez, en representación do Clúster da Madeira de Galicia; Isabel Álvarez Balvís, en representación da Asociación de Viveiros Forestais de Galicia (Vifoga); Alejandro Arias Otero, en representación da Asociación de Empresas de Servizos Forestais de Galicia (Serfoga); e Jacobo Feijóo Lamas, en representación da Asociación Sectorial Forestal Galega (Asefoga) como vogais.
7. A Comisión integrada polos secretarios xerais técnicos de todas as consellerías elevou ao vicepresidente e conselleiro de Presidencia, Administracións Públicas e Xustiza proposta de clasificación como de interese para o desenvolvemento forestal de Galicia da Fundación Arume, con base nas materias que constitúen o seu obxecto e finalidade fundacional, polo que, dado que se cumpren os requisitos exixidos na Lei 12/2006, do 1 de decembro, de fundacións de interese galego, e segundo establecen os artigos 47.2 da citada lei; 51 do Regulamento de fundacións de interese galego, aprobado polo Decreto 14/2009, do 21 de xaneiro; e 7 do Regulamento do Rexistro de Fundacións de Interese Galego, aprobado polo Decreto 15/2009, do 21 de xaneiro; o protectorado será exercido polo departamento da Xunta de Galicia que teña atribuídas as competencias correspondentes aos fins fundacionais.
8. De conformidade coa citada proposta, por Orde da Vicepresidencia e Consellería de Presidencia, Administracións Públicas e Xustiza do 26 de febreiro de 2020 (Diario Oficial de Galicia núm. 47, do 10 de marzo) clasificouse de interese para o desenvolvemento forestal de Galicia a Fundación Arume, e adscribiuse á Consellería do Medio Rural para os efectos do exercicio das funcións de protectorado.
9. Con data do 14 de marzo de 2020 publicouse no Boletín Oficial del Estado (BOE) o Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19.
En virtude do disposto pola súa disposición adicional terceira no seu punto 1, suspéndense os termos e interrómpense os prazos para a tramitación dos procedementos das entidades do sector público. Así mesmo, de conformidade co punto 3 da citada disposición adicional, non obstante o anterior o órgano competente poderá acordar, mediante resolución motivada, as medidas de ordenación e instrución estritamente necesarias para evitar prexuízos graves nos dereitos e intereses do interesado no procedemento e sempre que este manifeste a súa conformidade, ou cando o interesado manifeste a súa conformidade con que non se suspenda o prazo.
O 15 de marzo de 2020 publicouse no Diario Oficial de Galicia a Resolución do 15 de marzo de 2020, da Secretaría Xeral Técnica da Consellería de Presidencia, Administracións Públicas e Xustiza, pola que se dá publicidade ao acordo do Centro de Coordinación Operativa (Cecop), mediante o cal se adoptan medidas preventivas en lugares de traballo do sector público autonómico como consecuencia da evolución epidemiolóxica do coronavirus COVID-19 e en cuxo número sétimo se reproducen nos seus mesmos termos os puntos 1, 2 e 3 da disposición adicional terceira do Real decreto 463/2020, do 14 de marzo.
O 18 de marzo de 2020 publicouse no BOE o Real decreto 465/2020, do 17 de marzo, polo que se modifica o Real decreto 463/2020, do 14 de marzo, arriba sinalado, e en virtude do cal se modificou a disposición adicional terceira, relativa á suspensión dos termos e interrupción dos prazos para a tramitación dos procedementos, completándoa.
10. Con data do 30 de abril de 2020 o presidente da Fundación Arume solicitou a esta secretaría xeral técnica a continuación do procedemento de inscrición da devandita fundación no Rexistro de Fundacións de Interese Galego.
11. Na data do 6 de maio de 2020 esta secretaria xeral técnica ditou resolución pola que se acorda a continuación do procedemento de inscrición no Rexistro de Fundacións de Interese Galego e de declaración de interese da Fundación Arume, ao abeiro do establecido na disposición adicional terceira do Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, modificada polo Real decreto 465/2020, do 17 de marzo.
Fundamentos de dereito:
Primeiro. O artigo 34 da Constitución española recoñece o dereito de fundación para fins de interese xeral, consonte a lei, e o artigo 27.26 do Estatuto de autonomía para Galicia establece que é competencia exclusiva da Comunidade Autónoma galega o réxime das fundacións de interese galego.
Segundo. De acordo co disposto no artigo 7.2 do Regulamento do Rexistro de Fundacións de Interese Galego, en relación co Decreto 149/2018, do 5 de decembro, polo que se establece a estrutura orgánica da Consellería do Medio Rural e se modifica parcialmente o Decreto 177/2016, do 15 de decembro, polo que se fixa a estrutura orgánica de Vicepresidencia e das consellerías da Xunta de Galicia (DOG núm. 235, do 11 de decembro de 2018), corresponde á dita consellería a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego da Fundación Arume, así como o exercicio das funcións de protectorado e as demais que correspondan á Xunta de Galicia de conformidade co indicado no dito regulamento.
Á vista do que antecede e tendo en consideración o establecido na normativa vixente en materia de fundacións de interese galego, e nas demais normas de xeral e pertinente aplicación; en uso das competencias atribuídas polo Decreto 149/2018, do 5 de decembro, polo que se establece a estrutura orgánica da Consellería do Medio Rural e se modifica parcialmente o Decreto 177/2016, do 15 de decembro, polo que se fixa a estrutura orgánica de Vicepresidencia e das consellerías da Xunta de Galicia,
RESOLVO:
Primeiro. Declarar de interese galego a Fundación Arume.
Segundo. Ordenar a súa inscrición no Rexistro de Fundacións de Interese Galego, sección da Consellería do Medio Rural.
Terceiro. Esta fundación queda sometida ao disposto na Lei 12/2006, do 1 de decembro, de fundacións de interese galego, no Regulamento de fundacións de interese galego, aprobado polo Decreto 14/2009, do 21 de xaneiro, no Regulamento do Rexistro de Fundacións de Interese Galego, aprobado polo Decreto 15/2009, do 21 de xaneiro, e na demais normativa de aplicación e, especialmente, ás obrigas de dar publicidade suficiente dos seus obxectivos e actividades, da ausencia de ánimo de lucro na prestación dos seus servizos, así como á de presentación anual da documentación contable e do plan de actuación ante o protectorado, que será exercido pola Consellería do Medio Rural.
Contra esta resolución, que non pon fin á vía administrativa, poderá interpoñerse recurso de alzada ante o conselleiro do Medio Rural, no prazo dun mes contado desde o día seguinte ao da súa publicación, de acordo co sinalado nos artigos 121 e 122 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 11 de maio de 2020
María Jesús Lorenzana Somozaj
Secretaria xeral técnica da Consellería do Medio Rural
